რუსეთის ფედერაციამ საქართველოს საჭიროების შემთხვევაში ელექტროენერგიის მიწოდება სთხოვა
რუსეთმა საქართველოს ელექტროენერგიის მიწოდება სთხოვა
რუსეთმა საქართველოსა და აზერბაიჯანს საგანგებო ვითარების შემთხვევაში ელექტროენერგიის მიწოდება სთხოვა, ამის შესახებ 15 ოქტომბერს რუსულ სატარიფო კონფერენციაზე, კომპანია Интер Рао-ს გამგეობის წევრმა, ალექსანდრა პანინამ განაცხადა.
რუსეთი თითოეულ ქვეყანას, საჭიროების შემთხვევაში, 300 მგვტ ელექტროენერგიის მიწოდების უზრუნველყოფას სთხოვს.
“დიახ, ჩვენ ორ ქვეყანას, საქართველოსა და აზერბაიჯანს ელექტროენერგიის მიწოდების შესაძლებლობის შესახებ ვკითხეთ. ჩვენ განვიხილავთ იმპორტის ვარიანტებს და ჩვენ ვთხოვეთ ორ მეზობელ ენერგოსისტემას, ავარიული სიტუაციების შემთხვევაში მოგვაწოდონ ენერგორესურსი. თუ იქნება ავარიული რეჟიმი, მაშინ ჩვენ, სისტემის ოპერატორის მოთხოვნით, ორ ენერგოსისტემას – საქართველოსა და აზერბაიჯანს თხოვნით მივმართავთ, რომ მზად იყვნენ მოგვაწოდონ 300-300 მგვტ ელექტროენერგია”. – თქვა პანინამ.
მისივე განმარტებით, კომპანიას საქართველოსგან და აზერბაიჯანისგან პასუხი ჯერ არ მიუღია.
რუსული სახელმწიფო მედია ТАСС-ის თქმით, პანინამ დააკონკრეტა, რომ რუსეთის ფედერაცია ეცდება ამ საკითხს თავად გაუმკლავდეს და ელექტროენერგიის იმპორტს თავი აარიდოს, თუმცა, ავარიული სიტუაციების შემთხვევაში მეზობელ ქვეყნებს მიმართავს.
