ვაიმარის სამკუთხედის წევრი ქვეყნები: მოვუწოდებთ საქართველოს მთავრობას, შეცვალოს თავისი ქმედებები
ვაიმარის სამკუთხედის განცხადება
ვაიმარის სამკუთხედის წევრმა ქვეყნებმა, გერმანიის, საფრანგეთისა და პოლონეთის საგარეო საქმეთა მინისტრებმა საქართველოს შესახებ ერთობლივი განცხადება გამოაქვეყნეს, რომელშიც მოუწოდებენ საქართველოს მთავრობას, შეცვალოს თავისი ქმედებები.
განცხადების თანახმად, სამივე ქვეყნის საგარეო საქმეთა მინისტრები საქართველოს მთავრობას მიმდინარე ქმედებების კურსის ცვლილებისკენ მოუწოდებენ. მინისტრების თქმით, ევროკავშირისა და საქართველოს თანამშრომლობა საფრთხის ქვეშ დგას.
ამასთან, მინისტრებმა ქართველი ხალხის აბსოლუტური უმრავლესობის დემოკრატიული და ევროპული მისწრაფებების მიმართ თავის მხარდაჭერას და გვერდში დგომას კიდევ ერთხელ ხაზი გაუსვეს.
განცხადებაში ასევე ხაზი გაესვა მომავალი საპარლამენტო არჩევნების თავისუფალი და სამართლიანი ჩატარების მნიშვნელობას.
ვაიმარის სამკუთხედის წევრი ქვეყნების განცხადება
“ჩვენ ვწუხვართ საქართველოს მთავრობის იმ ქმედებების გამო, რომლებმაც, როგორც 27 წევრი სახელმწიფოსა თუ მთავრობის მეთაურების წარმომადგენელმა ევროსაბჭომ 27 ივნისს გამოაცხადა, საქართველოს ევროკავშირში გაწევრიანების პროცესი დე ფაქტოდ შეაჩერა.
ნეგატიური ტენდენცია მას შემდეგ მხოლოდ გაუარესდა რეპრესიების შემაშფოთებელი მუქარით, ე. წ. “გამჭვირვალობის კანონის” ძალაში შესვლით, რომელიც სტიგმას ადებს იმ არასამთავრობო ორგანიზაციებს, რომლებიც დაფინანსების 20%-ზე მეტს უცხოეთიდან იღებენ და მათ უცხო ძალების ინტერესების გამტარ ორგანიზაციებს არქმევს, ახლახან მიღებული საკანონმდებლო ცვლილებებით, რომლებიც ზღუდავს LGBT+ ადამიანების უფლებებს, ასევე თავდასხმებით სამოქალაქო საზოგადოების ორგანიზაციებსა და დამოუკიდებელ ჟურნალისტებზე.
ამასთან ერთად, ჩვენ სულ უფრო დიდი შეშფოთებით ვამჩნევთ ევროკავშირისა და მისი წევრი ქვეყნების მიმართ აგრესიული რიტორიკის გაძლიერებას. ევროკავშირი არ მოითმენს საქართველოს ხელისუფლების წარმომადგენლების მხრიდან ევროპული პოზიციებისა და პოლიტიკის შესახებ ცრუ ნარატივების გავრცელებას.
ჩვენ მოველით საქართველოს ხელისუფლებისგან, რომ უზრუნველყოფს მოახლოებული არჩევნების სამართლიან და თავისუფალ ჩატარებას და ეუთო/ODIHR-ის რეკომენდაციების დაცვას, განსაკუთრებით, რაც შეეხება საარჩევნო კამპანიის თავისუფლად და უსაფრთხოდ წარმართვის შესაძლებლობას.
ჩვენ მზად ვართ გავაგრძელოთ ევროპული მომავლისკენ მიმავალ გზაზე ქართული საზოგადოების მხარდაჭერა. ჩვენ ვაგრძელებთ საქართველოს სუვერენიტეტისა და ტერიტორიული მთლიანობის განმტკიცებასა და მხარდაჭერას მის საერთაშორისოდ აღიარებულ საზღვრებში”. – წერენ პოლონეთის, გერმანიისა და საფრანგეთის საგარეო საქმეთა მინისტრები.
