სომხეთის ექს-პრეზიდენტი რობერტ კოჩარიანი პატიმრობის შემდეგ პოლიტიკაში ბრუნდება

მან ისევ განაცხადა, რომ მის წინააღმდეგ ბრალდება შეთითხნილია და რომ ის მზადაა პრემიერ ნიკოლ ფაშინიანთან შესახვედრად

სომხეთის მეორე პრეზიდენტმა, რობერტ კოჩარიანმა, რომელიც რამდენიმე დღის წინ პატიმრობიდან გაათავისუფლეს, დიდ პოლიტიკაში დაბრუნების შესახებ განაცხადა.

„ჩათვალეთ, რომ მე დავბრუნდი (პოლიტიკაში) ერთმნიშვნელოვნად. ეს სხვადასხვა ფორმატით არის შესაძლებელი. შემიძლია იმ მიზეზების შესახებ გიამბოთ, რამაც პოლიტიკაში დაბრუნებისკენ მიბიძგა.

ორი მიზეზია.

პირველი – ეს არის ის გეოპოლიტიკური საფრთხეები, რასაც დღეს ვხედავ. უბრალოდ, რუკას დახედეთ და ნახეთ, რა ქვეყნების გარემოცვაში ვართ და როგორი ურთიერთობები გვაქვს მათთან. დღესდღეობით რუსეთ-ამერიკის ურთიერთობა „ცივი ომის“ შემდეგ ყველზე დაძაბულია. ახალი სანქციები. ამერიკა-ირანის ურთიერთობაში არსებული მდგომარეობა.

და შეხედეთ თურქეთს. ეს სულ სხვა სახელმწიფოა, ვიდრე 10 წლის წინათ იყო. ისინი ევროკავშირისკენ მიისწრაფოდნენ და სწორედ ეს ზღუდავდა მათ აგრესიული პოლიტიკის გატარებისა და მეზობლების შინაურ საქმეებში ჩარევის თვალსაზრისით. ვიცით თურქეთისა და აზერბაიჯანის ურთიერთობებისა, და ყარაბაღის გადაუწყვეტელი კონფლიქტის შესახებაც.

და შეეცადეთ, რომ ეს ყველაფერი ერთმანეთთან დააკავშიროთ… ჩვენ გვყავს მთავრობა, რომელსაც, ჩემი აზრით, ეს ყველაფერი არ ესმის. რომელსაც არ აქვს გამოცდილება. რომელსაც არ ესმის, რომ ამ სიტუაციაში ჩვენი სახელმწიფოებრიობისათვის ნამდვილ გარანტიას მხოლოდ მძლავრი ჯარი წარმოადგენს“.

რობერტ კოჩარიანი სომხეთის პრეზიდენტი 1998-2008 წლებში იყო, მისი დაპატიმრება 2008 წლის 1-2 მარტის მოვლენებს უკავშირდება. 2008 წლის 19 თებერვლის საპრეზიდენტო არჩევნების შემდეგ ქვეყანაში მღელვარება დაიწყო – იმ პოლიტიკური ბლოკის მომხრეები, რომელსაც ქვეყნის პირველი პრეზიდენტი ლევონ ტერ-პეტროსიანი ედგა სათავეში, ირწმუნებოდნენ, რომ არჩევნებში ტერ-პეტროსიანმა გაიმარჯვა, და არჩევნების შედეგების გადახედვას ითხოვდნენ.

 

ცენტრალურმა საარჩევნო კომისიამ, კენჭისყრის შედეგების მიხედვით, გამარჯვებულად უკვე სერჟ სარგსიანი გამოაცხადა, თუმცა მას იმ მომენტისთვის თანამდებობრივი უფლებამოსილების აღსრულება ჯერ დაწყებული არ ჰქონდა – ქვეყნის პრეზიდენტი ჯერ ისევ რობერ კოჩარიანი იყო. მან საგანგებო მდგომარეობა შემოიღო. 2008 წლის 1 მარტს დემონსტრაციის დარბევის დროს გამოყენებული იყო საბრძოლო იარაღი, დაიღუპა 10 ადამიანი – რვა სამოქალაქო პირი და პოლიციის ორი თანამშრომელი.

რობერტ კოჩარიანმა ასევე განაცხადა, რომ ის სომხურ-რუსული ურთიერთობებით და სომხეთის ხელისუფლების ოფიციალური მოსკოვის მიმართ რიტორიკითაც შეშფოთებულია.

„რუსეთი – ეს ის ქვეყანა არ არის, რომელთანაც იმ ენით შეიძლება ლაპარაკი, რა ენაზეც დღეს სომხეთის ხელისუფლება საუბრობს. ის ჩვენი სტრატეგიული პარტნიორია, რომელთან თანამშრომლობაც ჩვენი უსაფრთხოებისთვის ძალიან მნიშვნელოვანია“.

რობერტ კოჩარიანმა კიდევ ერთხელ განაცხადა, რომ დღევანდელმა მთავრობამ მის წინააღმდეგ სისხლის სამართლის საქმე შეთითხნა. მას მიაჩნია, რომ მისი შემთხვევა – ეს პოლიტიკური ოპონენტების თავიდან მოშორების მცდელობაა. კოჩარიანს სასამართლოს მიერ მისი გათავისუფლების გადაწყვეტილება თავისი ადვოკატების გამარჯვებად მიაჩნია.

„ეს ის შემთხვევა არ არის, როდესაც იმის თქმა შეიძლება, რომ ბრალდების ესა თუ ის ნაწილი სუსტია ან ძლიერი. ყველა ბრალდება ყალბ, ფალსიფიცირებულ, ხელოვნურ მტკიცებულებებსა და დასკვნებს ეფუძნებოდა“.

კოჩარიანმა მოუწოდა, რომ სასამართლო განხილვა საჯარო გახადონ და საზოგადოებას შესაძლებლობა მისცენ სისიხლის სამართლის ამ საქმის დეტალებს გაეცნოს.

„საშუალება მიეცით დაცვის მხარეს, რომ საქმესთან დაკავშირებულ ყველა საკითხზე საჯაროდ ისაუბროს. დაინახავთ, რომ მთელი ეს საქმე ხელოვნურია, ეს პოლიტიკური დევნის კლასიკური მოდელია“.

ექს-პრეზიდენტმა ასევე განაცხადა, რომ მზადაა, პრემიერ-მინისტრ ნიკოლ ფაშინიანს შეხვდეს:

„რასაკვირველია, მზად ვარ მას შევხვდე. მოლაპარაკებებს არასდროს გავურბოდი, ყოველთვის მზად ვიყავი მოსალაპარაკებლად“.


ასევე წაიკითხეთ