შალვა ცისკარაშვილი: საგარეო უწყებაში მიმდინარეობს რეორგანიზაცია ევროპული კურსის მხარდამჭერების წინააღმდეგ
რეორგანიზაცია საგარეო უწყებაში
საგარეო საქმეთა სამინისტროს საერთაშორისო ორგანიზაციების დეპარტამენტის დირექტორი შალვა ცისკარაშვილი სოციალურ ქსელ X-ში წერს, რომ საგარეო საქმეთა სამინისტროში დაწყებული რეორგანიზაცია მიზნად ისახავს 2024 წლის 28 ნოემბრის ერთობლივი განცხადების ხელმომწერი დიპლომატების თანამდებობიდან გათავისუფლებას ან დაქვეითებას.
მისივე თქმით, იგი უარს ამბობს მონაწილეობა მიიღოს ე.წ. მენეჯერული კონკურსში და 28-წლიანი სამსახურის შემდეგ ტოვებს დიპლომატიურ სისტემას.
ცისკარაშვილი ერთ-ერთი იყო იმ დიპლომატებს შორის, რომლებმაც 2024 წლის ნოემბერში ღიად დაუჭირეს მხარი საქართველოს კონსტიტუციის 78-ე მუხლით განსაზღვრულ ევროკავშირსა და ევროატლანტიკურ ინტეგრაციას.
“რეორგანიზაცია, როგორც შტაბ-ბინაში, ასევე საზღვარგარეთ საქართველოს დიპლომატიურ მისიებში, უპირველეს ყოვლისა მიზნად ისახავს ერთობლივი განცხადების ხელმომწერთა თანამდებობიდან გათავისუფლებას ან თანამდებობებიდან დაქვეითებას. მთელი პროცესი გარდაუვლად გამოიწვევს საქართველოს დიპლომატიური სამსახურის სისტემურ პოლიტიზაციას.
რამდენიმე კოლეგასთან ერთად გადავწყვიტე, არ მიმეღო მონაწილეობა ამ რეორგანიზაციის ფარგლებში ადრე გამოცხადებულ მენეჯერულ თანამდებობებზე ე.წ. კონკურსში. ამით, ჩემი 28-წლიანი გამოცდილება საქართველოს დიპლომატიურ სამსახურში დასასრულს უახლოვდება.
ვუერთდები ჩემს კოლეგებს და კიდევ ერთხელ ვადასტურებ ჩვენს ერთგულებას საქართველოს ევროპული მომავლის მიმართ და ვუცხადებ სოლიდარობას ყველა საჯარო მოხელეს, რომლებიც უსამართლოდ გაათავისუფლეს,“ — აღნიშნულია განცხადებაში.
ბოლო თვეებია, სოციალური ქსელებში მუდმივად ჩნდება სტატუსები, რომლებშიც საჯარო მოხელეები სამსახურებიდან გათავისუფლების შესახებ წერენ. 2024 წლის დეკემბრის ბოლოს სამსახურიდან დათხოვნის მიზეზად უმეტესად ხელშეკრულების ვადის ამოწურვა იყო დასახელებული. მომდევნო თვეებში კი, გათავისუფლების მიზეზად, რეორგანიზაცია სახელდებოდა.
ამ რამდენიმე თვეში საჯარო სამსახურებიდან გათავისუფლებული თანამშრომლების აბსოლუტური უმრავლესობა პროევროპული პეტიციის ხელმომწერია. პეტიციაზე ხელის მოწერით, საჯარო მოხელეებმა ირაკლი კობახიძის 2024 წლის 28 ნოემბერს გაკეთებული განცხადება გააპროტესტეს. ამ განცხადების თანახმად, “ქართული ოცნება“ 2028 წლამდე ევროკავშირთან ინტეგრაციის პროცესს წყვეტს.
