ოკუპირებული ცხინვალის ახალი ე.წ. პრემიერ-მინისტრი (და სავარაუდოდ მომავალი პრეზიდენტი) კრემლის პროტეჟე გახდა
მარატ კამბოლოვი სამხრეთ ოსეთის პრემიერ-მინისტრი გახდა
ე.წ. სამხრეთ ოსეთის პარლამენტმა ერთხმად დაამტკიცა მარატ კამბოლოვის კანდიდატურა პრემიერ-მინისტრის პოსტზე. ჩრდილოეთ ოსეთში დაბადებული რუსი მაღალჩინოსანი, რომელიც კრემლმა ცხინვალში ივნისის დასაწყისში გაგზავნა, რამდენიმე კვირაში ე.წ. პრეზიდენტ ალან გაგლოევის მთავარი მრჩევლიდან მთავრობის ხელმძღვანელად დაწინაურდა.
კამბოლოვის კანდიდატურა პარლამენტს თავად გაგლოევმა წარუდგინა, თუმცა მის დანიშვნას ადგილობრივ პოლიტიკურ წრეებში მხოლოდ საკადრო ცვლილებად არ აღიქვამენ. ცხინვალში სულ უფრო ხშირად საუბრობენ იმაზე, რომ მოსკოვის ახალი წარმომადგენელი შესაძლოა უახლოეს მომავალში თავად ე.წ. პრეზიდენტის პოსტზეც აღმოჩნდეს.
რუსეთის ფედერალურ სტრუქტურებში მრავალწლიანი კარიერის მქონე კამბოლოვს სხვადასხვა პერიოდში ეკავა მაღალი თანამდებობები ფედერალურ ანტიმონოპოლიურ სამსახურში, ეროვნებათა და რეგიონული პოლიტიკის მიმართულებით მომუშავე უწყებებსა და სხვა სახელმწიფო ინსტიტუტებში.
დანიშვნის შემდეგ პარლამენტში გამოსვლისას მან მთავარ გამოწვევად დემოგრაფიული კრიზისი დაასახელა. მისი თქმით, ბოლო სამი ათწლეულის განმავლობაში სამხრეთ ოსეთის მოსახლეობა თითქმის განახევრდა, რაც არა მხოლოდ სოციალური, არამედ ეკონომიკური და პოლიტიკური პრობლემების საფუძველიც გახდა.
“ეკონომიკა ადამიანების გარეშე არ მუშაობს, სკოლები ბავშვების გარეშე აზრს კარგავს, ხოლო სოფლები მოსახლეობის გარეშე ქრება“, – განაცხადა კამბოლოვმა და აღნიშნა, რომ ხელისუფლების თითოეული გადაწყვეტილება მოსახლეობისთვის ახალი შესაძლებლობების შექმნაზე უნდა იყოს ორიენტირებული.
ე.წ. პრემიერ-მინისტრმა ყურადღება გაამახვილა ასევე ეროვნული იდენტობის საკითხზე. მისი განცხადებით, სამხრეთ ოსეთი უნდა დარჩეს სივრცედ, სადაც ოსური ენა, ტრადიციები და ისტორიული მეხსიერება შენარჩუნდება.
როგორც მოსალოდნელი იყო, კამბოლოვმა განსაკუთრებული ადგილი დაუთმო რუსეთთან ურთიერთობებს. მისი თქმით, სამხრეთ ოსეთის განვითარებისთვის გადამწყვეტი მნიშვნელობა აქვს მოსკოვის მხარდაჭერას, რომელმაც, მისი შეფასებით, რეგიონის ყველაზე რთულ პერიოდებში უსაფრთხოებისა და სტაბილურობის უზრუნველყოფაში მნიშვნელოვანი როლი შეასრულა.
კამბოლოვის დანიშვნა მოჰყვა მაისში ვლადიმირ პუტინსა და ალან გაგლოევს შორის ხელმოწერილ შეთანხმებას, რომელიც ორ მხარეს შორის “ალიანსური ურთიერთობების გაღრმავებას“ ითვალისწინებს. შეთანხმებიდან რამდენიმე კვირაში გაგლოევმა კამბოლოვი საკუთარ მრჩევლად დანიშნა და დოკუმენტის შესრულების კოორდინაცია დაავალა.
მისი სწრაფი დაწინაურება ბევრმა აღიქვა, როგორც მოსკოვის მცდელობა, უფრო აქტიურად ჩაერთოს სამხრეთ ოსეთის შიდა მართვის პროცესში. ადგილობრივ პოლიტიკურ წრეებში გავრცელებული მოსაზრებით, კრემლი უკმაყოფილოა გაგლოევის ადმინისტრაციის საქმიანობით და ცდილობს არსებული პრობლემების კონტროლის ქვეშ მოქცევას.
ამ ფონზე კვლავ აქტუალურია ბრალდებები, რომლებიც სამხრეთ ოსეთის ხელისუფლების წარმომადგენლებს რუსული ფინანსური ინსტიტუტებიდან მიღებული მრავალმილიარდიანი სესხის შესაძლო მითვისებას უკავშირებს. ადგილობრივი ექსპერტების ნაწილი ვარაუდობს, რომ კამბოლოვის ერთ-ერთი მთავარი ამოცანა სწორედ ფინანსური სისტემისა და სახელმწიფო პროექტების სრული აუდიტი იქნება.
ზოგიერთი ანალიტიკოსის შეფასებით, მისი გამოჩენა შესაძლოა მხოლოდ მთავრობის ხელმძღვანელის პოზიციით არ შემოიფარგლოს. პოლიტიკური სტრატეგი დავიდ გაზატი მიიჩნევს, რომ თუ ქვეყანაში ვადამდელი საპრეზიდენტო არჩევნები ჩატარდება, კამბოლოვი ერთ-ერთი მთავარი ფავორიტი იქნება.
თუმცა პრემიერ-მინისტრის წინაშე არსებული გამოწვევები მხოლოდ პოლიტიკური არ არის. გაზატის შეფასებით, კამბოლოვს მოუწევს მუშაობა საზოგადოებაში არსებული უნდობლობის პირობებში, სადაც ერთდროულად სკეპტიკურად უყურებენ როგორც მოსკოვიდან ჩამოსულ ახალ კადრებს, ისე ადგილობრივ ჩინოვნიკებს, რომლებიც წლების განმავლობაში ხელისუფლების სხვადასხვა შემადგენლობაში მუშაობდნენ.
დაძაბულობა კიდევ უფრო გაიზარდა მას შემდეგ, რაც გაგლოევმა პრემიერის დამტკიცების წინ თავისი მოკავშირე, ძამბოლატ ტადტაევი, მთავრობის ადმინისტრაციის უფროსის პირველ მოადგილედ დანიშნა. ოპოზიციური ჯგუფები ტადტაევს კორუფციულ სქემებთან და სახელმწიფო სახსრების არაეფექტიან ხარჯვასთან აკავშირებენ, თუმცა ოფიციალური ბრალდებები მის წინააღმდეგ არ წაუყენებიათ.
კრიტიკოსების აზრით, ეს გადაწყვეტილება იმ მოქალაქეების მოლოდინებს ეწინააღმდეგება, რომლებიც კამბოლოვის მოსვლას ხელისუფლების სრულ განახლებასთან და ძველი ელიტების ჩამოშორებასთან აკავშირებდნენ. მიუხედავად ამისა, ადგილობრივ პოლიტიკურ წრეებში კვლავ იმედოვნებენ, რომ ახალი პრემიერ-მინისტრი შეძლებს არსებული დაპირისპირებების მართვას და ეკონომიკური თუ ადმინისტრაციული პრობლემების მოგვარების პროცესის დაწყებას.
ჯერჯერობით უცნობია, დარჩება თუ არა მარატ კამბოლოვი მხოლოდ მთავრობის ხელმძღვანელად, თუმცა მისი სწრაფი აღმასვლა და მოსკოვის აშკარა მხარდაჭერა მიუთითებს, რომ ე.წ. სამხრეთ ოსეთის პოლიტიკური მომავლის განხილვა მისი სახელის გარეშე უკვე რთულია.
