სახალხო დამცველი: მედიის წარმომადგენლების მიყურადება მიზნად ისახავს მათ დაშინებას
სახალხო დამცველი მედიაზე
საქართველოს სახალხო დამცველი, ნინო ლომჯარია “მთავარი არხის” ჟურნალისტების ფარულ მიყურადებას ეხმაურება და ამბობს, რომ ეს არ არის პირველი შემთხვევა, როდესაც ცნობილი ხდება მედიის წარმომადგენლების სავარაუდო არაკანონიერი მიყურადება ხდება. მისივე განმარტებით, ამას ნეგატიური გავლენა აქვს ბოლო პერიოდში მედიის თავისუფლების ისედაც გაუარესებულ ხარისხზე.
საუბარია 13 ივლისს, ხელისუფლებასთან დაახლოებული ტელეწამყვანის, გიორგი გაჩეჩილაძის [უცნობი] მიერ გავრცელებულ “სკანდალურ ჩანაწერზე”, რომელიც ასახავს “მთავარი არხის” გადაცემა “პოსტ ფაქტუმის” სარედაქციო ჯგუფის საუბარს და ერთ-ერთი სიუჟეტის დაგეგმვას.
ჩანაწერის ფიგურანტი ჟურნალისტები – გიორგი გაბუნია, ლაშა კვესელაძე, გიორგი გვიშიანი და ეკა სარია – ვარაუდობენ, რომ მათი საუბარი უკანონოდ, სავარაუდოდ, სახელმწიფო უსაფრთხოების სამსახურმა ჩაიწერა.
ჩანაწერში საუბარია არჩევნების გაყალბების სქემის შესახებ, რომელზე ინფორმაციაც ჟურნალისტებს სახელმწიფო უსაფრთხოების სამსახურის უფროსის ყოფილმა მოადგილემ, სოსო გოგაშვილმა მიაწოდა.
სპეციალურმა საგამოძიებო სამსახურმა გავრცელებულ ფარულ ჩანაწერებზე გამოძიება გუშინ დაიწყო. სამსახურის ინფორმაციით, გამოძიება კერძო კომუნიკაციის საიდუმლოების დარღვევის ფაქტზე, სისხლის სამართლის კოდექსის 158-ე მუხლის 1-ლი ნაწილით დაიწყო.
ნინო ლომჯარიას თქმით, განსაკუთრებით საყურადღებოა მედიის წარმომადგენლების მიმართ ქვეყანაში შექმნილი საფრთხის შემცველი და მტრული გარემო, ისევე როგორც მაუწყებლის პროგრამების შინაარსის გაუმართლებელი კონტროლი:
“მედიის წარმომადგენლების მიყურადების პრაქტიკას მსუსხავი ეფექტი აქვს ჟურნალისტების მხრიდან გამოხატვის თავისუფლებით სრულფასოვნად სარგებლობაზე და მიზნად ისახავს მათ დაშინებასა და მათი საქმიანობის ხელშეშლას.”
როგორც სახალხო დამცველი აცხადებს, აღნიშნული მავნე პრაქტიკა განსაკუთრებით სახიფათოა საგამოძიებო ჟურნალისტიკისთვის, სადაც წყაროს კონფიდენციალურობის დაცვა დამატებით მნიშვნელობას იძენს. მისივე თქმით, ჟურნალისტებთან კერძო კომუნიკაციის საიდუმლოების დარღვევამ შესაძლოა, აიძულოს პოტენციური მამხილებელი, “თავი შეიკავოს მედიასთან თანამშრომლობისგან, რაც საბოლოოდ, საჯარო ინტერესის სფეროში შემავალი საკითხების საზოგადოებრივი ზედამხედველობის მიღმა დარჩენის საფრთხეს ქმნის.”
განცხადებაში ვკითხულობთ, რომ სახალხო დამცველი აქტიურად მიადევნებს თვალს “მთავარი არხის” თანამშრომლების შესაძლო მიყურადების ფაქტზე სპეციალურ საგამოძიებო სამსახურში დაწყებულ გამოძიებას და მოუწოდებს საგამოძიებო სამსახურს – მოახდინოს საზოგადოების პერიოდული, პროაქტიული ინფორმირება გამოძიების მიმდინარეობის შესახებ.
ეს არაა პირველი შემთხვევა, როდესაც ჟურნალისტები ფარულ მიყურადებაზე საუბრობენ. დღეს პროკურატურამ “ფორმულას” წამყვან თამარ ჩიხლაძეს სუს-ის კრებსების საქმეზე დაზარალებულის სტატუსი მიანიჭა. საუბარია ეპიზოდზე, რომელიც თამარ ჩიხლაძესა და უფლებადამცველ ნატა ფერაძეს შორის დიალოგს ასახავს. აღსანიშნავია, რომ ეს საუბარი არა ტელეფონით, არამედ სახლში შედგა.
ჟურნალისტებმა სუს-ის კრებსების საქმეზე ადამიანის უფლებათა ევროპულ სასამართლოს სარჩელით 13 ივლისს მიმართეს. 10 ჟურნალისტის უკანონო მოსმენა-მიყურადების საქმეზე სტრასბურგის სასამართლოს მიმართა მედიაომბუდსმენმაც.
სუს-ის ფაილების საქმეზე უკვე გამოიკითხნენ მედიის წარმომადგენლები, მათ შორის “ფორმულას” ერთ-ერთი დამფუძნებელი მიშა მშვილდაძე და ჟურნალისტები, ქეთი ნადიბაიძე და მარტა ქურასბედიანი.
