დიდმა ბრიტანეთმა ყოფილი მთავარი პროკურორი ოთარ ფარცხალაძე და პრორუსი ბიზნესმენი ლევან ვასაძე დაასანქცირა
ოთარ ფარცხალაძე და ლევან ვასაძე დაასანქცირეს
დიდმა ბრიტანეთმა უკრაინის წინააღმდეგ რუსეთის ომის მხარდაჭერის გამო საქართველოს ყოფილი მთავარი პროკურორი ოთარ ფარცხალაძე და პრორუსი ბიზნესმენი, ლევან ვასაძე დაასანქცირა. ბრიანეთის მთავრობის მიერ გამოქვეყნებული ინფორმაციის თანახმად, ოთარ ფარცხალაძესა და ლევან ვასაძეს დაუწესდათ როგორც ფინანსური, ასევე სამოგზაურო შეზღუდვები.
სანქციები აგრეთვე შეეხო ორ ნავთობტანკერს, რომლითაც რუსული ნავთობი ბათუმის პორტში შემოდიოდა. ლონდონის თქმით, ეს ხომალდები კრემლის “ჩრდილოვანი ფლოტის“ ნაწილია – მოძველებული და საფრთხისშემცველი გემები, რომლებსაც რუსეთი ენერგორესურსებიდან შემოსავლების შესანარჩუნებლად იყენებს. ახლა მათ ბრიტანეთის პორტებში შესვლა და ქვეყნის გემთა რეესტრში რეგისტრაცია ეკრძალებათ.
სანქცირებულთა სიაში შევიდნენ კომპანიებიც, მათ შორის Aeza International, რომელიც რუსულ დეზინფორმაციულ კამპანიებს ინტერნეტ-უსაფრთხოების სერვისებით ამარაგებდა და HeliCo Group, რომელიც ტრანსპორტის სფეროში მუშაობს.
ინფორმაციის თანახმად, ფარცხალაძეს და ვასაძეს გაეყინებათ აქტივები, დაუწესდებათ დირექტორის დისკვალიფიკაციის სანქცია, აკერძალებათ მოგზაურობა გაერთიანებულ სამეფოში და დაუწესდებათ სანქციები ტრასტის სერვისებისთვის.
დიდი ბრიტანეთის მთავრობის განმარტება
“ქართველი პოლიტიკოსი და მედია მფლობელი ლევან ვასაძე [სანქციების] სამიზნეა თავის პლატფორმებზე პრორუსული დეზინფორმაციის გავრცელების გამო. ასევე სანქცირდება ბიზნესმენი ოთარ ფარცხალაძე, რომელსაც რუსეთთან და ქართულ ოცნებაში უმაღლეს დონეებზე ექსტენსიური კავშირები აქვს.” – წერია გავრცელებულ განცხადებაში.
ბრიტანეთის საგარეო უწყების ცნობით, მოსკოვი ომის ფონზე შესუსტებული პოზიციების გამო, უფრო მეტად ეყრდნობა მესამე ქვეყნებში მყოფ მხარდამჭერებს, მათ შორის საქართველოში, როგორც ფინანსური, ასევე პროპაგანდისტული ოპერაციების გასაძლიერებლად.
ბრიტანეთის სახელმწიფო მინისტრმა ევროპის საკითხებში სტივენ დაუთიმ განაცხადა, რომ პუტინის სამხედრო მანქანა საერთაშორისო ქსელზეა დამყარებული, რომელიც ტყუილს ავრცელებს და ომს აფინანსებს.
“ჩვენ კიდევ ერთ საარსებო წყაროს ვჭრით საქართველოში იმ ადამიანების მიზანში ამოღებითა და შეკავებით, რომლებიც უკრაინაში პუტინის უკანონო ომს დახმარებას უწევენ.” – განაცხადა დაუთიმ.
როგორც დიდი ბრიტანეთის სახელმწიფო მინისტრი განმარტავს, ეს ნაბიჯი მოჰყვა 2024 წელს ლონდონის გადაწყვეტილებას, შეეზღუდა ურთიერთობები საქართველოსთან – მას შემდეგ, რაც მმართველმა პარტიამ “ქართული ოცნებამ“ კრემლის შთაგონებით მიღებული კანონები მიიღო, შეასუსტა სამოქალაქო საზოგადოება და ოპოზიციის ლიდერები დააპატიმრა.
დიდი ბრიტანეთის მთავრობა ასევე აღნიშნავს, რომ გაერთიანებული სამეფო უკრაინის ურყევ მხარდაჭერას განაგრძობს და ენერგეტიკული ინფრასტრუქტურისთვის დამატებით 142 მილიონ ევროს გამოყოფს, საფრანგეთთან ერთად “მსურველთა კოალიციას“ ხელმძღვანელობს და უკრაინასთან 100-წლიან პარტნიორობას აფორმებს.
2023 წლის 14 სექტემბერს ოთარ ფარცხალაძეს ამერიკის შეერთებულმა შტატებმა სანქციები დაუწესა. სანქციების დაწესება ოთარ ფარცხალაძის ბიზნესსაქმიანობას და რუსულ “ეფესბესთან” თანამშრომლობას უკავშირდება. პაკეტის ოფიციალურად გამოცხადებამდე, მედიაში გავრცელდა ინფორმაცია, რომ სანქცირებულთა შორის იყო “ქართველი-რუსი ოლიგარქი”.
