რუსეთმა უკრაინაში ქართული ლეგიონის მეთაური ძებნილთა სიაში შეიყვანა

მამუკა მამულაშვილი ძებნილთა სიაში

რუსეთის შინაგან საქმეთა სამინისტრომ უკრაინაში ქართული ლეგიონის მეთაური, მამუკა მამულაშვილი ძებნილთა სიაში შეიყვანა. ამის შესახებ ინფორმაციას რუსული სამთავრობო მედია რუსეთის ფედერაციის შინაგან საქმეთა სამინისტროზე დაყრდნობით ავრცელებს.

მამუკა მამულაშვილი აღნიშნულს გამოეხმაურა და სოციალურ ქსელში დაწერა: “საოცარია, როგორ გაუსწრეს (ქართულ) ოცნებას”.

ქართული ლეგიონი არის უკრაინული სამხედრო ქვედანაყოფი, რომელიც ქართველი მოხალისეებისგან და პროფესიონალი სამხედროებისგან შედგება. ლეგიონი აღმოსავლეთ უკრაინაში რუსეთის შეჭრის შემდეგ შეიქმნა. მისი მეთაურია პოლკოვნიკი მამუკა მამულაშვილი.

2016 წლის თებერვალში ქართული ლეგიონი ოფიციალურად შეუერთდა უკრაინის 25-ე მოტოქვეითთა ბატალიონს და ამჟამად უკრაინის თავდაცვის სამინისტროს დაზვერვის სამმართველოს ექვემდებარება.

ქართული ლეგიონი, რომლის რიგებშიც ქართველი მოხალისეების გარდა სხვა ეროვნების წევრებიც იბრძვიან, დღეისთვის 2000-მდე სამხედროს აერთიანებს.

რუსეთის განმარტებით, “მამულაშვილი, რომელიც უკრაინის შეიარაღებული ძალების მხრიდან საომარ მოქმედებებში მებრძოლთა დაქირავებისა და მონაწილეობის საქმის ფარგლებში რუსეთში დაუსწრებლად იყო დაკავებული, სისხლის სამართლის მუხლით ძებნილთა სიაშია შეყვანილი”. ამასთან, მონაცემთა ბაზაში არ არის მითითებული, კონკრეტულად რომელი მუხლით მიმდინარეობს ძიება.

აქამდე, რუსეთის შინაგან საქმეთა სამინისტრომ გაავრცელა ინფორმაცია, რომ მამუკა მამულაშვილის წინააღმდეგ ორი საქმე იყო რუსეთში აღძრული – “დაქირავებული ბოევიკების დაკომპლექტებისა” და “ჯარის მიმართ სიძულვილის გაღვივების” ბრალდებით.

თავად მამუკა მამულაშვილმა არაერთხელ განმარტა, რომ ყველა ეს განცხადება სიცრუეა – მათი მიზანი უკრაინის მხარეს მებრძოლი დანაყოფის დისკრედიტაციაა.

ცნობისთვის, ქართული ლეგიონის 70-ზე მეტ წევრს რუსეთში ბრალი დაუსწრებლად წარუდგინეს. რუსეთის ფედერაციის საგამოძიებო კომიტეტმა განაცხადა, რომ ქართული ლეგიონის მებრძოლებმა რუსი სამხედრო მოსამსახურეების მიმართ დანაშაული ჩაიდინეს. მათივე თქმით, მამულაშვილმა, საჯარო განცხადებები გააკეთა რუსი სამხედროების წამებისა და მკვლელობის განზრახვის შესახებ.

● უსაფრთხოების სამსახური: ორგანიზაცია CANVAS-ის წევრები თბილისში ხელისუფლების დამხობის მასტერკლასებს ატარებდნენ
● უკრაინის საგარეო უწყება უარყოფს საქართველოში აჯანყების მომზადებაში უკრაინული მხარის ჩართულობას
● მამუკა მამულაშვილი სუს-ის განცხადებაზე: რუსული ხელწერაა და დაკავშირებულია ჩვენს საქმიანობასთან

საქართველოს უსაფრთხოების სამსახურმა 18 სექტემბერს გამოაქვეყნა განცხადებას, სადაც აღნიშნულია, რომ საქართველოში უკრაინული ევრომაიდნის სცენარის გამეორება და ხელისუფლების ძალადობრივად შეცვლა იგეგმება.

გეგმის ავტორად დასახელებულია უკრაინის სამხედრო დაზვერვის ხელმძღვანელის მოადგილე გიორგი ლორთქიფანიძე, რომელიც სააკაშვილის ხელისუფლების დროს შინაგან საქმეთა მინისტრის, ვანო მერაბიშვილის მოადგილე იყო;

ექს-პრეზიდენტ მიხეილ სააკაშვილის დაცვის ყოფილი წევრი მიხეილ ბატურინი;

სააკაშვილის ახლო გარემოცვის წევრი, უკრაინაში მოქმედი „ქართული ლეგიონის“ მეთაური მამუკა მამულაშვილი.

სუს-ის განცხადებით, რევოლუციური სცენარისთვის გამოსაყენებელი ახალგაზრდული ჯგუფების მომზადების მიზნით, გამოიყენება ორგანიზაცია “კანვასი”, რომლის ბირთვსაც, სუს-ის მტკიცებით, სერბული ორგანიზაცია “ოტპორი” შეადგენს.

მამუკა მამულაშვილი “ფორმულასთან” სატელეფონო საუბრის დროს სახელმწიფო უსაფრთხოების სამსახურის განცხადებას ეხმაურება ე.წ. გადატრიალების გეგმის შესახებ და ამბობს, რომ ეს რუსეთიდანაა ნაკარნახევი.

ამასთან, მამულაშვილი სუს-ის განცხადებას უკრაინაში ქართული ლეგიონის საქმიანობას უკავშირებს და აცხადებს, რომ “ქართული რუსული ხელისუფლება” ამით მათ დისკრედიტაციას ცდილობს.