რუსი ადვოკატი, რომელიც სახელმწიფოს ღალატში ბრალდებულებს იცავდა, საქართველოში გადავიდა
რუსი ადვოკატი ივან პავლოვი ხელისუფლების მხრიდან დევნის გამო რუსეთიდან საქართველოში გადავიდა. პავლოვი სახელმწიფოს ღალატში ბრალდებულების უფლებებს იცავდა. მათ შორის, ე.წ. ქალების საქმეში, რომლის ფარგლებშიც, რამდენიმე ქალი გაასამართლეს 2008 წლის აგვისტოს ომის წინ რუსული „სამხედრო საიდუმლოების“ საქართველოსთვის გადაცემის ბრალდებით. ასევე, ის იცავდა კორუფციასთან ბრძოლის ფონდის ინტერესებს, რომელიც რუსული ოპოზიციის ლიდერმა, ალექსეი ნავალნიმ დააარსა.
„ახლა ემიგრანტი ვარ. ჯერჯერობით საქართველოში – ქვეყანაში, რომელთანაც ბევრი რამ მაკავშირებს. აქ დაიბადა დედაჩემი, აქ არის დასაფლავებული ბაბუაჩემი, ბავშვობაში აქ ვიცხოვრე სამი წელი, სკოლაში ვიარე…“, – დაწერა ივან პავლოვმა საკუთარ ტელეგრამ-არხზე.
- რუსეთის სასამართლომ ნავალნის ორგანიზაცია კანონგარეშედ გამოაცხადა
- ფარნები, სიყვარული და ნავალნი. მორიგი აქცია რუსეთში
- საქართველო რუსეთის წინააღმდეგ სტრასბურგის სასამართლოში – საქმე ჯერ არ დასრულებულა
როგორც რუსული „ნოვაია გაზეტა“ წერს, პავლოვი იძულებული გახდა ქვეყანა დაეტოვებინა მას შემდეგ, რაც მის წინააღმდეგ სისხლის სამართლის საქმე აღძრეს ჟურნალისტ ივან საფრონოვის საქმესთან დაკავშირებული ინფორმაციის „გახმაურების“ გამო. მას აუკრძალეს მოწმეებთან ურთიერთობა, ასევე, კომუნიკაციის საშუალებებისა და ინტერნეტის გამოყენება, რამაც მისი მუშაობა „შეუძლებელი“ გახადა.
„აკრძალვა მხოლოდ ერთადერთ რამეს არ შეეხო – ქვეყნის დატოვების შესაძლებლობას. ეს იყო ნიშანი, რომელიც გასასვლელისკენ მიუთითებდა. ერთ თვეზე მეტი დრო დასჭირდა ჩემი დაცვის ქვეშ მყოფებისთვის საიმედო ადვოკატების მოძიებას, რომლებიც რუსეთში აგრძელებენ მუშაობას“, – განაცხადა პავლოვმა.
პავლოვის თქმით, ქვეყნიდან გაფრენის დღეს, მას თვალთვალი დაუწესეს, მთელი დღე, პეტერბურგში, საკუთარ სახლთან დაუყენეს „დარაჯები“, რომლებიც მის კვალდაკვალ აეროპორტში გაემგზავრნენ და უშუალოდ თვითმფრინავამდე მიაცილეს – „მაგრამ გაფრენაში ხელი არ შემიშალეს, მიუხედავად იმისა, რომ მხოლოდ ერთი მიმართულებით მქონდა ბილეთი“.
„ღრუბლები დიდი ხანი იქუფრებოდა. 30 აპრილს ჩხრეკა ჩატარდა, ზაფხულში, „გუნდი 29“ (ივან პავლოვისა და მისი კოლეგების უფლებადაცვითი პროექტი) არასასურველ ორგანიზაციად გამოაცხადეს. ეს ყველაფერი იზრდებოდა და ოპტიმიზმს არ გვმატებდა. კიდევ უფრო უარესადაც შეიძლება ყოფილიყო ყველაფერი. როგორც ამბობენ, მადლობა, რომ ცოცხალი ვარ“, – განუცხადა პავლოვმა რუსულ გამოცემა „კომერსანტს“.
პავლოვმა ხაზი გაუსვა, რომ მიუხედავად იძულებით დროებით საზღვარგარეთ ცხოვრებისა, მთელ აწმყოსა და მომავალს რუსეთს უკავშირებს.
„ქალების საქმე“
2013-2015 წლებში, ქალაქ სოჭში მცხოვრები ექვსი ქალი გაასამართლეს სახელმწიფოს ღალატის ბრალდებით. ამის მიზეზი გახდა SMS-ები, რომლებიც მათ საკუთარ ნაცნობებს გაუგზავნეს საქართველოში, 2008 წლის აგვისტოში, საბრძოლო მოქმედებების დაწყებამდე ცოტა ხნით ადრე.
ყველა ამ ქალის საქმეს „გუნდი 29“ წარმართავდა, რომელიც იურისტებისა და ჟურნალისტებისგან შედგება. ის ადვოკატებმა ივან პავლოვმა და ევგენი სმირნოვმა შექმნეს. „გუნდი 29“-ის ვებგვერდზე ნათქვამია, რომ ისინი იურიდიულ დახმარებას უწევენ მათ, „ვინც უსამართლოდ დაადანაშაულეს სახელმწიფოს ღალატში, სახელმწიფო საიდუმლოების გაცემასა და ჯაშუშობაში“.
