სომხეთში სომეხთა გენოციდის 103-ე წლისთავს აღნიშნავენ
დღეს სომხეთში სომეხთა გენოციდის 103-ე წლისთავს აღნიშნავენ.
24 აპრილი სომხეთში გენოციდის მსხვერპლთა ხსოვნის ოფიციალური დღეა. სომხების გენოციდი – 1915 წელს ოსმალეთის იმპერიაში მომხდარი მასობრივი ჟლეტაა. მანამდე ოსმალეთის იმპერიის ტერიტორიაზე დაახლოებით ორმილიონ ნახევარი სომეხი ცხოვრობდა.
მკვლელობების და მასობრივი დეპორტაციის შედეგად მათი ნახევარზე მეტი დაიღუპა. სომხები, რამდენიმე დასავლური ქვეყანა და ორგანიზაციები იმ მოვლენებს ოფიციალურად გენოციდად აღიარებენ. თურქეთი ამგვარ ფორმულირებას კატეგორიულად არ იზიარებს.
დილიდან მსხვერპლთა ხსოვნისადმი მიძღვნილ მემორიალთან მიდიან ადგილობრივი მაცხოვრებლები და უცხოური დიასპორის წარმომადგენელი ათასობით სომეხი, რომლებიც სომხეთში ამ დღეს ყოველწლიურად ჩამოდიან, რათა დაღუპული წინაპრების ხსოვნას პატივი მიაგონ.
დღეს ერევნის მთავარი მოედნიდან მემორიალისკენ დაუმორჩილებლობის მოძრაობის მონაწილეთა კოლონაც დაიძრა. ჯერ კიდევ გუშინ ისინი ქუჩებს კეტავდნენ და პრემიერ-მინისტრის გადადგომას მოითხოვდნენ. 23 აპრილს სერჟ სარგსიანმა მათი მოთხოვნა შეასრულა, და დღეს პროტესტანტების კოლონა მოძრაობის ლიდერ ნიკოლ პაშინიანთან ერთად მემორიალისკენ გაემართა. ისინი ერევნის ქუჩებში ყვავილებით და მდუმარედ მიდიოდნენ – ყოველგვარი ლოზუნგების გარეშე.
დილით, ტრადიციულად, მემორიალთან ყვავილები დააწყვეს ოფიციალურმა პირებმაც – ამჯერად პირველი ვიცე-პრემიერის კარენ კარაპეტიანის მეთაურობით. გადამდგარი პრემიერ-მინისტრი სერჟ სარგსიანი ოფიციალურ პირებს შორის არ იმყოფებოდა.
