აშშ-ის სენატში მოსმენისას საქართველოში ელჩობის კანდიდატმა, რობინ დანიგენმა განაცხადა, რომ საქართველოს ხელისუფლებასთან და ქართველ ხალხთან ერთად იმუშავებს, რათა საქართველოს ევროკავშირში, NATO-სა და დასავლეთში ინტეგრაციაში დაეხმაროს. ასევე, აშშ-ის ახალი ელჩის თქმით, შეერთებულ შტატებს სურს დემოკრატიული საქართველო, რომელსაც საკუთარი საზღვრების დაცვა და რუსეთის “მავნე ქმედებებისადმი” წინააღმდეგობის გაწევა შეეძლება.
ქართულ პოლიტიკაში ბიძინა ივანიშვილისა და რუსული გავლენების შესახებ კითხვაზე პასუხად ელჩობის კანდიდატმა თქვა, რომ მნიშვნელოვანია, აშშ-მ საქართველოს მხარი დაუჭიროს დემოკრატიული ინსტიტუტების შენებაში, რაც გააძლიერებს საზოგადოებას და რუსეთის მავნე საქმიანობისადმი რეზისტენტულს გახდის.
“ღრმად ვარ დარწმუნებული, რომ საქართველოს მხარდაჭერა დემოკრატიული ინსტიტუტების შენების გზაზე, დამოუკიდებელი მედიის გაძლიერება, სასამართლოს გაძლიერება – ეს ყველა ის ნაბიჯებია, რომლებიც საზოგადოებას გაძლიერებას და რუსული ან ჩინეთის მავნე საქმიანობისადმი გამძლეობაში ეხმარება”, – განაცხადა დანიგენმა.
კითხვაზე, არის თუ არა საჭირო აშშ-ს საქართველოში ანტიდემოკრატიული ძალების წინააღმდეგ უფრო მკაცრი ხაზი ჰქონდეს, ელჩობის კანდიდატმა თქვა, რომ აშშ-ს გულწრფელია საქართველოს ხელისუფლებისადმი მათ მიერ გადადგმულ შემაშფოთებელ ნაბიჯებზე.
მისივე თქმით, საქართველოში უცხოელი აგენტების კანონის გარშემო პროტესტები ასახავდა ქართველი ხალხის სურვილს, რომ მათი მომავალი დასავლეთში და ევროკავშირში მტკიცედ ინტეგრირებული იყოს:
“ჩვენ ამ გზისადმი ქართველი ხალხის ერთგულებას კიდევ და კიდევ ვხედავთ და ვფიქრობ, ჩვენს ეროვნულ ინტერესებშია, რომ მათი ამ გზაზე მხარდაჭერა გავაგრძელოთ.”
სანქციების გვერდის ავლის შესახებ დანიგენმა განაცხადა, რომ აშშ-ის პრიორიტეტია უზრუნველყოს სანქციების დანერგვა და ერთგულება და ამ საკითხზე საქართველოს ხელისუფლებასთან, ეროვნულ ბანკთან და კერძო სექტორთან პირდაპირი კომუნიკაცია აქვთ.
დანიგენს სჯერა, რომ რუსეთი საქართველოში მავნე ქმედებებს ახორციელებს, მათ შორის დეზინფორმაციას და ამას აქვს გავლენა ქვეყანაზე:
“ამიტომ ვფიქრობ, ჩვენი დახმარება დემოკრატიული რეფორმების იმპლემენტაციაში არის აუცილებელი.” – განაცხადა დანიგენმა.
ელჩობის კანდიდატმა ისაუბრა ევროკავშირის 12 პრიორიტეტზეც, რომელიც საქართველოს ხელისუფლებამ უნდა შეასრულოს, “რათა მიიღოს ევროკავშირის კანდიდატის სტატუსი”. მისი განმარტებით, ელჩად დამტკიცების შემთხვევაში, იგი იმუშავებს ხელისუფლებასთან, რომ ამ რეფორმების დანერგვაში მხარი დაუჭიროს.
რობინ დანიგენმა აშშ-ის სენატის საგარეო ურთიერთობათა კომიტეტში იმ 4 პრიორიტეტზე ისაუბრა, რომელზეც საქართველოში ელჩად დანიშვნის შემთხვევაში იმუშავებს. მისი თქმით, დამოუკიდებლობის მოპოვებიდან პროგრესის მიუხედავად “ზოგიერთი შემაშფოთებელი მოვლენა აჩვენებს, რომ მეტია გასაკეთებელი”.
4 პრიორიტეტის შესახებ
“ელჩად დამტკიცების შემთხვევაში ჩემი ყურადღება მიმართული იქნება 4 პრიორიტეტისკენ:
პირველი, ჩემი უმთავრესი ვალდებულება იქნება აშშ-ის საელჩოს ყველა თანამშრომლისა და საქართველოში მყოფი ყველა ამერიკელის უსაფრთხოების უზრუნველყოფა.
მეორე, ვიმუშავებ საქართველოს ხელისუფლებასთან ერთად და ქართველ ხალხთან, რათა დავეხმარო მათი ოცნების განხორციელებაში ევროკავშირში, NATO-სა და დასავლეთში მტკიცე ინტეგრაციის კუთხით. ევროატლანტიკური ინტეგრაცია არამხოლოდ სარგებელს მოუტანს საქართველოს მოქალაქეებს, მე ღრმად ვარ დარწმუნებული, რომ ეს აშშ-ის ეროვნული ინტერესიცაა. ჩვენ გვსურს დემოკრატიული საქართველო, მტკიცედ ინტეგრირებული დასავლეთში, რომელსაც შეეძლება საკუთარი საზღვრების დაცვა და შეეძლება რუსეთის მავნე ქმედებებისთვის წინააღმდეგობის გაწევა.
ბოლო 30 წლის განმავლობაში საქართველოს ჰქონდა შესანიშნავი პროგრესი, მაგრამ ზოგიერთი შემაშფოთებელი მოვლენა აჩვენებს, რომ მეტია გასაკეთებელი.
მესამე, მე გავაძლიერებ ორმხრივ ვაჭრობასა და ინვესტიციებს, მათ შორის აშშ-ის ექსპორტების გაზრდით და საქართველოში ამერიკული კომპანიებისთვის შესაძლებლობების მიცემით.
მეოთხე პრიორიტეტი იქნება, მხარი დავუჭირო საქართველო სუვერენიტეტსა და ტერიტორიულ მთლიანობას იმ ფონზე, როცა რუსეთს კვლავ ოკუპირებული აქვს მისი [საქართველოს] ტერიტორიების 20%. ვიმუშავებ ქართველ და საერთაშორისო პარტნიორებთან, რომ რუსეთი ვაიძულოთ შეასრულოს 2008 წლის ცეცხლის შეწყვეტის შეთანხმებით და გაეროს ქარტიით გათვალისწინებული მისი ვალდებულებები.“
2023 წლის 13 თებერვალს ამერიკის შეერთებული შტატების პრეზიდენტმა, ჯო ბაიდენმა საქართველოში საგანგებო და სრულუფლებიანი ელჩის კანდიდატად რობინ დანიგენი დაასახელა.
დანიგენი ამჟამად სახელმწიფო დეპარტამენტის ევროპისა და ევრაზიის საკითხების ბიუროში, ცენტრალური და აღმოსავლეთ ევროპის საკითხებში სახელმწიფო მდივნის თანაშემწის მოადგილის თანამდებობას იკავებს, მანამდე კი დანიგენი ავსტრიაში აშშ-ის საელჩოში საქმეთა დროებითი რწმუნებული და მისიის უფროსის მოადგილე იყო.
სხვადასხვა დროს, ის იკავებდა ენერგორესურსების ბიუროს მდივნის თანაშემწის მოადგილის პოზიციას; ასევე მუშაობდა აშშ-ის საელჩოებში ვიეტნამში, ჩილეში, თურქეთში, კუბასა და ელ სალვადორში.
დანიგენი კელი დეგნანს ჩაანაცვლებს, რომელიც აშშ-ის ელჩად საქართველოში 2020 წლის 29 იანვარს, სამი წლის ვადით დაინიშნა.
დანიგენმა სოციალურ მეცნიერებათა მაგისტრის ხარისხი „ეროვნული ომის კოლეჯში“ მიიღო. მას ასევე აქვს მეცნიერების მაგისტრის ხარისხი ჯორჯთაუნის უნივერსიტეტიდან და ბაკალავრის ხარისხი ბერკლის კალიფორნიის უნივერსიტეტიდან. ინგლისურის გარდა, ფლობს ესპანურ, გერმანულ, თურქულ და ვიეტნამურ ენებს.
ამერიკის კონსტიტუციის მიხედვით, პრეზიდენტის მიერ საგანგებო და სრულუფლებიანი ელჩის თანამდებობაზე წარდგენილი კანდიდატურა შეერთებული შტატების სენატმა უნდა დაამტკიცოს.
ვიდრე სენატი გადაწყვეტილებას მიიღებს, საკანონმდებლო ორგანოში მოსმენები გაიმართება, ელჩობის ნომინანტი კანონმდებლების კითხვებს უპასუხებს და წარმოადგენს საკუთარ ხედვას ამერიკის პოლიტიკასთან დაკავშირებით.
