კორონავირუსი: 15 მარტს მსოფლიოსა და კავკასიაში არსებული ძირითადი ფაქტები და რიცხვები

ძირითადი წყაროები – CNN-ის სპეციალური ანგარიში და The Economist.

ბოლო ორი კვირის განმავლობაში, დაავადების კერამ ჩინეთიდან დანარჩენ მსოფლიოში გადაინაცვლა. პანდემიის ეპიცენტრად ევროპა იქცა და მას მალე, შესაძლოა აშშ დაეწიოს.

• კორონავირუსი: გამოცხადდა პანდემია. რას ნიშნავს ეს და რას უნდა ველოდოთ

• 2წუთიანი ვიდეო იმის შესახებ, თუ როგორ უნდა დავიცვათ თავი კორონავირუსისგან

• კორონავირუსი: არავითარი ხელის ჩამორთმევა, მისალმება იდაყვებითა და ფეხსაცმლებით. ვიდეო

• ყველაფერი კორონავირუსისშესახებ

სიტუაცია კავკასიაში

• 30 ინფიცირებულია საქართველოში. ორი ირანიდან ჩამოვიდა, დანარჩენებს იტალიასთან აქვთ კავშირი. 500-ზე მეტი ადამიანი კარანტინშია. საქართველომ მკაცრი შეზღუდვები დააწესა ქვეყანაში შესვლაზე მსოფლიოს თითქმის ყველა ქვეყნიდან, მათ შორის, ჩაკეტა საზღვარი აზერბაიჯანსა და სომხეთთან. დახურულია სასწავლო დაწესებულებები, გაუქმდა საჯარო ღონისძიებები.

• აზერბაიჯანში კორონავირუსით ინფიცირებული 19 ადამიანია. ერთი პაციენტი გარდაიცვალა, ექვსი კი გამოჯანმრთელდა და საავადმყოფოდან გაეწერა. 17 ინფიცირებული საკუთარ ქვეყანაში ირანიდან ჩავიდა, ორმა იტალიაში იმოგზაურა. აზერბაიჯანმა ირანთან საზღვარი ჩაკეტა, მთელ ქვეყანაში დახურულია სკოლები და საბავშვო ბაღები.

• სომხეთში 20 ადამიანია ინფიცირებული. პირველი მათგანი ქვეყანაში ირანიდან ჩავიდა, დანარჩენებმა იტალიაში იმოგზაურეს. კარანტინშია 200-ზე მეტი ადამიანი. ქვეყანამ ირანთან სავიზო რეჟიმი დააწესა. დახურულია ყველა სასწავლო დაწესებულება.

იტალიაში ეპიდემიის სწრაფად ზრდა გრძელდება

• იტალიაში მხოლოდ ერთი დღის, 14 მარტის განმავლობაში, კორონავირუსით ინფიცირების 2 547 ახალი შემთხვევა და გარდაცვალების 252 ფაქტი დაფიქსირდა. ეს ყველაზე მაღალი სტატისტიკური მაჩვენებელია მთელ მსოფლიოში პანდემიის დაწყების შემდეგ.

• საერთო ჯამში, იტალიაში კორონავირუსით ინფიცირების 21 157 შემთხვევაა დადასტურებული, გარდაიცვალა – 1 441.

ირანი კრიზისშია

• ირანში დაავადებულთა რიცხვი სწრაფად მატულობს – ერთი დღის, 14 მარტის განმავლობაში, ათასზე მეტი ახალი შემთხვევა დაფიქსირდა. ოფიციალური მონაცემებით, ირანში 12 729 ინფიცირებული და 611 გარდაცვლილი ჰყავთ.

თუმცა, ადგილობრივ საზოგადოებასა და მსოფლიოშიც ამბობენ, რომ ეს რიცხვები, შესაძლოა, მნიშვნელოვნად იყოს დაწეული. ინტერნეტში გამოჩნდა თანამგზავრიდან გადაღებული ფოტოები, სადაც ჩანს ძმათა სასაფლაოები ირანის ქალაქ ყუმში. ამ ორმოების საერთო სიგრძე 100 მეტრამდეა და ისინი თებერვლის დასაწყისში გაჩნდა.

• ძმათა სასაფლაოები ირანში კორონავირუსით გარდაცვლილთათვის – თანამგზავრიდან გადაღებული ფოტოები. ვიდეო

ვატიკანმა აღდგომის დღესასწაულის საჯაროდ აღნიშვნა გააუქმა

• 15 მარტს, ვატიკანმა გამოაცხადა ყველა სააღდგომო მესის, 5 აპრილს ბზობისა და 12 აპრილს აღდგომის დღესასწაულის საჯაროდ აღნიშვნის გადადების შესახებ.

• დაკეტილია ვატიკანის ყველა მუზეუმი, ასევე წმინდა პეტრეს მოედანი და წმინდა პეტრეს ბაზილიკა.

• ვატიკანში კორონავირუსის ერთი დადასტურებული შემთხვევაა.

 კორონავირუსით დაზარალებული მსოფლიო ლიდერები

• აშშ-ის პრეზიდენტმა დონალდ ტრამპმა უარყოფითი პასუხი აჩვენა კორონავირუსზე. მას ტესტირება იმის შემდეგ ჩაუტარეს, რაც ბრაზილიელ დელეგატებს შეხვდა, რომლებიც კორონავირუსით ინფიცირებულები აღმოჩნდნენ.

• ინფიცირებულია მაიამის მერი, ფრენსის სუარესი.

• ინფიცირებულია კანადის პრემიერ-მინისტრის, ჯასტინ ტრუდოს მეუღლე, სოფი. ისინი ორივე იზოლაციაში იმყოფებიან, თუმცა, ჯერჯერობით, კანადის მთავრობის მეთაურს არანაირი სიმპტომი არ გამოვლენია.

• საფრანგეთში, ოთხმა პოლიტიკოსმა აჩვენა კორონავირუსის ტესტზე დადებითი პასუხი: პარლამენტის წევრმა, პარლამენტის თანამშრომელმა, კულტურის მინისტრმა და ეკოლოგიის მინისტრის სახელმწიფო მდივანმა.

• ესპანეთში, პრემიერ-მინისტრის, პედრო სანჩესის მეუღლეა კორონავირუსით ინფიცირებული. ისინი ორივე იზოლაციაში იმყოფებიან.

• დიდ ბრიტანეთში ვირუსი ჯანდაცვის მინისტრს აღმოაჩნდა.

• ირანში, მთავრობის 8 პროცენტი და 23 დეპუტატი კორონავირუსით არის ინფიცირებული. ორი დეპუტატი გარდაიცვალა.

• ავსტრალიაში, შინაგან საქმეთა მინისტრი დაინფიცირდა.