რატომ ებრძვიან ჩეჩნები არაბებს საფრანგეთში და რა შუაშია აქ პუტინის მხარდამჭერი ლოზუნგები
18 ივნისს, საფრანგეთის ქალაქ დიჟონში, ხუთი ჩეჩენი დააპატიმრეს, რომელთაც ბრალად ედებათ ადგილობრივ ჩეჩნურ და არაბულ დიასპორებს შორის შეტაკებების ორგანიზება – ამის შესახებ Reuters-ი წერს.
გამოქვეყნებულია ანგარიში, რომელშიც ნათქვამია, რომ ჩეჩნური დიასპორა საფრანგეთისთვის საფრთხეს წარმოადგენს.
თუმცა, თავად „ფრანგი ჩეჩნები“ საფრანგეთის პოლიციას ადანაშაულებენ, რომელიც, მათი თქმით, არ იღებს ზომებს „არაბ ნარკოდილერებთან“ დაკავშირებით.
ყველაფერი 10 ივნისს დაიწყო და სიტუაცია ბოლომდე ამ დრომდე არ დაწყნარებულა. დიჟონში, პატრულირებას აგრძელებს სპეცდანიშნულების რაზმისა და პოლიციის საგანგებოდ ჩამოყვანილი ათასობით შეიარაღებული თანამშრომელი.
• კადიროვი კადიროვის წინააღმდეგ: გავრცელდა ვიდეო, რომელშიც კადიროვის ძმისშვილი ადამიანებს აწამებს
• ცდა ბედის მონახევრეა. როგორ უტევენ ჩეჩნეთიდან დევნილები ბელარუსში პოლონეთის საზღვარს
სავარაუდოდ, კონფლიქტი იმით დაიწყო, რომ არაბების ჯგუფმა, რომელთაც ნარკოვაჭრობაში ადანაშაულებენ, ჩეჩენი მოზარდი სცემა.
ამის შემდეგ, მთელ ქალაქში, ნამდვილი ომი გაჩაღდა. სოციალურ ქსელებში გავრცელებულ ვიდეოებში ჩანს შეიარაღებული, ნიღბიანი ადამიანები, ცეცხლმოკიდებული ავტომობილები და ისმის ავტომატის ჯერი.
ფრანგული პოლიციის ინფორმაციით, ჩეჩნური დიასპორის წარმომადგენლები დიჟონში ქუჩებს კეტავდნენ, ბევრ მათგანს სახეზე ნიღაბი ეკეთა, ხელში კი ავტომატები და დანები ეჭირათ.
კონფლიქტის ერთ-ერთმა მონაწილემ ჩეჩნური მხარიდან dailystorm-ს განუცხადა, რომ მათ სურთ არაბებს თავისივე მეთოდით დაუბრუნონ ხურდა:
„ისინი ისე იქცევიან, როგორც მასპინძლები, ვაჭრობენ ნარკოტიკით და უკანონოდ ცხოვრობენ. ჩვენ მათ ავუხსენით, რომ ასე არ შეიძლება და თუ საჭირო გახდება, კიდევ ავუხსნით“.
France Info-ს ინფორმაციით, ამ „ომში“, 16 წლის ჩეჩენი ბიჭის ცემისას, არაბების ჯგუფის წევრებმა მას უთხრეს: „ცოცხალს დაგტოვებთ, რათა შენებს გადასცე – ასე დაემართება ყველას“. მომხდარის შემდეგ, მოზარდი მძიმე მდგომარეობაშია.
მასმედია საფრანგეთის ხელისუფლებაზე დაყრდნობით აცხადებს, რომ ჩეჩნურმა დიასპორამ სოციალური ქსელების საშუალებით მოუწოდა თავისიანებს დაზარალებულის გამო შურისძიებისკენ. შეტაკებებში მონაწილე ერთ-ერთი ჩეჩენის თქმით, ქალაქში ჩამოვიდნენ მათი თანამემამულეები, რომლებიც ბოლო პერიოდში ცხოვრობდნენ საფრანგეთში, ბელგიასა და გერმანიაში.
ადგილობრივი მედიის ცნობით, საფრანგეთის დაზვერვამ საფრანგეთის პოლიციის მთავარ დირექტორატს (DCPJ) გადაუგზავნა ანგარიში, რომელშიც ნათქვამია, რომ ჩეჩნური თემი „ქვეყნისთვის საფრთხეს წარმოადგენს“.
ანგარიშში აღნიშნულია, რომ უკანასკნელ წლებში, სულ უფრო და უფრო ხშირად ხდება შეტაკებები ჩეჩნებსა და სხვა თემის წარმომადგენლებს შორის – ძირითადად, ჩრდილოეთ აფრიკიდან ჩამოსულებს.
ჩეჩენი ისტორიკოსი, მაიარბეკ ვაჩაგაევი, რომელიც საფრანგეთში ცხოვრობს, ამბობს, რომ მოვლენების ასეთი ინტერპრეტაცია არასწორია.
ბიჭი სულ რაღაც 16 წლისაა, ის ლიცეუმში სწავლობს. ცდილობდნენ მისთვის დაემტკიცებინათ, რომ ის ამ ქალაქში ვერ იცხოვრებს, თუკი ნარკომოვაჭრეების მოთხოვნებს არ შეასრულებს.
ჩეჩნები ჩავიდნენ დიჟონში, ორი დღის განმავლობაში ეძებდნენ ამ ნარკომოვაჭრეებს და ვერ იპოვეს. და მას შემდეგ, რაც ჩეჩნებმა ორგანიზებულად, ათობით ავტომობილით დატოვეს ქალაქი – უცებ ეს ნარკომოვაჭრეები გამოჩნდნენ ქალაქში.
ისინი ავტომატებით ხელში იდგნენ და ყვიროდნენ: „გაუმარჯოს პუტინს, რომელიც კარგად ხოცავდა ჩეჩნებს“. ასეთი წარწერები გაჩნდა შენობების კედლებზე მთელ დიჟონში.
ჩეჩნური დიასპორა კი მხოლოდ იმის დემონსტრირებას ცდილობდა, რომ ის თავისიანის დაჩაგვრის უფლებას არავის მისცემენ იმიტომ, რომ პოლიცია არანაირ ზომებს არ იღებს.
საფრანგეთის პრეზიდენტმა ემანუელ მაკრონმა საგარეო საქმეთა სამინისტროს დაავალა, შეისწავლოს ქვეყნიდან იმ უცხოელების გაძევების საკითხი, რომლებიც დიჟონის არეულობებთან არიან კავშირში, აცხადებს რადიოსადგური RTL.
