ანაკლიის პორტი, სავალდებულო ჯარი, "ომის და სიკვდილის პარტია" - რა თქვა პრემიერმა მთავრობის სხდომაზე
რა თქვა პრემიერმა მთავრობის სხდომაზე
12 დეკემბრის მთავრობის სხდომაზე საქართველოს პრემიერმინისტრმა ირაკლი ღარიბაშვილმა განაცხადა, რომ ანაკლიის პორტი აშენდება სახელმწიფოს თანამონაწილეობით ინვესტორ კომპანიებთან ერთად, თუმცა პორტის 51%-იანი წილის მფლობელი სახელმწიფო იქნება. პრემიერმა ასევე ისაუბრა იმის შესახებ, რომ “ომის და სიკვდილის პარტიას” [ნაციონალურ მოძრაობას] სურდა მეორე ფრონტი, მაგრამ მათ მიიღეს ორნიშნა ეკონომიკური ზრდა. მისივე თქმით, დაიხურება ვითომ რელიგიური ორგანიზაციები, რომლითაც ჯარს თავს არიდებდნენ.
რაზე ისაუბრა მთავრობის მეთაურმა. მოკლედ:
ანაკლიის პორტი
ღარიბაშვილის თქმით, ანაკლიის პორტი სახელმწიფოს თანამონაწილეობით ინვესტორ კომპანიებთან ერთად აშენდება, თუმცა პორტის 51%-იანი წილის მფლობელი სახელმწიფო იქნება:
“დანარჩენზე ჩვენ გამოვაცხადებთ საერთაშორისო კონკურსს და შევარჩევთ პარტნიორებს.ეს პროექტი მიტოვებულია, ადგილი გაპარტახებულია, მტვრის ბუდედ გადააქციეს ადგილი. ეს კატეგორიულად მიუღებელია, ჩვენ სასწრაფოდ უნდა შევარჩიოთ საერთაშორისო პარტნიორი კომპანიები და ჩვენც უნდა დავიწყოთ ინვესტირება ამ პროექტში. პროექტი განხორციელდება ჩვენი თანამონაწილეობით – სახელმწიფო განახორციელებს ამ პროექტს სხვა კომპანიებთან ერთად”.
ანაკლიაში ღრმაწყლოვანი პორტის აშენების იდეა ჯერ კიდევ საქართველოს წინა ხელისუფლებას გაუჩნდა. პროექტის განხორციელება კი, უკვე ამჟამინდელი მთავრობის პირობებში დაიწყო.
2016 წელს ტენდერში გაიმარჯვა “ანაკლიის განვითარების კონსორციუმმა”, რომლის ერთ-ერთი დამფუძნებელი კომპანია „თიბისი ჰოლდინგია“ („თიბისი ჰოლდინგს“ საქართველოს ყველაზე მსხვილი ბანკის „თიბისი ბანკის” სამეთვალყურეო საბჭოს ყოფილი თავმჯდომარე მამუკა ხაზარაძე ფლობს).
ტენდერი პრემიერ კვირიკაშვილის დროს ჩატარდა.
მოგვიანებით, ურთიერთობა დაიძაბა კვირიკაშვილსა და ქვეყნის ფაქტობრივ მმართველს, ბიძინა ივანიშვილს შორის. ამ დაძაბულობის ფონზე კვირიკაშვილი პრემიერის თანამდებობიდან გადადგა. ახალმა მთავრობამ დაიწყო მის დროს მიღებული გადაწყვეტილებების გადახედვა. მათ შორის, პრობლემები შეექმნა კვირიკაშვილთან დაახლოებულ ბიზნესმენს, “ანაკლიის განვითარების კონსორციუმის” თანათავმჯდომარეს, მამუკა ხაზარაძესაც – ხაზარაძის წინააღმდეგ სისხლის სამართლის საქმე აღძრეს თიბისის ერთ-ერთ ტრანზაქციასთან დაკავშირებით. 9 იანვარს კი ხაზარაძის კონსორციუმს ანაკლიის აშენების უფლება ჩამოართვეს.
ანაკლია საქართველოსთვის სტრატეგიულად მნიშვნელოვანი პროექტია, რადგან იგი გზას გაუხსნის ცენტრალური აზიის ტვირთებს ევროპისკენ და პირიქით.
პირველ ქართულ ღრმაწყლოვან პორტს, რომელიც ანაკლიაში შენდებოდა, პრეტენზია აქვს, რომ თურქეთისა და რეგიონის სხვა ქვეყნების პორტების სერიოზული კონკურენტი გახდეს. პორტის აშენებას მხარს უჭერს აშშ-ც. პროექტის წინააღმდეგი იყო რუსეთი და ამის შესახებ რუს მაღალჩინოსნებს არაერთი საჯარო განცხადება გაუკეთებიათ.
“ომის და სიკვდილის პარტია”
“ყველაა მიმართულებით გვაქვს ძალიან სერიოზული პროგრესი, ეს განაპირობა ორნიშნა ეკონომიკურმა ზრდამ და რაც მთავარია, ქვეყნის მთლიანი შიდა პროდუქტი გაიზარდა თითქმის 30 მილიარდი ლარით ბოლო 2-3 წელიწადში, გაისად მთლიანი შიდა პროდუქტი იქნება 80 მილიარდი ლარი.
პერ კაპიტა გამოდის თითქმის 7500 დოლარი. ასე რომ ეს სერიოზული პროგრესია, ეს განაპირობა, კიდევ ვიმეორებ, არავის არ ვაყვედრით, მაგრამ ეს უნდა იცოდნენ ყველამ და განსაკუთრებით იმ ექსტრემისტებმა, რომლებიც ქვეყნის ომში ჩართვას გეგმავდნენ, ომის და სიკვდილის პარტიამ, ასე ვუწოდებ მათ. მათ უნდოდათ მეორე ფრონტის გახსნა, ქვეყნის დანგრევა, პოლიგონად გადაქცევა და მიიღეს სანაცვლოდ ორნიშნა ეკონომიკური ზრდა, ზედიზედ ორი წელია და ეს პროგრესი.” – განაცხადა ღარიბაშვილმა.
● სოფელ-სოფელ დადიან და ეძებენ ადამიანებს, ვინ წაიყვანონ უკრაინაში – მამუკა მდინარაძე
● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს
დაიხურება “ბიბლიური თავისუფლება” და სტუდენტებს სავალდებულო ჯარის გავლა ყოველ წელს შეეძლებათ
ღარიბაშვილის თქმით, აღმოიფხვრება საკანონმდებლო ხარვეზი და დაიხურება “ვითომ რელიგიური ორგანიზაციები”, რომლითაც ახალგაზრდები ჯარს თავს არიდებდნენ. ღარიბაშვილმა პარტია “გირჩის” მიერ დაფუძნებულ “ბიბლიური თავისუფლების” დახურვაზე ისაუბრა.
“საქართველოს ქრისტიანული, ევანგელისტური, პროტესტანტული ეკლესია – ბიბლიური თავისუფლება” – ასე ჰქვია რელიგიურ ორგანიზაციას, რომელიც პოლიტიკურმა მოძრაობა “გირჩმა” 2017 წლის მარტში დაარეგისტრირა.
2017 წლიდან დღემდე, გირჩის ბიბლიურმა თავისუფლებამ მღვდელმსახურის მოწმობა დაახლოებით 50 000 ადამიანზე გასცა. ამ დოკუმენტით ახალგაზრდებმა სავალდებულო სამხედრო სამსახურისგან თავის არიდება შეძლეს.
საქართველოს კანონმდებლობით, თუკი ადამიანი ღვთისმსახურებას ეწევა ან სასულიერო სემინარიის სტუდენტია, მას სამხედრო სამსახურის გადავადების უფლება აქვს.
“ეს იყო ე.წ. აი ეს მავნებლური, გირჩის მოგონილი უმსგავსო, ანტიეროვნული, ანტისახელმწიფოებრივი რაღაც პროგრამა, რომელიც რეალურად ახალგაზრდებს აბნევდა და სთავაზობდა ალტერნატიულ სამსახურს. ეს ჩვენ კარგად ვიცით, რომ იყო ფიქტიური ვითომ რაღაც რელიგიური სამსახური. როგორ შეიძლება, ეს იყო ყველაზე დიდი მკრეხელობა და სისაძაგლე, პირდაპირ დავარქმევ ამ სახელს, არ შეიძლება ამაზე თვალი დავხუჭოთ და ჩვენი ვალია, რომ ეს საკითხი მოვაგვაროთ და მოვაგვარეთ კიდეც.” – თქვა პრემიერმა.
მისივე თქმით, ეს საკითხი გავლილია საპატრიარქოსთანაც და შესაბამისი ჩანაწერის მიხედვით აღნიშნული საკითხი “მოგვარდება ერთხელ და სამუდამოდ.”
“ჩვენ აღარ მივცემთ ამ მავნებლებს ჩვენი ახალგაზრდა ჯანსაღი თაობის არასწორ გზაზე დაყენების საშუალებას”, – დასძინა ღარიბაშვილმა.
მთავრობის სხდომაზე ირაკლი ღარიბაშვილმა სავალდებულო სამხედრო სამსახურის რეფორმაზეც ისაუბრა და აღნიშნა, რომ მთავრობის გადაწყვეტილებით, წვევამდელები სამხედრო სამსახურის გავლას მხოლოდ თავდაცვის უწყებებში შეძლებენ, ხოლო სტუდენტებს სავალდებულო სამსახურის გავლა 4-წლიანი სტუდენტობის ყოველ წელს ერთი თვით შეეძლებათ. ღარიბაშვილის თქმით, ცვლილებები 2025 წლიდან ამოქმედდება.
● “გირჩმა” რელიგიური ორგანიზაცია დააარსა და წვევამდელების მღვდლად კურთხევას აპირებს
აუცილებელია, დაიგეგმოს მთელი ქვეყანა
ირაკლი ღარიბაშვილის თქმით, აუცილებელია, დაიგეგმოს მთელი ქვეყანა, რომ აღარ იყოს ქაოტური განვითარება:
“ვმუშაობთ აქტიურად მთელი ქვეყნის მასტერ პლანზე ანუ გენგეგმაზე. აუცილებელი არის, დაიგეგმოს მთელი ქვეყანა, რომ აღარ იყოს ქაოტური განვითარება. ჩვენ ყველა ქალაქის გენგეგმას გავამზადებთ, გვინდა, რომ ჩამოვიყვანოთ მაგარი კომპანიები, ყველაზე წარმატებული უცხოური ევროპული კომპანიები, რომლებიც მიიღებენ მონაწილეობას ჩვენს ქართულ კომპანიებთან ერთად და დაიდება ერთხელ და სამუდამოდ მთელი ქვეყნის განვითარების გეგმა.”
● საქართველოს მთავრობა: 2030 წლისთვის საქართველო მაღალი შემოსავლების მქონე ქვეყნების რიგში გადაინაცვლებს
