სომხეთის საკასაციო სასამართლოს თვმჯდომარე ფულის გასესხებითა და პროცენტების მიღებით იყო დაკავებული

ეთიკის კომისიის მიერ გამოქვეყნებული მაღალი თანამდებობის პირთა დეკლარაციების თანახმად, 2008 წლიდან არმან მკრტუმიანმა, რომელიც სომხეთის საკასაციო სასამართლოს თავმჯდომარის თანამდებობას იკავებს, 185 ათას 790 დოლარის ოდენობის თანხა გაასესხა და ამისთვის   6 მილიონ 815 ათასი დრამის ($ 14.000) ოდენობის პროცენტი მიიღო.

2014 წელს ეს თანხა ($ 185 790) მან მიუთითა როგორც ფულადი სახსრები, თუმცა 2015-2016 წლებში ეს  ფული გაფორმებული იყო როგორც სესხი, რომლის სანაცვლოდაც,  ჩინოვნიკი პროცენტებს იღებდა.

ამავდროულად დეკლარაციაში მითითებულია, რომ მკრტუმიანის ფულადი ქონება გასული წლის დასაწყისში 17 მილიონ დრამს შეადგენდა ($ 33.000), წლის ბოლოს კი 20 მილიონ დრამს ($ 41.000). შემოსავალმა  23 მილიონ 783 ათასი დრამი ($ 49.000) შეადგინა; მათ შორის, 14.000 დაგროვდა იმ პროცენტებით, რომელიც მან გასესხებული თანხის სანაცვლოდ მიიღო, დანარჩენი კი – ხელფასით.

ეთიკის კომისია გვაცნობებს, რომ მკრტუმიანს, ისევე როგორც ბევრ სხვა თანამდებობის პირს, დეკლარაციაში არ შეუტანია მოძრავი და უძრავი ქონება. ხოლო მისმა მეუღლემ – მარინე მკრტუმიანმა, რომელსაც  2015-2016 წლებიდან აღარ უმუშავია, დეკლარაციაში 30 ათასი დოლარის ოდენობის ფულადი სასხრები მიუთითა.