როგორც ჯანდაცვის მინისტრის მოადგილემ, თამარ გაბუნიამ განაცხადა, ქვეყანაში “ომიკრონის“ ტალღის პიკი გადავლილია და “მივდივართ დაღმასვლისკენ”.
შესაბამისად, მიუხედავად იმისა, რომ 22 თებერვალს ქვეყანაში 15 ათასამდე ახალი შემთხვევა დადასტურდა და 45 ადამიანი გარდაიცვალა, საკოორდინაციო საბჭომ კოვიდ-შეზღუდვების გაუქმების გადაწყვეტილება მიიღო.
შეზღუდვების მოხსნის კომენტირებისას დაავადებათა კონტროლის ცენტრის ხელმძღვანელი, ამირან გამყრელიძე ამბობს, რომ “შოლტი და მათრახი ყოველთვის არ მუშაობს და ზოგჯერ უკეთესია თვითშეგნება”.
მისი თქმით, კვლავ ძალაში რჩება პირბადეების ტარება:
” სრულად აცრილების მაჩვენებელი 80 პროცენტზე მეტი რომ გვქონდეს, საბჭო თავისუფლად მიიღებდა გადაწყვეტილებას, პირბადის ტარება მოხსნილიყო”.
ქვეყანაში შემოსვლის წესებში ცვლილება:
● 1-ელი მარტიდან საქართველოში შემოსვლა შეეძლება ნებისმიერი ქვეყნის მოქალაქეს, თუ გაკეთებული ექნება PCR ტესტი ან იქნება ვაქცინირებული;
● თუკი აქამდე აუცრელ ან PCR ტესტის არმქონე საქართველოს მოქალაქეს ქვეყანაში დაბრუნებისას 8-დღიანი თვითიზოლაცია ეკუთვნოდა, ამიერიდან ხუთი დღე მოუწევს იზოლაციაში ყოფნა;
შიდა კოვიდ-რეგულაციების შემსუბუქება:
● თუ აქამდე დახურულ სივრცეში ერთ მაგიდასთან ექვს ადამიანს შეეძლო დაჯდომა, 1-ლი მარტიდან ათ ადამიანი დაიშვება ერთ მაგიდასთან.
● უქმდება სტუმართა მაქსიმალურ ოდენობაზე დაწესებული შეზღუდვა, რაც იმას ნიშნავს, რომ დაშვებული ხდება სოციალურ ღონისძიებები – წვეულებები, დაბადების დღეები, ქორწილები, ქელეხები.
● 1-ელი მარტიდან უქმდება საკარანტინე სივრცეები, ე.წ. კოვიდსასტუმროები, რაც იმას ნიშნავს, რომ დღეიდან აღნიშნულ სივრცეებში ინფიცირებულთა შეყვანა შეჩერდება.
● უქმდება თერმოსკრინინგის ვალდებულება და დეზობარიერების ქონის ვალდებულება.
● სასტუმროებს მიეცემათ საშუალება ბუფეტის მეშვეობით სტუმრებს მომსახურება გაუწიონ.
● 4 მარტიდან დასაშვები იქნება კლუბების ფუნქციონირება და იმ ფართის მხოლოდ 60 პროცენტის ტევადობის გამოყენება შეეძლება, სადაც ღონისძიება იმართება.
● 15 მარტიდან დაშვებული იქნება კონფერენციების, სემინარებისა და ტრენინგების ჩატარება ყოველგვარი შეზღუდვის გარეშე, მოიხსნება 70 ადამიანზე შეზღუდვა.
● 27 თებერვალს იმართება საერთაშორისო მატჩი საქართველოსა და რუსეთს შორის. მიღებული გადაწყვეტილების შესაბამისად დასაშვები იქნება აღნიშნულ ღონისძიებაზე მაყურებელთა 50 პროცენტის დასწრება.
