საქართველო რუს დიპლომატს აძევებს

საქართველოს საგარეო საქმეთა სამინისტრომ “მიუღებელ პიროვნებად” გამოაცხადა ერთი რუსი დიპლომატი და მას შვიდდღიანი ვადა მისცა ქვეყნის დასატოვებლად.

ამგვარად თბილისმა “სკრიპალის საქმესთან” დაკავშირებით დიდი ბრიტანეთის მიმართ სოლიდარობა გამოხატა.

„საგარეო საქმეთა სამინისტრო გმობს გაერთიანებული სამეფოს ტერიტორიაზე ქიმიური იარაღის გამოყენების ფაქტს, რამაც გამოიწვია სამი ადამიანის ჯანმრთელობის მძიმე დაზიანება და სერიოზული საფრთხე შეუქმნა სხვა ადამიანების სიცოცხლესა და ჯანმრთელობას. აღნიშნული წარმოადგენს სერიოზულ გამოწვევას საერთო უსაფრთხოებისთვის,” – აღნიშნულია საქართველოს საგარეო საქმეთა სამინისტროს ოფიციალურ განცხადებაში. 

განცხადებაში წერია, რომ  საქართველო უნდა დატოვოს “რუსეთის ინტერესების სექციის” თანამშრომელმა.

2008 წლის ომის შემდეგ საქართველოსა და რუსეთს შორის გაწყვეტილია ყველანაირი დიპლომატიური ურთიერთობები. უკვე მეათე წელია საქართველოში არ ფუნქციონირებს რუსეთის საელჩო.

რუსეთის ვიზებთან და სხვა საკითხებთან დაკავშირებული საჭიროებებისთვის “რუსეთის ინტერესების სექცია” ფუნქციონირებს თბილისში, შვეიცარიის საელჩოში. ამ სექციაში დღეს ათამდე რუსი დიპლომატი მუშაობს. სწორედ მათგან ერთ-ერთს მოუწევს საქართველოს დატოვება.

რუსული დაზვერვის ყოფილი თანამშრომელი სერგეი სკრიპალი და მისი ქალიშვილი ქალაქ სოლსბერიში, სავაჭრო ცენტრში 4 მარტს მოწამლეს. ამჟამად ორივე კომაშია. სერგეი სკრიპალი, რომელიც რუსეთიდან 2010 წელს გაემგზავრა, ბრიტანეთის დაზვერვასთან თანამშრომლობდა.

ბრიტანეთის პრემიერ მინისტრმა ტერეზა მეიმ განაცხადა, რომ დიდი ალბათობით სერგეი სკრიპალი რუსეთის ხელისუფლების დაკვეთით მოწამლეს. ბრიტანეთმა საკუთარი ქვეყნიდან 23 რუსი დიპლომატი გაიწვია და იგივე ნაბიჯისკენ მოუწოდა სხვა ქვეყნებსაც. 

ორშაბათს ევროკავშირის რიგმა ქვეყნებმა, ასევე აშშ-მ, კანადამ, ნორვეგიამ, უკრაინამ და სხვა ქვეყნებმა, სოლსბერიში მომხდარი ინციდენტის გამო, რუსი დიპლომატების გაძევების გადაწყვეტილება მიიღეს. მსოფლიოს სხვადასხვა ქვეყნიდან საერთო ჯამში 150-ზე მეტი რუსი დეპუტატი გააძევეს. 

მოსკოვი უარყოფს რაიმე კავშირს სკრიპალის მოწამვლასთან.

სკრიპალების მოწამვლა პირველი შემთხვევაა მეორე მსოფლიო ომის შემდეგ, რა დროსაც ევროპის ტერიტორიაზე მასობრივი განადგურების იარაღი გამოიყენეს.

სპრიპალები ნერვული აგენტით “ნოვიჩოკით” მოწამლეს. ამ ნივთიერების წარმოება საბჭოთა კავშირში დაიწყეს და შემდეგ რუსეთშიც გააგრძელეს.