რუსეთი: დაბალი სიკვდილიანობა ინფიცირებულთა ზრდის ფონზე და გარდაცვლილი ექიმების ძალიან მაღალი მაჩვენებელი
კორონავირუსი სწრაფად ვრცელდება რუსეთის ტერიტორიაზე. უკანასკნელი კვირის განმავლობაში, ყოველდღიურად ინფიცირების ახალი შემთხვევების რეკორდი ფიქსირდება.
რუსეთში, ბოლო ერთი დღის განმავლობაში, 11 231 ადამიანი დაავადდა. 8 მაისის მონაცემებით, ქვეყანა მსოფლიოში მეხუთე ადგილზეა ინფიცირებულთა რაოდენობით – სულ 177 160 შემთხვევა.
მაგრამ სპეციალისტებს ინფიცირების ზრდის ფონზე, დაღუპულთა რაოდენობის შეუსაბამობა აშფოთებთ.
8 მაისისთვის არსებული ოფიციალური მონაცემებით, რუსეთში, 1 625 ადამიანი გარდაიცვალა. ეს, დაახლოებით, 11 ადამიანს ნიშნავს მილიონ მოსახლეზე.
ამავდროულად, ქვეყნებში, რომლებიც ასევე ძლიერ დაზარალდნენ პანდემიისგან, ეს რიცხვი გაცილებით მაღალია: აშშ-ში – 228, იტალიაში – 495, ესპანეთში – 558 ადამიანი მილიონ მოსახლეზე.
- კორონავირუსი ჩრდილოეთ კავკასიაში: ხელისუფლების მიმართ უკმაყოფილება იზრდება
- მოსაზრება: რუსებმა თავისიანები მიატოვეს
- თურქეთი ტურისტული სეზონის გახსნას უკვე მაისის ბოლოს გეგმავს. როგორ მოხდება ამის ორგანიზება
- კორონავირუსის ქრონიკა კავკასიასა და მსოფლიოში
არის კიდევ ერთი ანომალიური რიცხვი – სამედიცინო პერსონალის გარდაცვალების ძალიან მაღალი მაჩვენებელი.
პანდემიის დაწყებიდან, ქვეყანაში გარდაცვლილი 1 625 ადამიანიდან – 113 მედიკოსია.
დიდ ბრიტანეთსა და იტალიაში 100-ზე ცოტა მეტი გარდაცვლილი მედიკოსი მოდის კორონავირუსით დაღუპულ 30 ათასზე მეტ ადამიანზე.
რუსმა ექიმებმა შექმნეს ვებგვერდი სახელწოდებით „სამახსოვრო სია“, სადაც გარდაცვლილი კოლეგების სახელებს წერენ.
კორონავირუსის წინააღმდეგ ბრძოლა – შემდუღებლის ნიღაბში
მოსკოვის – რომელიც ინფექციის მთავარი კერაა – მერმა ყველა გააფრთხილა, რომ, შესაძლოა, დაინფიცირდეს 15-მილიონიანი ქალაქის მცხოვრებთა, დაახლოებით, 2 პროცენტი.
რუსეთში, კორონავირუსის გავრცელების მთავარი წყაროები გახდნენ: ეკლესიები, სამხედრო ნაწილები, გაზისა და ნავთობის მომპოვებელ მუშათა საერთო საცხოვრებლები და საავადმყოფოები.
„ეს ჩემი ცხოვრების ყველაზე ხანგრძლივი ორი თვე იყო, – ჰყვება სანკტ-პეტერბურგელი მედდა, – კოლეგასთან ვცხოვრობდი, რათა არ დამეინფიცირებინა მეუღლე და შვილი, თუკი თავად დავაავადდებოდი. რაღაც მომენტში, ჩვენ საავადმყოფოში დაგვიმთავრდა ნიღბები და ხელმძღვანელობამ სახლიდან საკუთარის მიტანა გვთხოვა“.
სანკტ-პეტერბურგში, მხოლოდ ერთ საავადმყოფოში, 115-ზე მეტი მედიკოსია კარანტინში. ანალოგიური ინფორმაცია მოდის, რამდენიმე სხვა მსხვილი ქალაქიდან.
საავადმყოფოები ინფექციის გავრცელების კერები ხდება იმიტომ, რომ თავდაცვის საშუალებების მწვავე დეფიციტია.
ქალაქ ორიოლის მედიკოსთა დამოუკიდებელი პროფკავშირების წარმომადგენელი, დმიტრი სერიოგინი ამტკიცებს, რომ ბოლო დრომდე, სასწრაფო დახმარების ბრიგადები გამოძახების ადგილზე ნიღბებისა და ხელთათმანების გარეშე გადიოდნენ.
რის შედეგადაც, გარდაუვალი რამ მოხდა – მისი შვიდი კოლეგა დაინფიცირდა.
„წარმოდგენა არ მაქვს, თვითონ როდის დავინფიცირდები – ეს მხოლოდ დროის საკითხია“, – ამბობს სერიოგინი.
„პუტინი დაგპირდათ – დაე, თავად გადაგიხადოთ“
ბევრი ექიმი ვერ უძლებს ასეთ პირობებს.
სანკტ-პეტერბურგელი ექიმი, მარინა ზამიატინა სამსახურიდან წავიდა მას შემდეგ, რაც სამუშაოდ გასვლა შემდუღებლის ნიღბით მოუწია, რომლის წაღებაც მეუღლემ აიძულა.
მოსკოვის მთავარი ინფექციური საავადმყოფოდან წასული მედდა ჰყვება:
„2-3 დღის განმავლობაში, მხოლოდ ძილისთვის ვისვენებდით. ინფიცირების ზონებში, ცვლები 10-12 საათი გრძელდებოდა – რათა იშვიათად გამოგვეცვალა დამცავი აღჭურვილობა.
ერთი თვე ასეთი მუშაობისთვის, 23 ათასი რუბლი გადამიხადეს (დაახლოებით, 300 ევრო). და როდესაც მათ დანამატზე ვკითხე, რომელსაც პუტინი დაგვპირდა, მიპასუხეს: „პუტინი დაგპირდათ, დაე, თავად მისგან მიიღეთ“.
რუსული სოციალური ქსელები სავსეა კორონავირუსთან მებრძოლი ექიმებისთვის ფულის შეგროვების მოწოდებებით. მთავარი საჭიროება – ნიღბები, დამცავი კოსტიუმები. ასევე, ფულს აგროვებენ ექიმების საჭმლისთვის.
ირკვევა, რომ ექიმებს, რამდენიმე დღე-ღამის განმავლობაში მუშაობას სთხოვენ – მაგრამ, ამავდროულად, მათ არ აჭმევენ.
ციმბირში, პატარა ქალაქ რუბცოვსკში, ექიმებმა დახმარების საერთო მოთხოვნა დაწერეს ადგილობრივი ხელისუფლების სახელზე, რათა ორგანიზება გაეკეთებინათ თავიანთი გამოკვებისთვის. მათ უპასუხეს, ქალაქის ბიუჯეტში მხოლოდ დაზიანებული საკანალიზაციო მილების გასარემონტებელი ფულიაო.
სამედიცინოს სტუდენტები ყველაზე საშიშ სამუშაოებზე, გარიცხვის საფრთხის ფონზე
საავადმყოფოებში, კორონავირუსთან მებრძოლი ექიმების ნაკლებობის შევსებას, ხელისუფლება სამედიცინო უნივერსიტეტების სტუდენტების ხარჯზე ცდილობს. ასეთი ინფორმაცია მოდის მოსკოვიდან და სანკტ-პეტერბურგიდან, მაგრამ არა მხოლოდ, იგივე ხდება პროვინციებშიც.
მაღალი კურსის სტუდენტებს განუცხადეს, რომ ასე „გაივლიან პრაქტიკას“, ისინი კი, ვინც უარს იტყვიან ამაზე, ვერ მოახერხებენ სწავლის დასრულებას აკადემიური დავალიანების გამო, რომლის ჩაბარებაც შეუძლებელი იქნება.
ყველა სტუდენტი არ დათანხმდა ასეთ პრაქტიკას. მოსკოვში, პირველი სამედიცინო აკადემიის სტუდენტთა ნაწილმა შექმნა ჯგუფი ჰეშთეგით „სტუდენტიმონაარარის“. მისმა მონაწილეებმა მოითხოვეს, შეწყდეს შანტაჟი და სტუდენტები სრულფასოვნად გააფორმონ კოვიდკლინიკებში სამუშაოებზე.
შეიძლება თუ არა სტატისტიკის ნდობა
რადიო „თავისუფლების“ ჟურნალისტები გაესაუბრნენ მოხალისეს, რომელიც ექიმებს მოსკოვის უმსხვილეს, 52-ე საავადმყოფოში ეხმარება.
ილია კოვალიოვი მოჰყვა, რომ „სასწრაფოებს“ საავადმყოფოებში მიჰყავთ მხოლოდ ის პაციენტები, რომლებსაც ფაქტობრივად აღარ შეუძლიათ დამოუკიდებლად სუნთქვა.
„ბევრი საავადმყოფოს ექიმები ამბობენ, რომ რუსეთში, სინამდვილეში, 7-10-ჯერ მეტი ადამიანი იღუპება კორონავირუსისგან, ვიდრე ოფიციალურ სტატისტიკაში ფიქსირდება.
ადამიანებს ინფიცირების ფონზე ან ურთულდებათ, ან უვითარდებათ დაავადება და როდესაც ისინი იღუპებიან – სწორედ ამ დაავადებას უთითებენ და არა COVID-19-ს“.
„ჩემს ახლობელს ბებია გარდაეცვალა. დაწერეს, რომ გულის გამო დაიღუპა. მაგრამ მას საერთოდ არ აწუხებდა გული, ორმხრივი პნევმონია რომ არ დამართნოდა, რომელმაც ინფარქტი გამოიწვია. მისი ფილტვები ფაქტობრივად სრულად გაანადგურა კორონავირუსმა“.
