ცნობილი აზერბაიჯანელი ფეხბურთელი თაღლითობაშია ბრალდებული

მაშალ ახმედოვს, ბაქოს საფეხბურთო კლუბ “ნეფტჩის” ისტორიაში ერთ-ერთი უძლიერეს თავდამსხმელს, მისჯილი აქვს 8-წლიანი თავისუფლების აღკვეთა დიდი მასშტაბის თაღლითობაში ბრალდებით.

ყოფილი ფეხბურთელის საქმე 30 იანვარს განიხილეს ბაქოს განსაკუთრებით მძიმე დანაშაულებათა სასამართლოში. სახელმწიფო ბრალმდებელი ახმედოვისთვის თავისუფლების 9 წლით აღკვეთას ითხოვდა. საბოლოოდ მოსამართლემ მას თავისუფლების 8 წლით აღკვეთა დაუდგინა. ახმედოვი სასამართლოს დარბაზშივე დააპატიმრეს.

მაშალ ახმედოვმა თავის საბოლოო სიტყვაში განაცხადა, რომ თავად გახდა მაქინაციის მსხვერპლი. “მე და ჩემს მეწყვილეს ირანიდან ქვის ფილები ჩამოგვქონდა, და რაღაც მომენტში ჩვენს შორის საქმიანი შელაპარაკება მოხდა. ჩემმა მეწყვილემ (იუსიფ აზიზოვმა) თავისი ხალხი შეკრიბა და ჩემი დაშანტაჟება დაიწყეს. არ ვიცი, ჩემგან რა უნდათ. მე ცნობილი ადამიანი ვარ და ჩემი დაპატიმრება ვიღაცის ინტერესებს ემსახურება”, – გადმოსცემს ახმედოვის სიტყვებს საინფორმაციო სააგენტო АПА.

მაშალ ახმედოვი ამ საქმესთან დაკავშირებით ჯერ კიდევ 2015 წლის დეკემბრიდან იმყოფება ძიებაში. ახმედოვი დაზარალებულ აზიზოვს, კომპენსაციის სახით, 30 ათას მანათს და ბინას ჰპირდებოდა, თუმცა აზიზოვმა ამ შეთავაზებაზე უარი განაცხადა.

-მაშალ ახმედოვმა 1977 წლიდან 1979 წლამდე ბაქოს “ნეფტჩში” 260 მატჩი ჩაატარა და 64 გოლი გაიტანა. 1986 წელს სსრკ-ს საფეხბურთო ოლიმპიურ ნაკრებში იყო მიწვეული და ერთ თამაშში მიიღო მონაწილეობა.

– 2008 წლიდან “ნეფტჩიდან” თავის ყოფილ პარტნიორ ისკანდერ ჯავადოვთან ერთად აზერბაიჯანის რეგიონულ საფეხბურთო ასოციაციაში მუშაობდა.