"აფხაზ ძმებს შერიგების, ნდობის აღდგენის პოლიტიკა შევთავაზეთ" - საქართველოში აფხაზეთობას აღნიშნავენ

საქართველოში აფხაზეთობას აღნიშნავენ

საქართველოში 23 მაისს “აფხაზეთობა” აღინიშნება, რომელიც კათოლიკოს-პატრიარქის, ილია II-ის ინიციატივითა და ლოცვა-კურთხევით 2014 წელს დაარსდა.

ამ დღესთან დაკავშირებით საქართველოს პრემიერმინისტრი ირაკლი ღარიბაშვილი წერს:

“ყველას, პირველ რიგში კი, ჩვენს აფხაზ თანამემამულეებს ვულოცავ დღევანდელ დღეს.

ქართული ოცნების პოლიტიკურმა გუნდმა ჩვენს აფხაზ ძმებს ახალი მიდგომა – შერიგებისა და ნდობის აღდგენის პოლიტიკა შესთავაზა, რადგან ქვეყნის ტერიტორიული მთლიანობის აღდგენამდე ჩვენი ხელისუფლების ერთ-ერთი უმთავრესი მიზანია, ერთმანეთის ნდობა დავიმსახუროთ და ჩვენი ძმები, ჩვენი აფხაზი ხალხი დავიბრუნოთ.

ჩვენ ერთი ისტორია და კულტურა გვაქვს, ერთია ჩვენი ღირებულებები და ჩვენი შვილების უკეთესი მომავლისადმი სწრაფვის სურვილი. სწორედ ეს გვაძლევს იმედს, რომ ურთიერთპატივისცემისა და ნდობის აღდგენა და მეგობრობა ძლიერ, გაერთიანებულ, განვითარებულ და ევროპულ ქვეყნად გვაქცევს.

კიდევ ერთხელ გილოცავთ ყველას აფხაზეთის დღეს. მშვიდობასა და განვითარებას ვუსურვებ ჩვენს სამშობლოს – საქართველოს.”

● “ქართველებს იარაღი მიჰყიდა” – აფხაზი ვეტერანები პრემიერის დაჯილდოების წინააღმდეგი არიან
● აფხაზური ოპოზიცია რუსეთს საქართველოსთან თანამშრომლობის გამო აკრიტიკებს
● მოსაზრება აფხაზეთიდან: რუსეთსა და საქართველოს შორის „ურთიერთქმედება დიპლომატიური ურთიერთობების გარეშე“

შერიგებისა და სამოქალაქო თანასწორობის საკითხებში სახელმწიფო მინისტრი, თეა ახვლედიანი:

“სიმბოლურია, რომ 23 მაისი, მოციქულ სვიმონ კანანელის ხსენების დღეა, რომელმაც აფხაზეთში ქრისტიანობა იქადაგა. ერთიან კულტურასა და ტრადიციებთან ერთად, ქართველებსა და აფხაზებს საერთო ფასეულობებზე დაფუძნებული, მშვიდობიანი და მეგობრული თანაცხოვრების ისტორია გვაერთიანებს.

საქართველოს სამშვიდობო პოლიტიკის ფარგლებში, სწორედ ამ ერთიანობის გამოცდილებას ემყარება ადამიანზე ორიენტირებული შერიგებისა და ჩართულობის სახელმწიფო პოლიტიკა, რომელიც მიზნად ისახავს, შევქმნათ პირობები, ხელოვნური ბარიერებით დროებით დაშორებულ ადამიანებს შორის ურთიერთგაგებასა და პატივისცემაზე დამყარებული ურთიერთობების აღსადგენად, ნდობისა და მდგრადი მშვიდობის მშენებლობის უზრუნველსაყოფად. 

ღრმად გვწამს, რომ სწორედ შერიგება, მშვიდობა და განვითარება წარმოადგენს ძლიერ, ევროპულ სახელმწიფოში ერთობლივი კეთილდღეობისა და უკეთესი მომავლის მიღწევის უალტერნატივო გზას.”