როგორ აფასებენ ზუგდიდის მოვლენებს პოლიტიკოსები და ექსპერტები

მესამე დღეა ეძებენ მძარცველს, რომელიც ზუგდიდში, “საქართველოს ბანკს” თავს დაესხა, მძევლები აიყვანა და სავარაუდოდ ნახევარი მილიონი დოლარით ქვეყნის კონტროლირებადი ტერიტორია დატოვა.

მძევლების გათავისუფლება მსხვერპლის გარეშე დასრულდა. სწორედ ამიტომ, ხელისუფლება ამ ოპერაციას საკუთარ წარმატებად თვლის, ხოლო ოპოზიციაში ფიქრობენ, რომ ეს იყო ჩაფლავებული ოპერაცია, რომელიც წამახალისებელი იქნება სხვა დანაშაულებისთვის.

ასე ფიქრობს ექსპერტების ნაწილიც.

● როგორ ვითარდებოდა მოვლენები ზუგდიდში – “საქართველოს ბანკზე” თავდასხმის ქრონიკა

● გომელაურის თქმით, ზუგდიდის ბანკის მძარცველს ბანკის კუთვნილი თანხა მისცეს და არა ბიუჯეტის

თინა ხიდაშელი, თავდაცვის ყოფილი მინისტრი

უამრავი პრეტენზია მაქვს ოპერაციის მიმდინარეობასთან დაკავშირებით, დაწყებული ნულოვანი კომუნიკაციის მდგომარეობიდან, დამთავრებული იმით, რომ მართლა ამ ერთმა კალაშნიკოვიანმა კაცმა აჯობა მთელ სახელმწიფო სისტემას, როგორ დაეკარგათ, ეს უბრალოდ, მართლა წარმოუდგენელია, ყველაზე ცუდი და მდაბიო რეჟისურის ფილმებშიც კი ვერ წარმომიდგენია ასეთი რამ მოხდეს, ამაზე მოუწევს აუცილებლად პასუხის გაცემა საქართველოს ხელისუფლებას.

მათ მიუხედავად ამისა, ჯერ კიდევ აქვთ რამოდენიმედღიანი შანსი დარჩენილი იმისათვის, რომ დაამტკიცონ, რომ უნარი აქვთ გაუმკლავდნენ კრიზისულ მდგომარეობას.

მე ჯერჯერობით არანაირ დასკვნას არ გავაკეთებ, მე შს მინისტრს მივყვები ამაში, როცა ის ამბობს, რომ ჯერ სპეცოპერაცია არ დასრულებულა, მაგრამ სპეცოპერაციის პირველი ფაზა იყო აბსოლუტურად წარუმატებელი.

ხათუნა ლაგაზიძე, პოლიტოლოგი

ხელისუფლების განზრახვა იყო ზუგდიდში მომხდარი ფაქტის ავტორად ოპოზიციის გამოყვანა, თუმცა ეს სპეცოპერაცია ჩავარდა.

არჩევნებამდე 9 დღით ადრე საბოლოოდ გახდა ნათელი საქართველოს თითოეული მოქალაქისათვის ამ ხელისუფლების არაკვალიფიციურობა, არაპროფესიონალიზმი და უხერხემლობა, რაც უნდა გახდეს საფუძველი მათი ხელისუფლებიდან წასვლის 31 ოქტომბერს.

არანაკლებ მძიმე მიზეზი არის ის, რომ პარალელურ რეჟიმში მიმდინარეობდა ორი სპეცოპერაცია – ერთი თავდამსხმელის თუ ტერორისტის განეიტრალება-დაკავების და მეორე სპეცოპერაცია მიმდინარეობდა „ფეისბუქის“ გვერდებზე „ქართული ოცნების“ მომხრეების, ბოტებისა და ტროლების ჩათვლით და მისი სატელიტი პარტიების, რომელიც მიზნად ისახავდა თავდასხმის ავტორად საქართველოს ოპოზიციის გამოყვანას და საბედნიეროდ, ეს სპეცოპერაცია ჩავარდა – ჩავარდა იმიტომ, რომ დროზე აეხადა ფარდა „ქართული ოცნების“ ტვინცხელი ნაწილის ზრახვებს.

სპეცოპერაცია ჩაშალა საზოგადოებამ იმიტომ, რომ „ქართული ოცნებისთვის“ ჩვეული სიბრიყვით იყო ეს შავი თეთრზე ნაკერი“

გია ვოლსკი, ქართული ოცნება – პარლამენტის პირველი ვიცე-სპიკერი

შეიძლებოდა არ გაქცეულიყო რასაკვირველია, ამ ოპერაციის ჩატარდება არ წარმოდგენს პრობლემას, მაგრამ რეალურად საფრთხის წინაშე დადგებოდა მოქალაქე, მძევალი, შეიძლება სხვა ვინმეც, ვინც გარშემო იმყოფებოდა და რასაკვირველია ეს დიდ დივიდენდს მოუტანდა იმ პოლიტიკურ პარტიას, რომელიც ძირითადად ამ კითხვას სვამს – რამდენად სწორად იმოქმედა პოლიციამ? პოლიციამ იმოქმედა სწორად, პოლიციის ხელმძღვანელმა ვახტანგ გომელაურმა იმოქმედა სწორად და იყო მოწოდების სიმაღლეზე.

უამრავი პოლიტიკური სვავი ხეზე შემომჯდარი ელოდება, როდის დაიღვრება სისხლი, რომ დაეწაფოს.

გიგი უგულავა, “ევროპული საქართველოს” ერთ-ერთი ლიდერი

თუ ტერორისტი მიიღებს იმას, რაც სურს, ეს არის მსგავსი ქმედებებისთვის „მწვანე შუქის“ ანთება – სპეცოპერაციის წარმატებაზე საუბარი არის უსინდისობა.

თავისთავად ის, რომ ყველა მძევალი თავისუფალია, ეს უკვე კარგია, მაგრამ ხელისუფლების მხრიდან ვხედავთ ტრაბახს, გრძელვადიანი გეგმების დასახვას, თითქოს გამარჯვებას ზეიმობენ… როცა სპეცოპერაციაზე ვსაუბრობთ, ის მაშინ არის წარმატებული, როცა მძევლები უვნებლად გადარჩებიან და დამნაშავე არის დაპატიმრებული

მიხეილ სააკაშვილი, საქართველოს მესამე პრეზიდენტი

სახელმწიფო პრაქტიკულად გაანადგურეს – საქართველოში არის ბიუჯეტის ქურდებისა და კრიმინალების ჰიბრიდი.

რა იყო ის, რაც ჩვენ გუშინ ვნახეთ? ასეთი რამ, არამხოლოდ საქართველოში არ იყო არასდროს წარმოსადგენი, შევარდნაძის დროსაც კი, ჩვენ დროს აღარ ვსაუბრობ, ასეთი რამ შეუძლებელია ოდნავ მაინც ორგანიზებულ სახელმწიფოში ნებისმიერ სხვა ქვეყანაში.

საქმეც ისაა, რომ საქართველოს სახელმწიფო პრაქტიკულად გაანადგურეს და გუშინ ჩვენ ამაში დავრწმუნდით.

რითი არიან დაკავებულები პოლიციის თანამშრომლები და სუს-ი? იმის მაგივრად, რომ მოქალაქეების უსაფრთხოება დაიცვან, ივანიშვილის დავალებით სხედან შტაბებში, წინ უდევთ სიები, მოქალაქეების, ბიზნესმენების და დაკავებულები არიან შანტაჟით, დაშინებით, მოსყიდვით”

გია ხუხაშვილი, ექსპერტი

მწარე სიმართლე ერთია – კრიმინალმა დაგეგმა და განახორციელა ოპერაცია, რომელთანაც სახელმწიფო უსუსური აღმოჩნდა.