ნიდერლანდების სამეფოში საქართველოს ელჩი, დავით სოლომონია გადადგა
საქართველოს ელჩი დავით სოლომონია გადადგა
ნიდერლანდების სამეფოში საქართველოს ელჩი, დავით სოლომონია გადადგა. გავრცელებული ინფორმაციით, მან საგარეო უწყებას თანამდებობის დატოვების შესახებ წერილობით უკვე მიმართა.
“საქართველოს დიპლომატიურ სამსახურში ჩემი ყოფნის სამი ათეული წლის უდიდესი ნაწილი მიეძღვნა ევროინტეგრაციის საკითხებზე მუშაობას. დიდი ბედნიერებაა, როდესაც შენი პროფესიული ვალდებულებები შენს ცხოვრებისეულ არჩევანს ემთხვევა.
მე პირნათლად ვასრულებდი ჩემს სამსახურებრივ მოვალეობებს, ვიდრე მჯეროდა, რომ სულ მცირე გავლენის მოხდენა შემეძლო პროცესებზე. დღეს ეს იმედი დასრულდა.
ვგმობ ნებისმიერი ძალადობას და ვტოვებ ნიდერლანდების სამეფოში საქართველოს საგანგებო და სრულუფლებიანი ელჩის თანამდებობას.” – ვკითხულობთ დავით სოლომონიას განცხადებაში.
საქართველოს პრემიერ-მინისტრის ირაკლი კობახიძის განცხადების შემდეგ, რომ ქვეყანა აჩერებს ევროკავშირთან მოლაპარაკებების გახსნას, საქართველოში დიდი საპროტესტო ტალღა აგორდა.
ქუჩის აქციების გარდა, ქვეყანაში გაჩნდა დაუმორჩილებლობისა და პროტესტის სხვა მცირე კერებიც – სკოლებში, უნივერსიტეტებში, გამოქვეყნდა ასზე მეტი დიპლომატის საჯარო წერილი სისტემასთან გამიჯვნაზე, მთელი დღეა ვრცელდება განცხადებები სამინისტროების თანამშრომლების სახელით.
ამ სიას უკვე შეუერთდა 17 მოსამართლის განცხადება, საკონსტიტუციო სასამართლოს თანამშრომლების განცხადება. ასევე, განცხადება გაავრცელეს და გაემიჯნნენ “ქართული ოცნების” გადაწყვეტილებას დაავადებათა კონტროლის ეროვნული ცენტრის თანამშრომლები, იუსტიციის სახლის თანამშრომლები.
29 ნოემბრის დილას ცნობილი გახდა, საქართველოს საგანგებო და სრულუფლებიანი ელჩი ბულგარეთის რესპუბლიკაში ოთარ ბერძენიშვილი თანამდებობას ტოვებს. ამის შესახებ მან სოციალურ ქსელ X-ში დაწერა.
ბერძენიშვილის თქმით, დიპლომატიური საქმიანობის ორი წლის განმავლობაში აქტიურად იყო ჩართული კოლეგებთან ერთად საქართველოს ევროატლანტიკური და ევროკავშირში ინტეგრაციის პროცესში. ის სოლიდარობას უცხადებს აქციის მონაწილეებს.
