ტროტუარზე დგომის გამო პატიმრობა კონსტიტუციასა და ადამიანის უფლებებს ეწინააღმდეგება - TI
ტროტუარზე დგომის გამო პატიმრობა
“საერთაშორისო გამჭვირვალობა-საქართველო” (TI) ტროტუარზე დგომის გამო მოქალაქეების დაპატიმრებას გამოეხმაურა. ორგანიზაციის განცხადებით, ეს გადაწყვეტილება ეწინააღმდეგება როგორც საქართველოს კონსტიტუციას, ასევე ადამიანის უფლებების საერთაშორისო სტანდარტებს, რომელთა ხელმომწერიც ქვეყანაა.
23 იანვარს, აქციაზე ტროტუარზე დგომის საქმეებზე თბილისის საქალაქო სასამართლოში რამდენიმე მოქალაქის სასამართლო პროცესი გაიმართა და გადაწყვეტილებები გამოცხადდა.
მოსამართლეებმა დავით მაკარაძემ, ზვიად ცეკვავამ და მანუჩარ ცაცუამ ყველა მოქალაქე სამართალდამრღვევად ცნეს, ნაწილს რამდენიმედღიანი ადმინისტრაციული პატიმრობა შეუფარდეს, ნაწილს კი – სიტყვიერი გაფრთხილება.
რას ამბობს TI
ორგანიზაციის შეფასებით, ტროტუარზე დგომის გამო პირის ადმინისტრაციული წესით დაკავება ახალ რეალობას ამკვიდრებს, რომელიც უფრო ავტორიტარული რეჟიმებისთვის არის დამახასიათებელი, ვიდრე დემოკრატიული სახელმწიფოსთვის.
“შეკრების თავისუფლება დაცულია როგორც კონსტიტუციით, ისე საერთაშორისო კონვენციებით. ამ სტანდარტებიდან გამომდინარე, მოქალაქის დასჯა მხოლოდ იმის გამო, რომ ის საჯარო სივრცეში პროტესტს გამოხატავს, ვერანაირ კრიტიკას ვერ უძლებს,“ — ნათქვამია ორგანიზაციის განცხადებაში.
უფლებადამცველები ხაზგასმით აღნიშნავენ, რომ მოსამართლეებს ჰქონდათ ალტერნატიული სამართლებრივი გზები. მათ შეეძლოთ საქმის შეწყვეტა სამართალდარღვევის არარსებობის გამო, ან განხილვის შეჩერება და საკითხის საკონსტიტუციო სასამართლოში გაგზავნა, როგორც ამას კანონმდებლობა ითვალისწინებს.
TI ასევე აკრიტიკებს იმ არგუმენტს, რომელსაც მსგავსი გადაწყვეტილებების ავტორები ხშირად იმოწმებენ – რომ “ასეთია კანონი“. ორგანიზაციის თქმით, როდესაც საქმე ეხება კონსტიტუციისა და საერთაშორისო კონვენციების დარღვევას, ფორმალურ ნორმებზე ამოფარება გამართლებად ვერ ჩაითვლება.
მათი შეფასებით, სასამართლოს მიერ მსგავსი პრაქტიკის დამკვიდრება არა მხოლოდ კონკრეტული დაკავებულების უფლებებს აზიანებს, არამედ უფრო ფართო პოლიტიკურ სიგნალსაც აგზავნის: რომ მშვიდობიანი პროტესტი შესაძლოა ადმინისტრაციული პატიმრობით დასრულდეს.
საქართველოში ბოლო წლებში შეკრების თავისუფლების გარშემო სამართლებრივი დავები არაერთხელ გამხდარა საზოგადოებრივი დისკუსიის საგანი. თუმცა ტროტუარზე დგომისთვის მოქალაქეების დაპატიმრება ახალი ეტაპია, რომელიც, უფლებადამცველების თქმით, ქვეყნის დემოკრატიულ რეპუტაციას სერიოზულ დარტყმას აყენებს.
