პოდოლიაკი: საქართველოს ხელისუფლებამ ტონი უნდა შეცვალოს

პოდოლიაკი საქართველოს ხელისუფლებაზე

უკრაინის პრეზიდენტის ადმინისტრაციის ხელმძღვანელის მრჩეველმა მიხაილო პოდოლიაკმა “მთავარ არხთან” ინტერვიუში საქართველოს ხელისუფლება გააკრიტიკა უკრაინასთან დაკავშირებული პოზიციის გამო და აღნიშნა, რომ თუ “ქართული ოცნების” ხელისუფლება ტონს არ შეცვლის, შეიძლება მას საერთაშორისო იზოლაცია დაემუქროს.

პოდოლიაკმა ასევე აღნიშნა, რომ საქართველოს არაფორმალური მმართველისთვის, ბიძინა ივანიშვილისთვის სანქციების დაწესების მომხრეა.

__________________________________

“მაშინ, როცა უკრაინაში მშვიდობიან მოსახლეობას ხოცავენ, ვერავინ შეძლებს ჩვენს გაკიცხვას და ვერავინ იტყვის, რომ რაღაც არ გვესმის. საქართველოში თანამდებობის პირებმა ტონი უნდა შეცვალონ და თუ გარკვეული მიზეზების გამო, ეს არ შეუძლიათ, მაშინ საჯარო გამოსვლები, რომელიც უკრაინას ეხება, შეამცირონ – ეს მათი რეპუტაციისთვის კარგი იქნება,”– განაცხადა მან.

მისი თქმით, სუბიექტები, რომლებიც უკრაინაში მიმდინარე გენოციდს ამართლებენ, თავად გასამართლდებიან საერთაშორისო საზოგადოების მხრიდან. პოდოლიაკი ერთმანეთისგან მიჯნავს საქართველოს ხელისუფლებას და ქართველ ხალხს:

„პირადად მე და ასევე პრეზიდენტ ზელენსკის და დავით არახამიას კარგად გვესმის, რომ ქართველი ხალხი უკრაინის გვერდით დგას. ამ ერს კარგად ესმის უკრაინაში მიმდინარე ომის არსი. ეს ხალხი თავისუფლების და დემოკრატიის ღირებულებებს იზიარებს”.

● ყველა ამბობს, რომ საქართველოში არაფორმალური მმართველობაა. რაში გამოიხატება ის? მაგალითები

● არის თუ არა ივანიშვილი ოლიგარქი, ხალხმა უნდა განსაზღვროს – კელი დეგნანი

● ქადაგიძე: 10 ნაბიჯი რასაც საქართველოს ხელისუფლება გადადგამდა, უკრაინას ნამდვილად რომ უჭერდეს მხარს

გარდა ამისა, მან ისაუბრა ყოფილ პრემიერ ბიძინა ივანიშვილზე და აღნიშნა, რომ აუცილებელია ივანიშვილს სანქციები დაუწესდეს. ის დარწმუნებულია, რომ ინდივიდუალური სანქციები იქნება.

„როგორც საქართველოში, ისე უკრაინაში იყო გამდიდრებული ადამიანების ტალღა. მათ ოლიგარქებს ვუწოდებთ. ბევრი ფული აქვთ. ყიდულობენ პარტიებს, პარლამენტში მანდატებს ითვისებენ და პოლიტიკურ პროცესებზე გავლენა აქვთ. უკრაინამ ეს გაითავისა და ამის წინააღმდეგ გამოვიდა. ვცდილობთ, ეს პროცესი ბოლომდე მივიყვანოთ. საქართველოც ამ გზით უნდა წავიდეს. უნდა იყვნენ დიდი ბიზნესმენები, თუმცა მათ პოლიტიკაზე გავლენა არ უნდა ჰქონდეთ. სამწუხაროდ, დღეს საქართველოში ამას ვერ ვხედავთ. დეოლიგარქიზაცია ეფექტური გზაა და დარწმუნებული ვარ ქვეყანა ამ გზას გაივლის. სანქციების გამო რუსეთში ბევრი ადამიანი დიდ საფასურს იხდის. აქედან გამომდინარე სასურველი იქნება რომ ქართველმა ოლიგარქებმაც, რომლებიც რუსეთის მხარეს დგანან, შესაბამისი საფასური გადაიხადონ“, – განაცხადა პოდოლიაკმა.