„კაბელების საქმეზე“ დაკავებულები ორ თვეში გათავისუფლდებიან

ე.წ. კაბელების საქმეზე დაკავებული თავდაცვის სამინისტროს ყოფილი მაღალჩინოსნები საპატიმროს დაახლოებით ორ თვეში დატოვებენ. სააპელაციო სასამართლოს გადაწყვეტილებით, გაფლანგვის მუხლი, რომლითაც მსჯავრდებულები გასამართლდნენ, გადაკვალიფიცირდა და სამსახურებრივი უფლებამოსილების ბოროტად გამოყენებით შეიცვალა, რის საფუძველზეც მსჯავრდებულებს სასჯელის ვადა შეუმცირდათ.

2014 წლის 28 ოქტომბერს, სამართალდამცველებმა თავდაცვის სამინისტროს ხუთი თანამდებობის პირი სახელმწიფოს კუთვნილი 4 მილიონზე მეტი თანხის გაფლანგვისთვის დააკავეს. თბილისის საქალაქო სასამართლომ აღკვეთის ღონისძიების სახით მათ პატიმრობა შეუფარდა. მათ ბრალად მომსახურების შესყიდვაზე კომპანია “სილქნეტთან” კონტრაქტის უკანონდ გაფორმება ედებოდათ.

დაკავებულებმა ბრალი არ აღიარეს. თავდაცვის სამინისტროს მაღალჩინოსნების დაკავებას იმდროინდელმა თავდაცვის მინისტრმა,პარტია თავისუფალი დემოკრატების ლიდერმა ირაკლი ალასანიამ  პოლიტიკურად მოტივირებულად შეაფასა, რის შემდეგაც პრემიერმა იგი თანამდებობიდან გადააყენა. თავისუფალმა დემოკრატებმა კი მმართველი კოალიცია დატყოვეს და ოპოზიციაში გადავიდნენ.

თავდაცვის სამინისტროს მაღალჩინოსნების დაპატიმრების შემდეგ მინისტრის თანამდებობები დატოვეს საგარეო საქმეთა მინისტრმა მაია ფანჯიკიძემ და სახელმწიფო მინისტრმა ევროინტეგრაციის საკითხებში ალექსი პეტრიაშვილმა.

ბრალდებულები საქალაქო სასამართლომ 2015 წლის 19 ივნისს პარტია თავისუფალი დემოკრატების დეპუტატების თავდებობის საფუძველზე გაათავისუფლა. თუმცა, 2016 წლის 16 მაისს მოსამართლე ბესიკ ბუგიანიშვილმა ხუთივე პირი დამნაშავედ ცნო და 7-7 წლიანი პატიმრობა მიუსაჯა. დაცვის მხარემ აღნიშნული გადაწყვეტილება სააპელაციო სასამართლოში გაასაჩივრა.

2016 წლის 8 ოქტომბრის საპარლამენტო არჩევნების შემდეგ ირაკლი ალასანიამ პოლიტიკიდან წავლის შესახებ განაცხადა. პარტია ასევე მისმა რამდენიმე ლიდერმა დატოვა. ერთ-ერთი მათგანი, ვიქტორ დოლიძე, მოგვიანებით ევრიოინტეგრაციის საკითხებში სახელმწიფო მინისტრად დაინიშნა.