საქართველოს საგარეო საქმეთა სამინისტროში საქართველოში პოლონეთის ელჩის მოვალეობის შემსრულებელთან, მარიუშ პიეტრ ჟაკთან შეხვედრა გაიმართა, რომელიც ექსპრეზიდენტ მიხეილ სააკაშვილთან პოლონელი ექიმების ვიზიტს და ბიოლოგიური ნიმუშის სავარაუდო გატანის მცდელობას შეეხებოდა.
სპეციალური პენიტენციური სამსახური აცხადებს, რომ ერთ-ერთმა პოლონელმა ექიმმა, რომელიც მიხეილ სააკაშვილთან იყო შესული, ფეხსაცმლის საშუალებით მალულად ნიმუშის გატანა სცადა.
პენიტენციური ვიდეოკადრებსაც ავრცელებს, რომელზეც სავარაუდოდ ექიმს ფეხსაცმლის გახდა მოსთხოვეს, საიდანაც გადახვეული ქაღალდი ამოიღეს.
კლინიკა “ვივამედის” დირექტორი, ნინო ნადირაძე ამბობს, რომ პოლონელმა ექიმებმა მიხეილ სააკაშვილისგან თმისა და ფრჩხილის ნიმუშები აიღეს. ნადირაძე ასევე განმარტავს, რომ პოლონელ ექიმს ნიმუშის ფეხსაცმლით გატანაზე “უაზრო განმარტება” ჰქონდა.
“შემოვიდნენ აიღეს თმა და ფრჩხილი მოწმეების თანდასწრებით, პროტოკოლით. ნაწილი დარჩა კლინიკაში, ნაწილი დარჩათ მათ და როგორც ჩანს გამოსამშვიდობებლად რომ შევიდა, მაშინ გამოიტანა. რაღაც უაზრო განმარტება იყო, რომ წინდებში ინახავს ხოლმე ყველაფერს”, – თქვა ნადირაძემ.
იუსტიციის მინისტრი, რატი ბრეგაძე პოლონელ ექიმთან დაკავშირებით სპეციალურ განცხადებას ავრცელებს და აცხადებს, რომ მას პალატიდან ნამდვილად მიხეილ სააკაშვილისგან აღებული ნიმუში გაჰქონდა. მისი მტკიცებით, ახსნა-განმარტებაში ეს ექიმმა თავად დაადასტურა.
“ფაქტი ჯიუტია, ჩვენ ვიყავით და ვართ ჩვენი პირობის ერთგული, შევუშვით პოლონელი ექიმები და გავატანეთ მათ ასევე ოფიციალურად აღებული ნიმუშები. თუმცა, მოგვიანებით, ვიხილეთ ექიმის მიერ, ყველა წესის დარღვევით, მსჯავრდადებულისგან აღებული ნიმუშების ფეხსაცმლის მეშვეობით მალულად გატანის მცდელობა.” – განაცხადა ბრეგაძემ.
საგარეო უწყებაში დაბარებული იყო პოლონეთის ელჩი, მარიუშ მაშკიევიჩი, თუმცა ის საქართველოში არ იმყოფება.
უწყების ცნობით, შეხვედრის თემა მიხეილ სააკაშვილთან შესულ პოლონელ ექიმს ეხებოდა. კერძოდ, მათი თქმით, ქართულმა მხარემ შეშფოთება დააფიქსირა პოლონელ მედიკოსთან დაკავშირებული ინციდენტის გამო.
“პოლონელ დიპლომატს კიდევ ერთხელ განემარტა, რომ სახელმწიფო დაინტერესებულია საზოგადოებას ჰქონდეს სრული ინფორმაცია მიხეილ სააკაშვილის ჯანმრთელობის მდგომარეობის შესახებ. შესაბამისად, არაერთხელ გამოხატა მზადყოფნა ოჯახის სურვილის შემთხვევაში კლინიკაში უცხოელი ექიმების დაშვების თაობაზე, რისი დასტურიცაა პოლონელი ექიმების ვიზიტი მსჯავრდებულ სააკაშვილთან ოჯახის შუამდგომლობითა და პოლონეთის საელჩოს მხარდაჭერით, მიუხედავად იმისა, რომ სტრასბურგის ადამიანის უფლებათა სასამართლოს გადაწყვეტილებით მსჯავრდებულ სააკაშვილს უარი ეთქვა პოლონეთში სამკურნალოდ გადაყვანაზე”, – აღნიშნულია სამინისტროს მიერ გავრცელებულ განცხადებაში.
უწყების ინფორმაციით, შეხვედრაზე ქართულმა მხარემ გაუსვა ხაზი, რომ პოლონელ მედიკოსთა მისიაში შემავალი ერთ-ერთი ექიმის საქციელი “იწვევს გაუგებრობას, შეშფოთებას და ასევე სანდოობას უკარგავს მთელს პროცესს”.
“საგარეო საქმეთა სამინისტროში პოლონელ დიპლომატს ეთხოვა მომხდარზე პოზიციის დაფიქსირება. შეხვედრაზე პოლონელმა დიპლომატმა აღნიშნა, რომ იგი არ არის ინფორმირებული თუ რამ გამოიწვია პოლონელი ექიმის მსგავსი საქციელი”, – ამბობენ საგარეოში.
● 3 ივლისს სააკაშვილმა ვიდეო ბმულით მიიღო მონაწილეობა სასამართლო სხდომაში, სადაც 7 ნოემბრის აქციის დარბევის საქმეს განიხილავენ. სასამართლო დარბაზიდან გადაღებულ ფოტოზე ჩანს, თუ რამდენად დაიკლო წონაში საქართველოს ყოფილმა პრეზიდენტმა, რომელიც 2021 წლის ოქტომბრიდან პატიმრობაშია.
● უკრაინის პრეზიდენტმა ვოლოდიმირ ზელენსკიმ იმავე დღეს მიხეილ სააკაშვილის სამკურნალოდ უკრაინაში გადაყვანა მოითხოვა.
● უკრაინის საგარეო საქმეთა მინისტრის, დმიტრო კულებას თქმით, მიხეილ სააკაშვილის სასამართლო პროცესის კადრების გამოქვეყნების შემდეგ ყველაფერმა “დუღილის წერტილს მიაღწია“, რის გამოც კიევმა მკვეთრი, მაგრამ “სამართლიანი ნაბიჯი“ გადადგა.
● მანამდე 16 ივნისს მიხეილ სააკაშვილმა განაცხადა, რომ ის აპირებს “ძალიან” აქტიურად ჩართვას ქართულ პოლიტიკაში.
● მიხეილ სააკაშვილი პატიმრობაში 2021 წლის შემოდგომიდან იმყოფება. იგი მას შემდეგ დააკავეს, რაც საქართველოს საზღვარი უკანონოდ გადაკვეთა და საქართველოში დაბრუნდა.
● ციხეში სააკაშვილის ჯანმრთელობის მდგომარეობა გაუარესდა. 2022 წლის მაისიდან პოლიტიკოსი თბილისში, კლინიკა „ვივამედშია“. 20-ზე მეტი დამოუკიდებელი ექიმი აცხადებს, რომ სააკაშვილი მძიმე მდგომარეობაშია.
● მესამე პრეზიდენტის ოჯახის წევრები და ადვოკატები ჯანმრთელობის მდგომარეობის გამო, სააკაშვილისთვის სასჯელის გადავადებას ან სასჯელისგან გათავისუფლებას ითხოვდნენ და ამ შუამდგომლობით სასამართლოს მიმართეს. თუმცა მიხეილ სააკაშვილს სასამართლომ სასჯელი არ გადაუვადა. გადაწყვეტილება დასკვნით სხდომაზე მოსამართლე გიორგი არევაძემ გამოაცხადა.
● 2023 წლის 12 მაისს მიხეილ სააკაშვილს სტრასბურგის სასამართლომ პოლონეთში სამკურნალოდ გადაყვანაზე უარი უთხრა. სააკაშვილის ადვოკატის, შოთა თუთბერიძის განმარტებით, სტრასბურგის სასამართლოს სააკაშვილის საქმეზე საბოლოო გადაწყვეტილება არ მიუღია და ეს პასუხი მხოლოდ “ე.წ. დროებით ღონისძიებას ეხება” მიხეილ სააკაშვილის სამკურნალოდ გადაყვანის თაობაზე.
