რატომ ითხოვს ავსტრიის მედია და ოპოზიცია საგარეო საქმეთა მინისტრის გადადგომას" />

ფოტო, ვიდეო და პოლიტიკური კონტექსტი პუტინის ავსტრიული ვოიაჟიდან

რატომ ითხოვს ავსტრიის მედია და ოპოზიცია საგარეო საქმეთა მინისტრის გადადგომას

ავსტრიის საგარეო საქმეთა მინისტრი კარინ კნაისლი დაქორწინდა. ეს ცერემონია ახალ ამბად მასში რუსეთის პრეზიდენტის, ვლადიმირ პუტინის მონაწილეობის წყალობით იქცა.

საქორწინო საჩუქრის სახით, პუტინმა კაზაკების მომღერალთა გუნდი ჩაიყვანა, რომელმაც ახალდაქორწინებულთათვის ტრადიციული საქორწინო სიმღერა შეასრულა. ვლადიმირ პუტინმა და კარინ კნაისლმა “ნელი ცეკვა” შესარულეს.

პუტინის ავსტრიელი მინისტრისათვის მირთმეული საჩუქარი გადასახადების რუს გადამხდელებს 20 ათასი დოლარი დაუჯდათ, – იუწყება ВВС.

გადასახადების ავსტრიელ გადამხდელებს კი, უსაფთრთხოების ზომების გამო, ეს ვიზიტი ბევრად მეტი —  რამდენიმე ასული ათასი ევრო დაუჯდა. მიუხედავად იმისა, რომ პუტინის ქორწილში ჩასვლა კერძო ვიზიტად იყო წარმოდგენილი.

ავსტრიული მედია მინისტრის გადადგომას მოითხოვს.

ავსტრიის საგრეო საქმეთა მინისტრი საკუთარ ქორწილში რუსეთის პრეზიდენტთან ცეკვავს. 2018 წლის 18 აგვისტო. ფოტო: Roland Schlager/Pool via Reuters

კარინ კნაისლისა და ვლადიმირ პუტინის ურთიერთობები

კარინ კნაისლი ავსტრიის საგარეო საქმეთა მინისტრი 2018 წელს გახდა. მას არაერთხელ გამოუთქვამს მოსაზრება ევროპასა და რუსეთს შორის დიალოგის გამართვის აუცილებლობაზე.

ავსტრიის ხელისუფლება ბოლო წლებში, ევროკავშირის წევრ სხვა ქვეყნებთან შედარებით, რუსეთის ქმედებებთან დაკავშირებით ზომიერ პოზიციას იკავებდა. მთავრობის ახალი შემადგენლობის დამტკიცების შემდეგ, ვენიდან უფრო და უფრო ხშირად გაისმოდა წინადადებები მოსკოვთან ურთიერთობის დათბობის თაობაზე.

ავსტრია ევროკავშირის ერთადერთი დიდი ქვეყანაა, რომელსაც სოლსბერიში „გრუ“-ს ყოფილი პოლკოვნიკის სერგეი სკრიპალისა და მისი ქალიშვილის მოწამვლვის შემდეგ რუსი დიპლომატები არ გამოუძევებია.

„რთულ პერიოდებში დიალოგის წარმართვა აუცილებელია“, – განაცხადა მაშინ კნაისლმა.

2018 წლის მარტში მინისტრმა განაცხადა, რომ ავსტრია მზადაა, ლონდონსა და მოსკოვს შორის შუამავლობა ითავოს.

თავის მხრივ, ვლადიმირ პუტინიც არ თანხმდება ყველა დღესასწაულზე მიწვევას. მაგალითად, ორი წლის წინ ის არ დაესწრო თავისი პრეს-მდივნის, დმიტრი პესკოვის და ფიგურული მოსრიალე ტატიანა ნავიკის ქორწილს.

ავსტრიის საგარეო საქმეთა მინისტრი და კაზაკების მომღერალთა გუნდინ ჰამლიცში გამართულ ქორწილზე. 2018 წლის 18 აგვისტო. ფოტო: Roland Schlager/Pool via Reuters

ბუნებრივი აირი – როგორც პუტინის ავსტრიაში ქორწილზე გამგზავრების მიზეზი?

რუსეთის პრეზიდენტის ავსტრიაში მოულოდნელი და ეგზოტიკური გამოჩენა პირველ რიგში იმას უკავშირდება, რომ  ამ ქვეყანაში თავმოყრილია ბუნებრივი აირის ინფრასტრუქტურის უმნიშვნელოვანესი ობიექტები, რომელთა მეშვეობითაც რუსული ბუნებრივი აირის ევროპისთვის მიწოდება ხორციელდება. ეს დღის წესრიგი რუსეთისთვის ახლა, აშშ-ს მხრიდან დაწესებული მკაცრი ეკონომიკური სანქციების ფონზე, საკვანძო ხდება.

რეაქცია ავსტრიაში პუტინის კაზაკების მომღერალთა გუნდთან ერთად ჩასვლაზე

ავსტრიის რამდენიმე წამყვანმა გაზეთმა ერთდროულად დაწერა, რომ ავსტრიის საგარეო საქმეთა სამინისტროს ახლა „მუხლჩაუხრელად მოუწევს შრომა“, რათა კრიტიკა მოიგერიოს და პრესა იმაში დაარწმუნოს, რომ ვენის საგარეო პოლიტიკური პოზიცია არ შეიცვლება.

ავსტრიის საგარეო საქმეთა სამინისტრომ საპასუხო განცხადება გააკეთა და ირწმუნებოდა, რომ ეს „მისი დღესასწაული და კერძო ვიზიტი“ იყო, და „აქედან ავსტრიის საგარეო პოლიტიკური კურსის არანაირი ცვლილება არ გამომდინარეობს“.

მიუხედავად ამისა, ევროპარლამენტის დეპუტატმა „მწვანეთა“ პარტიიდან მიხეილ რაიმონმა კნაისლს, პუტინის დაპატიჟების გამო, უკვე მოსთხოვა გადადგომა. იგივე მოთხოვნა რამდენიმე ადგილობრივ გამოცემაშიც გაისმა.

საქორწინო ცერემონია და ვლადიმირ პუტინი. 2018 წლის 18 გვისტო. ფოტო: Alexei Druzhinin/Kremlin via REUTERS

ყუბანელი კაზაკების სასიმღერო გუნდის შესახებ

ყუბანელი კაზაკების მომღერალთა გუნდი რეგულარულად გამოდის რუსეთში ღონისძიებებზე და ხშირად იღებს სხვადასხვა საპრეზიდენტო გრანტს კულტურის სფეროში. გუნდის ძირითადი მხარდამჭერია რუსი ოლიგარქის, ოლეგ დერიპასკას (ბიზნესმენი კრასნოდარის მხარეში გაიზარდა) კომპანიების ჯგუფი.

გუნდის სამხატვრო ხელმძღვანელი ვიქტორ ზახარჩენკო 2018 წლის საპრეზიდენტო არჩევნებში ვლადიმირ პუტინის საზოგადოებრივი მხარდაჭერის კრასნოდარის შტაბის თანათავმჯდომარედ მუშაობდა.

გუნდი „კოლექტიური ელჩი“ იყო 2018 წლის ფეხბურთის მსოფლიო ჩემპიონატზე და ტურნირის პირველ დღეს სოჭში, ფიფას გულშემატკივართა ფესტივალზე გამოდიოდა.

ყუბენალი კაზაკების მომღერალთა გუნდი ავსტრიის საგარეო საქმეთა მინისტრის ქორწილში

Facebook Comments

ასევე წაიკითხეთ