"დავკარგე ფეხების კონტროლი, ვერ ვიღებ საკვებს" - სააკაშვილი სასამართლოზე შეუძლოდ გახდა
სააკაშვილი სასამართლოზე შეუძლოდ გახდა
საქართველოს მესამე პრეზიდენტი მიხეილ სააკაშვილი სასამართლო დარბაზში შეუძლოდ გახდა და ექიმის დახმარება ითხოვა. სასამართლო პროცესი, რომელზეც ექსპრეზიდენტის მიერ საზღვრის უკანონო კვეთის საქმეს განიხილავდნენ, დროებით შეწყდა.
ნახევარსაათიანი პაუზის შემდეგ სააკაშვილი დარბაზში დაბრუნდა და მისი ჯანმრთელობის შესახებ ისაუბრა. სააკაშვილის თქმით, მას აღენიშნება მუდმივი სისუსტე, უძილობა, კვირას, 17 აპრილს კი სრულად დაკარგა ფეხების კონტროლი.
“ახლა ვარ იმ წონაზე, რაც ვიყავი შიმშილობის ყველაზე კრიტიკულ პერიოდში, დავიკელი სადღაც 12კგ ბოლო დღეების განმავლობაში, პრაქტიკულად, ვერ ვიღებ საკვებს… კვირას დავკარგე მთლიანად ფეხების კონტროლი, ეს იწვევს მცირე ტკივილებს ხელებსა და ფეხებში, ტკივილგამაყუჩებელი ნემსებით ხდება ამის მოხსნა, რაც შემიძლია ვთქვა, რომ პრაქტიკულად ის, რაც რესპუბლიკურ საავადმყოფოში ნახეს და თქვეს, რომ სიტუაცია მძიმეა, მე რაც მითხრეს ექიმებმა. გორის ჰოსპიტალი ყველაფერი იყო სამკურნალო დაწესებულების გარდა, იქიდან უარესი მდგომარეობით დავბრუნდი, ვიდრე მიმიყვანეს. ეს საპატიმრო, რა თქმა უნდა, საერთოდ არაა მორგებული რაიმეს სამკურნალოდ, ეს ნათელია, მაგრამ მადლობელი ვარ ექიმების. წეღან, უბრალოდ წამერთვა… ვერ შევძლებდი სხდომის გაგრძელებას, თუ არა ძლიერი ტკივილგამაყუჩებელი ნემსის სახით[…]“, – თქვა ექსპრეზიდენტმა.
მისივე განმარტებით, ესაა პოსტტრავმული სინდრომი:
“ახლა ნევროპათიასთან დაკავშირებული რაღაც წამალი მოვითხოვე, ასევე ვიტამინიც, რომელსაც ასევე ვიღებ. ექიმმა, ქალბატონმა თამარ აბაშიძემ, რომელიც ვივამედიდან მოვიდა და დასვა ეს დიაგნოზი, მერე ეს დიაგნოზი მოხვდა პრესაში და ამ ქალბატონის მეუღლე, რომელიც იყო ჯანდაცვის სამინისტროში დეპარტამენტის ხელმძღვანელი, გაათავისუფლეს, იმის გამო, რომ მან დასვა ობიექტური დიაგნოზი – ესაა რეალობა.”
სააკაშვილმა ისაუბრა მისი პარტიის, “ნაციონალური მოძრაობის” შესახებაც და თქვა, რომ ეს პარტია არა ომის, არამედ საქართველოს დაცვისა და გადარჩენის პარტიაა.
“მთელ რეგიონსა და მსოფლიოს წინ ძალიან დიდი ცვლილებები ელის. უკრაინა და მსოფლიო ამ ომში იმარჯვებენ და საქართველოს საუკუნოვან მტერს ამარცხებენ. ამიტომ არ უნდა დავკომპლექსდეთ.
ახლა ხომ მაინც ხვდებით, 2008 წელს თბილისი და საქართველოს სხვა რეგიონები რას გადავარჩინეთ. ჩვენ გვეუბნებიან, რომ ისევ იმას ვითხოვთ, რაც არ გვეკუთვნის. ჩვენ გვეკუთვნის და თქვენ გეკუთვნით ეს ქვეყანა.
საქმე იმაშია, რომ საქართველოსთვის მზადდებოდა და მზადდება ძალიან დიდი საფრთხე. ზუსტად ისე, როგორც უკრაინაში გაიხსნა პრორუსული ორგანიზაციების ასობით ოფისი, მაგრამ ზელენსკიმ დროულად დახურა. ზუსტად ასევე გაიხსნა საქართველოშიც. ეს ოფისები იმიტომ გახსნეს ომის წინ, რომ როგორც კი უკრაინას მოამთავრებდნენ, აქ შემოჭრილიყვნენ. დღეს ამ მზაკვრულ გეგმას გზაზე სწორედ უკრაინა გადაეღობა”, – თქვა მიხეილ სააკაშვილმა.
საქართველოს მესამე პრეზიდენტი მიხეილ სააკაშვილი, რომელიც ხელისუფლებას ძებნილად ჰყავდა გამოცხადებული, საქართველოში ფარულად დაბრუნდა. 1 ოქტომბერს ის დააკავეს და გლდანის ციხეში გადაიყვანეს.
დაპატიმრებისთანავე ყოფილმა პრეზიდენტმა პროტესტის ნიშნად შიმშილობა დაიწყო. სააკაშვილი თავს პოლიტიკურ, უფრო კონკრეტულად კი რუსეთის პრეზიდენტის ვლადიმერ პუტინისა და საქართველოს არაფორმალური მმართველის ბიძინა ივანიშვილის პატიმრად მიიჩნევს.
ყოფილი პრეზიდენტი 50 დღე შიმშილობდა. ბოლო ორი კვირა ის აღარ იღებდა აღარც სამკურნალო მედიკამენტებს. მისი მდგომარეობა დღითიდღე უარესდებოდა. ექიმთა ჯგუფმა, რომელიც სახალხო დამცველმა შექმნა, მისი მდგომარეობა კრიტიკულად შეაფასა.
საქართველოს სამოქალაქო სექტორი, დიპლომატები, რიგითი მოქალაქეები, მსახიობები, მწერლები და საზოგადოების სხვა ცნობილი სახეები ხელისუფლებას ექს-პრეზიდენტის მრავალპროფილურ კლინიკაში გადაყვანას სთხოვდნენ. ამ მოთხოვნით ხელისუფლებას მიმართა საქართველოს სახალხო დამცველმა, სახელმწიფო ინსპექტორის აპარატმა. განცხადება გაავრცელა აშშ-ს სახელმწიფო დეპარტამენტმაც. საბოლოოდ, მესამე პრეზიდენტი გორის სამედიცინო დაწესებულებაში 19 ნოემბერს გადაიყვანეს.
გარდა ამისა, არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილება. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.
