კორონავირუსი საქართველოში: ლაბორატორიიდან პასუხს კიდევ 14 პაციენტი ელოდება

დაავადებათა კონტროლის ცენტრში ბრიფინგზე კორონავირუსთან დაკავშირებით არსებული სიტუაცია შეაჯამეს:

დღეს, ანუ 2 მარტს დილით საავადმყოფოებმა 14-ი ახალი პაციენტი მიიღეს. აქედან ორი ქუთაისშია, ერთი გორში, დანარჩენები კი, თბილისში. მათი სინჯები გაგზავნილია ლუგარის ლაბორატორიაში და პასუხი დღის მეორე ნახევარში იქნება.

სულ ინფექციურ საავადმყოფოებში ამ დროისთვის 40 პაციენტია.

• 2-წუთიანი ვიდეო იმის შესახებ, თუ როგორ უნდა დავიცვათ თავი კორონავირუსისგან

• კორონავირუსი: როგორი სურათია მსოფლიოში 2 მარტის დილით. ძირითადი ფაქტები და რიცხვები

იანვარ-თებერვალში, მსოფლიოში კორონავირუსის გავრცელების დროიდან დღემდე სულ საქართველოში, ლუგარის ლაბორატორიაში გამოკვლეულია 171 შესაძლო შემთხვევა. აქედან მხოლოდ სამს დაუდასტურდა კორონავირუსი.

ამ სამიდან ერთი იტალიიდან ჩამოსული 31 წლის ქალია, ორნი კი – ირანიდან (ისინი ერთად მოგზაურობდნენ). ქვეყნის შიგნით გადადების ფაქტი არ დაფიქსირებულა.

სამივე პაციენტი თავს გრძნობს კარგად. ისინი თბილისის ინფექციური საავადმყოფოს ბოქსირებულ პალატებში მკურნალობენ.

კარანტინულ იზოლაციაში ამ დროისთვის 97 ადამიანია. სულ ქვეყნის მასშტაბით ხუთი საიზოლაციო სივრცეა.

როგორც დაავადებათა კონტროლის ცენტრის ხელმძღვანელი ამირან გამყრელიძე ამბობს, ქვეყანაში მზადყოფნის რეჟიმი გაგრძელებულია. არ მუშაობს სკოლები – საგაზაფხულო არდადეგები ადრე – 2 მარტს დაიწყო და 16 მარტამდე გასტანს. ამ პერიოდის განმავლობაში სკოლებსა და ბაღებში სადეზინფექციო სამუშაოები ჩატარდება.

ასევე, მედიკოსების მოწოდების შესაბამისად, 16 მარტამდე შეაჩერეს მუშაობა თეატრებმა და კინოთეატრებმა.

ასევე მიმდინარეობს საჯარო ადგილების დეზინფექცია – საზოგადოებრივი ტრანსპორტის, ქუჩების და მიწისქვეშა გადასასვლელების.

დაავადებათა კონტროლის ცენტრის მთავარი რეკომენდაციები ასეთია:

• თავი ავარიდოთ ხალხმრავალ და საზოგადოებრივი თავშეყრის ადგილებს;

• თავი ავარიდოთ ზოგადად მოგზაურობას (თუ აუცილებლობა არ არის), ხოლო განსაკუთრებით მაღალი ინფიცირების ზონებში  – სამხრეთ კორეაში, ჩინეთში, ირანში და იტალიაში. ეს არის აკრძალვა, ეს არის რეკომენდაცია, დააკონკრეტა გამყრელიძემ;

• ის ადამიანები, რომლებიც ზემოთჩამოთვლილი ქვეყნებიდან უახლოესი ორი კვირის განმავლობაში ჩამოვიდნენ უნდა იყვნენ ან კარანტინში ან თვითიზოლაციაში. გამყრელიძის თქმით, აეროპორტებში ყველა მგზავრი მოწმდება  –  სიმპტომების შემთხვევაში მათ გადაიყვანენ ან ინფექციურ საავადმყოფოში ან საკარანტინო სივრცეში. ხოლო მათ, ვისაც სიმპტომები არ აქვთ, ურჩევენ თვითიზოლაციას. ასევე ამირან გამყრელიძე მოუწოდებს მოქალაქეებს, გამოიჩინონ კეთილგონიერება და საზღვარზე შემოსვლის დროს არ მიიღონ სიცხის დამწევი პრეპარატები (გამყრელიძე ამბობს, რომ ზოგი ასე იქცევა, რათა კარანტინში არ მოხვდეს).

• მეოთხე მთავარი რეკომენდაციაა პირადი ჰიგიენის დაცვა – განსაკუთრებით, ხშირად ხელების დაბანა.