საქართველოს მთავრობა მესტიაში უკანონო კრიპტომაინინგის წინააღმდეგ ზომებს ამკაცრებს
კრიპტომაინინგთან ბრძოლა
საქართველოს ხელისუფლება აცხადებს, რომ სვანეთში უკანონო კრიპტომაინინგის წინააღმდეგ ბრძოლას იწყებს და ამ მიზნით მესტიის მუნიციპალიტეტში ელექტროენერგიის მოხმარების კონტროლის ახალი მექანიზმები ამოქმედდება.
სამართალდამცავი ორგანოების კოორდინაციის საკითხებში სახელმწიფო მინისტრმა, მამუკა მდინარაძემ, ბრიფინგზე განაცხადა, რომ მთავრობა ენერგეტიკულ სექტორზე ზეწოლის შემცირებას და ელექტროენერგიის უკანონო მოხმარების აღკვეთას გეგმავს. მისი თქმით, განსაკუთრებული ყურადღება დაეთმობა მესტიაში არსებულ კრიპტომაინინგის საქმიანობას, რომელსაც ხელისუფლება ენერგოსისტემისთვის ერთ-ერთ მთავარ გამოწვევად მიიჩნევს.
მდინარაძის განცხადებით, მუნიციპალიტეტში დაიწყება გამრიცხველიანების პროცესი, რომელიც, მისი თქმით, წლების განმავლობაში სხვადასხვა წინააღმდეგობის გამო ვერ ხორციელდებოდა. ხელისუფლების განმარტებით, ამ ნაბიჯის მიზანი ელექტროენერგიის არალეგალური მოხმარების გამოვლენა და აღმოფხვრაა.
მისივე თქმით, სვანეთში ელექტროენერგია კვლავ უფასოდ დარჩება მოსახლეობისთვის საჭირო მოცულობის ფარგლებში, თუმცა დაწესდება მოხმარების ზედა ზღვარი, რომლის გადაჭარბების შემთხვევაში მომხმარებლებს შესაბამისი ტარიფის გადახდა მოუწევთ.
მდინარაძემ აღნიშნა, რომ მესტიაში ელექტროენერგიის მოხმარებამ 2025 წელს 133 მილიონ კილოვატსაათს მიაღწია, რაც, მისი თქმით, მნიშვნელოვნად აღემატება სხვა მუნიციპალიტეტების მაჩვენებლებს. ხელისუფლების შეფასებით, ეს ტენდენცია ენერგოსისტემას და მის ფინანსურ მდგრადობას ყოველწლიურად მინიმუმ 20-25 მილიონი ლარის ზარალს აყენებს, რომლის ტვირთიც საბოლოოდ ელექტროენერგიის მომხმარებლებზე ნაწილდება.
მისი განცხადებით, გამრიცხველიანება განხორციელდება როგორც ინდივიდუალურ, ისე სოფლებისა და დასახლებული პუნქტების დონეზე, რაც, ხელისუფლების თქმით, ელექტროენერგიის ჭარბი მოხმარების წყაროების უფრო ზუსტად იდენტიფიცირების შესაძლებლობას შექმნის.
მდინარაძემ ასევე განაცხადა, რომ სამართალდამცავ უწყებებს დაევალათ პროცესის მხარდაჭერა, კონტროლი და ელექტროენერგიის განსაკუთრებით დიდი მოცულობით მოხმარების შემთხვევების გამოვლენა. მისი თქმით, ხელისუფლება მკაცრ სამართლებრივ რეაგირებას აანონსებს იმ შემთხვევებზე, თუ ვინმე გამრიცხველიანების პროცესს ხელს შეუშლის ან კანონს დაარღვევს.
აღსანიშნავია, რომ სვანეთში კრიპტომაინინგის გამო ელექტროენერგიის მოხმარებისა და ქსელის გადატვირთვის საკითხი წლების განმავლობაში ადგილობრივი და ცენტრალური ხელისუფლებისთვის ერთ-ერთ პრობლემურ თემად რჩებოდა. ხელისუფლება მიიჩნევს, რომ ახალი ზომები ენერგოსისტემაზე ზეწოლის შემცირებასა და უკანონო მოხმარების შეზღუდვას შეუწყობს ხელს.
