ცოლზე ძალადობის გამო საპატრულო პოლიციის ყოფილი უფროსი დააკავეს

ცოლის მიმართ ძალადობის და მუქარის ბრალდებით საქართველოს საპატრულო პოლიციის ყოფილი უფროსი, დავით ცინარიძე დააკავეს.

გამოძიების ინფორმაციით, 2020 წლის 27 აპრილს, ღამე, ნასვამმა ცინარიძემ ცოლს სიტყვიერი და ფიზიკური შეურაცხყოფა მიაყენა, თან ცეცხლსასროლი იარაღით მოკვლით დაემუქრა და იარაღიდან გაისროლა კიდეც.

ცინარიძე სამართალდამცველებმა შემთხვევის ადგილზევე დააკავეს.

პოლიციის ყოფილ შეფს ბრალი ორი მუხლით წარუდგინეს: საქართველოს სისხლის სამართლის კოდექსის 151-ე მუხლის მე-2 ნაწილის „დ“ ქვეპუნქტით (ოჯახის წევრის მიმართ მუქარა) და 126-ე პრიმა მუხლის პირველი ნაწილით, რაც ოჯახში ძალადობას  გულისხმობს.


თბილისის საქალაქო სასამართლომ აღკვეთის ღონისძიების სახით ცინარიძეს პატიმრობა შეუფარდა.

______________________________________________________________________________

იურისტი, პოლიტიკური გაერთიანება “ლელოს” პოლიტსაბჭოს წევრი, ანა ნაცვლიშვილი:

დავით ცინარიძე საპატრულო პოლიციის უფროსი იყო მაშინ, როცა სახელმწიფოში იყო საშინელი ტალღა ქალთა მიმართ ძალადობის. ფაქტობრივად ყოველ მეორე და მესამე დღეს ქალს კლავდა მისი მეუღლე ან პარტნიორი. სახელმწიფო აჩვენებდა საჯაროდ, რომ ის ყველაფერს აკეთებდა ქალთა მიმართ ძალადობის დასაძლევად და ახლა ჩვენ დავინახეთ, რომ ამ პროცესში წინა ხაზზე მათ ჰყავდათ ადამიანი, რომელიც დღეს თავად არის საკუთარ მეუღლეზე ძალადობასა და  ცეცხლსასროლი იარაღის გამოყენებით მუქარაში ბრალდებული.

ეს არის ძალიან მანკიერი სისტემა. ადამიანები, რომლებიც დანაშაულს უნდა ებრძოდნენ, თავად არიან გაჟღენთილები დანაშაულებრივი მენტალიტეტით. ცინარიძე ამ შემთხვევაში აისბერგის მხოლოდ წვერია. 

ცინარიძის საქმე როგორ გაგრძელდა, ვნახეთ. უსამარცხვინოესი და სისტემისთვის როგორი შეურაცხმყოფელი იყო ის კადრები, რომლებიც ყველამ ვნახეთ და რის გამოც საბოლოო ჯამში მან თანამდებობა დატოვა, მაგრამ თანამდებობის დატოვება იმიტომ კი არ მოხდა, რომ სისტემამ გაიაზრა და ამ ადამიანს უთხრა, რომ შენ ხარ მორალური, ეთიკური და სამართლებრივი თვალსაზრისით სამართალდამცავი სისტემისთვის შეუფერებელი, უბრალოდ საზოგადოების სამართლიან პროტესტს გაარიდეს ეს კაცი, თბილად, კუთხეში მიაყუჩეს და კიდევ რამდენიმე ათასი ლარი ვუხადეთ მას ჩვენი ჯიბიდან, ისევ შსს-ში მუშაობისთვის. ეს არის მანკიერი სქემა, რომლის შემოქმედიც ერთი უწყება არ არის. მთავარი ადამიანი, რომელიც დღეს საქართველოში გადაწყვეტილებებს იღებს, თავად არის ჩართული დანაშაულებრივ მფარველობაში და თვითონ არის ისეთი მენტალიტეტის ადამიანი, რომ არაფრად მიაჩნია კანონის დარღვევა.

ვინ არის დავით ცინარიძე

დავით ცინარიძის სახელს კიდევ ერთი გახმაურებული ეპიზოდი უკავშირდება.

2015 წელს გავრცელდა ვიდეო, სადაც ჩანს როგორ ცდილობს დავით ცინარიძის მეგობარი ქალი მისი სახელის გამოყენებით პატრულზე ზეწოლას. 

ვიდეოს გამოქვეყნებიდან მალევე დავით ცინარიძე დაკავებული თანამდებობიდან გაათავისუფლეს. თუმცა, ის ისევ შსს-ში დარჩა და სტრატეგიული ობიექტების დაცვის დეპარტამენტის დირექტორის მოადგილედ დაინიშნა.

საპატრულო პოლიციის უფროსად ყოფნის პერიოდში დავით ცინარიძის წლიური ანაზღაურება 77 083 ლარი იყო, სტრატეგიული ობიექტების დაცვის დეპარტამენტში კი  – 32 400 ლარი.