სასამართლომ სომხეთის ექსპრეზიდენტის სიძის დაპატიმრების გადაწყვეტილება მიიღო
6 მაისს, სომხეთის სასამართლომ ექსპრეზიდენტ სერჟ სარგსიანის სიძის, ვატიკანში სომხეთის ყოფილი ელჩის, მიკაელ მინასიანის დაპატიმრების გადაწყვეტილება მიიღო.
მინასიანს ბრალად ედება უკანონო გამდიდრება, შემოსავლების შესახებ ყალბი ინფორმაციის დეკლარირება და დანაშაულებრივი გზით მოპოვებული ქონების ლეგალიზაცია.
ის ყოფილი პრეზიდენტის გარემოცვიდან პირველი ადამიანი არ არის, რომელსაც კანონთან შეექმნა პრობლემები.
სისხლის სამართლის საქმე არის აღძრული მისი ძმებისა და ბიძაშვილების, ასევე, მისი მამის წინააღმდეგ.
თავად სერჟ სარგსიანს ბრალად ედება მილიონ დოლარზე მეტი ოდენობით საბიუჯეტო სახსრების გაფლანგვა.
მიკაელ მინასიანის წინააღმდეგ სისხლის სამართლის საქმე ჯერ კიდევ 2020 წლის მარტში აღიძრა და მაშინვე გამოცხადდა მასზე ძებნა. არის ვარაუდი, რომ ის იტალიაში იმყოფება.
მინასიანის ადვოკატმა, მიგრან პოღოსიანმა მისი დაცვის ქვეშ მყოფის დაპატიმრების შესახებ სასამართლოს მიერ მიღებულ გადაწყვეტილებას „აბსურდული და ცინიკური“ უწოდა. მისი აზრით, დოკუმენტში „არავითარი მინიშნება არ არის დაცვის მხარის მიერ წარდგენილი არგუმენტების გაანალიზებაზე“.
ბოლო დღეებში, ექსპრეზიდენტის სიძე Facebook-ის საკუთარ გვერდზე სომხეთის მოქალაქეებისადმი ვიდეომიმართვებს აქვეყნებს. საშინაო გარემოდან, სადღაც უცხოეთიდან, ის ხელისუფლების მიმართ მკაცრი კრიტიკით გამოდის და სამშობლოს წინაშე საკუთარ დამსახურებებზე საუბრობს.
რას ამბობს მიკაელ მინასიანი
ექსპრეზიდენტის სიძე ამტკიცებს, რომ მოქმედი ხელისუფლება პოლიტიკიდან მის ჩამოშორებასა და დარწმუნებას ცდილობდა – არ დაბრუნებულიყო სამშობლოში – მის წინააღმდეგ სისხლისსამართლებრივი დევნის შეწყვეტის სანაცვლოდ.
მინასიანმა განაცხადა, რომ მას ამ თემაზე სასაუბროდ, პრემიერ-მინისტრ ნიკოლ ფაშინიანის სახელით, ეროვნული უსაფრთხოების სამსახურის ყოფილი ხელმძღვანელი შეხვდა. თუმცა, მან უარი განაცხადა ამ შეთავაზებაზე, რადგან არ შეუძლია „კარგი დამოკიდებულება ჰქონდეს მატყუარა და უპასუხისმგებლო ადამიანების, სამშობლოს მოღალატეებისადმი“.
ამ განცხადებაზე რეაგირება მოახდინა ეროვნული უსაფრთხოების ყოფილი უფროსის, არტურ ვანეციანის პრესმდივანმა. კრისტინა მელქონიანმა ყველას მოუწოდა, გაეხსენებინათ არტურ ვანეციანის ინტერვიუ, რომლშიც მან მიკაელ მინასიანის მიმართ საკუთარი დამოკიდებულება დააფიქსირა.
„მოდი, ნურავინ შეეცდება ჩემს დაკავშირებას მიკაელ მინასიანთან, რადგან ჩემთვის ეს არის ადამიანი, რომელმაც ჯერ კიდევ პასუხი უნდა გასცეს სომხეთის რესპუბლიკის კანონის წინაშე არსებულ კითხვებს“, – განაცხადა ვანეციანმა 2019 წლის სექტემბერში, თანამდებობიდან გადადგომის შემდეგ.
პრემიერ-მინისტრის პრესსამსახურს მიკაელ მინასიანის განცხადებებზე, ჯერჯერობით, არანაირი კომენტარი არ გაუკეთებია.
მინასიანმა ასევე აღნიშნა, რომ სომხეთში არ ბრუნდება, რადგან ქვეყნის პრემიერ-მინისტრმა „უკვე დიდი ხანია მიიღო მისი დაპატიმრების გადაწყვეტილება“.
„მაგრამ, ერთ დღეს, აუცილებლად დავბრუნდები“, – ამბობს მინასიანი.
მან პირობა დადო, რომ შემდეგი გამოსვლებისას იმ შეცდომებს გაარჩევდა, რომელიც სერჟ სარგსიანის პრეზიდენტობისას დაუშვეს.
![](https://jam-news.net/app/uploads/2020/05/68767932_602548213604036_1942476711408959488_n-1024x576.jpg)
პარლამენტში, საერთო ჯამში, მინასიანის განცხადებებს არ ენდობიან
ეროვნული კრების დეპუტატი, მმართველი ფრაქცია „ჩემი ნაბიჯის“ წევრი, აიკ კონჯორიანი მიკაელ მინასიანის განცხადებებს „პრიმიტიულ ხრიკად“ მიიჩნევს, რომლის მიზანიც სასჯელის თავიდან აცილებაა:
„გააკეთო პოლიტიკური განცხადებები… მხოლოდ იმიტომ, რომ შემდეგ თქვა: „ნახეთ, მე პოლიტიკური დევნის მსხვერპლი ვარ“. იმის მიუხედავად, ვინ ხარ – ყოფილი აზარტული მოთამაშე, რომელიც სახელმწიფოს ფულით აკეთებდა ფსონებს კაზინოში თუ სახელმწიფოს ყოფილი მაღალჩინოსანი, რომელმაც სხვადასხვა სპეკულაციური გზით დააგროვა მილიონები“.
დეპუტატი ოპოზიციური ფრაქცია „განათლებული სომხეთიდან“, ტარონ სიმონიანი მინასიანის განცხადებებს, ასევე, თავის მართლებისა და ყურადღების გადატანის მცდელობად აფასებს. მაგრამ ოპოზიციონერი დარწმუნებულია, რომ ქვეყნის ხელისუფლებამ მისი მისამართით გაკეთებულ განცხადებებს უნდა უპასუხოს.
დამოუკიდებელ დეპუტატ არმან ბაბაჯანიანსაც არ სჯერა ვერსიის, რომელიც ვიდეომიმართვაში იყო აღწერილი:
„შორს ვარ იმ აზრისგან, რომ სომხეთის ხელისუფლებას, კერძოდ, ნიკოლ ფაშინიანს, შეიძლებოდა, როგორმე მისთვის მსგავსი შეთავაზება გაეკეთებინა მას შემდეგ, რაც სულ რაღაც ერთი წლით ადრე, უარი თქვეს – არა მხოლოდ მასზე, არამედ მთელ იმ სისტემაზე, რომლის მკაფიო და ერთ-ერთი საკვანძო წარმომადგენელიც მიკაელ მინასიანი იყო“.