რუსეთის საგარეო დაზვერვა: აშშ ეუთო/ოდირთან ერთად საქართველოს არჩევნებში ჩარევას გეგმავს
რუსეთის საგარეო დაზვერვის განცხადება
რუსეთის საგარეო დაზვერვა (СВР) ავრცელებს განცხადებას, რომლის მიხედვით, აშშ ეუთო/ოდირთან (ODIHR/OSCE) ერთად საქართველოს საპარლამენტო არჩევნებში ჩარევას გეგმავს, რათა არ დაუშვას არჩევნებში “ქართული ოცნების” გამარჯვება.
განცხადებაში ვკითხულობთ, რომ ეუთო/ოდირი არჩევნებამდე 20 დღით ადრე გამოაქვეყნებს შუალედურ ანგარიშს, რომლის დასკვნაშიც “ეწერება”, რომ ქვეყანაში არ არსებობს პირობები თავისუფალი და სამართლიანი არჩევნების ჩასატარებლად. რუსეთის დაზვერვის მტკიცებით, არჩევნების შედეგების პირველადი შედეგების გამოცხადების შემდეგ გავრცელდება განცხადება, რომ ელექტორალური პროცესი არ იყო დემოკრატიულ სტანდარტებთან შესაბამისობაში:
ვაშინგტონის გეგმა აშკარაა და უკვე აღარ არის გასაკვირი – მისცეს პროდასავლურ ოპოზიციას მასობრივი პროტესტის საფუძველი, რომლის მიზანიც ქვეყანაში ძალაუფლების ხელში ძალის გამოყენებით ჩაგდებაა
განცხადებაში ასევე ნათქვამია, რომ არსებულ ვითარებაში, რუსეთი გამართლებულად მიიჩნევს შეუმციროს დაფინანსება OSCE-ს (ეუთო), რათა რამენაირად შეასუსტოს საერთაშორისო ორგანიზაციის “დესტრუქციული” აქტივობები.
“ამერიკელები შეთანხმდნენ OSCE-სა და ODIHR-ის ხელმძღვანელობასთან საქართველოს მიმართულებით თანამშრომლობაზე.” – წერია განცხადებაში.
ეს უკვე მესამე განცხადებაა, რომელსაც რუსეთის დაზვერვა საქართველოზე ავრცელებს
ეს უკვე მესამე განცხადებაა, რომელსაც რუსეთის საგარეო დაზვერვა საქართველოს შესახებ არვცელებს.
28 აგვისტოს რუსეთის დაზვერვამ გაავრცელა განცხადება, რომელშიც ამტკიცებს, რომ აშშ საქართველოში “ფერად რევოლუციას” გეგმავს. რუსეთის დაზვერვა ირწმუნება, რომ აშშ საქართველოში წინასაარჩევნოდ განვითარებული პროცესებით უკმაყოფილოა და რევოლუციის მზადებაც სწორედ ამას უკავშირდება.
ასევე, ანგარიშში ნათქვამია, რომ ქართული არასამთავრობო ორგანიზაციები არჩევნებზე დაკვირვებისთვის მობილიზებას ახდენენ და მათ გაყალბების “ეჭვგარეშე ფაქტების” იდენტიფიცირება და დაფიქსირება ევალებათ.
პრესრელიზში ხაზგასმულია, რომ მმართველ პარტია “ქართულ ოცნებას”, 26 ოქტომბერს, მოსახლეობის ხმების დამაჯერებელი რაოდენობის მიღება შეუძლია, ვინაიდან “ამერიკელების შრომის მიუხედავად”, ოპოზიცია დაქსაქსული, ხოლო მის მიერ შექმნილი ალიანსები არამდგრადია.
მანამდე, 7 ივლისს, რუსეთის საგარეო დაზვერვის სამსახურმა (СВР) განაცხადა, რომ აშშ საქართველოში მთავრობის ცვლილებას გადატრიალების გზით გეგმავს. განცხადება СВР-მა საკუთარ გვერდზე გამოაქვეყნა და ის დიდწილად ოპოზიციისა და პრეზიდენტ სალომე ზურაბიშვილის დისკრედიტაციას ემსახურება.
აშშ-ის სახელმწიფო დეპარტამენტის პრესსპიკერმა, მეთიუ მილერმა განაცხადა, რომ რუსეთის ბრალდებები სრული სიცრუე და აბსურდია.
“და მე უბრალოდ აღვნიშნავ იმ ქვეყნის – რუსეთის – ირონიას, რომელიც უკანონოდ ახდენს საქართველოს 20%-ის ოკუპაციას და ამ აბსურდულ ბრალდებებს სხვა ქვეყნის მიმართ აყენებს.“ – თქვა მაშინ მეთიუ მილერმა.
