ბოლო რამდენიმე წლის განმავლობაში თბილისის შემოგარენში მიწის ნაკვეთებზე მოთხოვნა მნიშვნელოვნად გაიზარდა. ამის შესახებ TBC კაპიტალის მიერ გამოქვეყნებული ახალი კვლევიდან ვიგებთ.
კვლევის მიხედვით, 2021 წელს თბილისის შემოგარენში მიწის გაყიდვების 39%-იანი ზრდა დაფიქსირდა, რაც ძირითადად პანდემიის გამო მომხმარებლის ქცევის ცვლილებით იყო გამოწვეული. 2023 წლის პირველ 6 თვეში მიწის ნაკვეთის ყველაზე მეტი ტრანზაქცია დაფიქსირდა ლისზე, ხოლო შემდეგ კი – საგურამოში
რაც შეეხება ფასების ყველაზე მაღალ დონეს, მიმდინარეწლის პირველ 6 თვეში მიწა ყველაზე ძვირი წყნეთში ღირდა, სადაც კვადრატული მეტრის ფასმა $228-ს მიაღწია. წყნეთის შემდეგ ყველაზე ძვირი მიწის ნაკვეთი ოქროყანასა ($177) და თხინვალაში ($110) ღირდა.
2023 წლის იანვარ-ივნისში თბილისის შემოგარენში იმ მიწის ნაკვეთის გასაყიდი საშუალო ფასი, რომლის ფართობი 2 000 კვადრატულ მეტრზე ნაკლებია:
ლისი – $86/კვ.მ;
საგურამო – $65 /კვ.მ;
ტაბახმელა – $68/კვ.მ;
წყნეთი – $220/კვ.მ;
კოჯორი – $71/კვ.მ;
წავკისი – $102/კვ.მ.
TBC კაპიტალის მიხედვით, თბილისის შემოგარენში გაცემული ინდივიდუალური სახლების მშენებლობის ნებართვები უძრავი ქონების ბაზარზე არსებულ ტენდენციებს მიჰყვება.
2019 წლიდან 2023 წლის ივნისის ჩათვლით, ყველაზე მეტ საცხოვრებელ ფართობზე სამშენებლო ნებართვა გაცემულია წავკისში (27%), წყნეთსა (18%) და ტაბახმელაში (13%).
აღსანიშნავია, რომ სტატისტიკის ეროვნული სამსახურის ინფორმაციით, 2023 წლის მეორე კვარტალში, წინა კვარტალთან შედარებით, თბილისში საცხოვრებელი უძრავი ქონების ფასების ინდექსი 3.0 პროცენტით გაიზარდა, ხოლო ინდექსის წლიურმა ზრდამ 13.1 პროცენტი შეადგინა.
2022 წლის მეორე კვარტალთან შედარებით ფასების ზრდა დაფიქსირდა ორივე სეგმენტში: ბინებზე 10.6 პროცენტით, ხოლო კერძო სახლებზე – 16.2 პროცენტით.
საცხოვრებელი უძრავი ქონების ფასების ინდექსის [RPPI] გამოსაანგარიშებლად საქსტატი საჭირო მიკრომონაცემებს აგროვებს საცხოვრებელი უძრავი ქონების გაყიდვის შესახებ განცხადებების შემცველი ვებ-გვერდებიდან.
