აქცია პარლამენტთან - შეკრებილები ე.წ. "აგენტების კანონს" აპროტესტებენ
პარლამენტთან აგენტების კანონს აპროტესტებენ
თბილისში, საქართველოს პარლამენტის წინ, საპროტესტო აქცია მიმდინარეობს. აქცია სპონტანურად დაიგეგმა მას შემდეგ, რაც დღეს, 2 მარტს, პარლამენტის საგარეო ურთიერთობათა კომიტეტმა ხმაურისა და პროტესტის ფონზე განიხილა „უცხოური გავლენის გამჭვირვალობის შესახებ” კანონპროექტები.
პარლამენტის მიმდებარედ სამართალდამცველების უპრეცენდენტო მობილიზებაა. მას შემდეგ, რაც აქციის მონაწილეთა ნაწილმა პარლამენტის შესასვლელისა და გამოსასვლელის პიკეტირება სცადა, პოლიციამ აქციის სამი მონაწილე დააკავა. [დაკავებულთა რაოდენობა ზუსტდება_JAMnews]
![](https://jam-news.net/app/uploads/2023/03/2-1024x683.png)
აქციის მონაწილეებმა პიკეტირების მოწყობა იმ დეპუტეტბისთვის გადაწყვიტეს, ვინც აქციის პარალელურად, შენობაში, კანონპროექტების განხილვას აგრძელებს.
პოლიცია ცდილობს აქციის მონაწილეებს შესასვლელ-გამოსასვლელის მიმდებარე ტერიტორია დაატოვებინოს. ამ ტერიტორიებზე რამდენიმე დაპირისპირების კერაა.
საქართველოს პარლამენტის წინ აქცია 18:00 საათზე დაიწყო. პარლამენტის წინ შეკრებილი არიან მოქალაქეები, ოპოზიციური პარტიების წარმომადგენლები, არასამთავრობო სექტორი. აქციას უერთდებიან სტუდენტებიც.
აქციაზე სიტყვით გამომსვლელები ამბობენ, რომ ამ კანონის მიღებით საქართველო საბოლოოდ დაშორდება ევროპას, ამიტომ ამ კანონის მიღება არ უნდა დაუშვან.
ვიდრე აქცია დაანონსდებოდა, მთელი დღის განმავლობაში ხმაური იყო საქართველოს პარლამენტში, სადაც საკომიტეტო სხდომა იყო დაგეგმილი.
მედია და არასამთავრობო სექტორი კომიტეტის სხდომაზე არ დაუშვეს. სხდომის პარალელურად, ისინი აქციას მართავდნენ პარლამენტშიც და შენობის გარეთაც.
“არა რუსულ კანონს!”, “მონებო!”, “არა მოღალატეებს!” – ისმოდა პარლამენტის შენობაში.
ხმაურიანი პროტესტის გამო საკომიტეტო მოსმენა დაგვიანებით დაიწყო, თუმცა, უმრავლესობამ სხდომა მაინც ჩაატარა. კომიტეტის სხდომას ზოგიერთი ოპოზიციონერი დეპუტატიც ვერ დაესწრო, ისინი მანდატურებმა ძალის გამოყენებით გაიყვანეს სხდომიდან.
კომიტეტის სხდომაზე კანონპროექტის ავტორი დეპუტატები ისევ აპელირებდნენ იმაზე, რომ ამ კანონის მთავარი მიზანი გამჭვირვალობაა და რომ ეს კანონი არსებობს ამერიკაშიც.
![](https://jam-news.net/app/uploads/2023/03/1-1024x683.png)
“ამერიკამ ეს კანონი გასული საუკუნის 30-იან წლებში ეროვნული უსაფრთხოების შესანარჩუნებლად მიიღო და დღეს შენთვის ეროვნული უსაფრთხოება არის ძალაუფლების შენარჩუნება”, – მიმართა დეპუტატებს ოპოზიციონერმა დეპუტატმა თეონა აქუბარდიამ.
კიდევ ერთმა ოპოზიციონერმა დეპუტატმა ხათუნა სამნიძემ მმართველი პარტიის წარმომადგენლებს პუტინისტები უწოდა:
„ვინც ამას ხელი მოაწერა, თითოეული თქვენგანი ხართ პუტინისტები, ამ ქვეყნის მტრები, ამ ქვეყნის წინააღმდეგ რომ გააკეთებთ ყველაფერს. ნოლი გაქვთ პოლიტიკური ნება. რაც დაგიწერეს, იმას აკეთებთ და სულ ფეხებზე გკიდიათ ყველაფერი, რაც ხდება“.
მიუხედავად ამ ხმაურისა, კომიტეტის სხდომა მაინც გაიმართა. სხდომა ამ წუთებშიც [20:00 სთ] გრძელდება.
● რას ნიშნავს კანონი უცხოელი აგენტების შესახებ, რომელსაც “ქართული ოცნება” იღებს. რა ვიცით ამ დროისთვის
● “რუსული კანონის მსგავსია” – ამერიკელი სენატორების ვიზიტი საქართველოში. მთავარი
●რას ფიქრობენ უცხოელი და ქართველი ექსპერტები “უცხოური აგენტების” შესახებ კანონპროექტზე. სპოილერი: კარგს არაფერს
საქართველოს მთავრობა აპირებს მიიღოს კანონი, რომლის მიხედვით, ის არასამთავრობო და მედია ორგანიზაციები, რომლებიც უცხოეთიდან ფინანსდებიან, „უცხოური გავლენის აგენტებად“ უნდა დარეგისტრირდნენ.
27 თებერვლის მდგომარეობით, პარლამენტში ორი კანონპროექტია დარეგისტრირებული: ერთი 14 თებერვალს დარეგისტრირდა და ის რუსული კანონის ანალოგია; მეორე კი, ალტერნატივის სახით დარეგისტრირდა მას შემდეგ, რაც პირველს დიდი კრიტიკა მოჰყვა. ეს მეორე, მისი ავტორების თქმით, არის ამერიკული კანონის (FARA-ს) ანალოგი. მათ თქვეს, რომ FARA პირდაპირ თარგმნეს.
ორივე კანონპროექტის ავტორია მოძრაობა „ხალხის ძალა“, რომელიც მმართველი გუნდისგან ფორმალურად გამოყოფილმა დეპუტატებმა ჩამოაყალიბეს. „ხალხის ძალა“ მკვეთრად ანტიდასავლური განცხადებებით გამოირჩევა. მეტიც, მისი წევრები პირდაპირ აღიარებენ, რომ ეს პარტია შეიქმნა იმისთვის, რომ “ხალხს სიმართლე უთხრას დასავლეთის შესახებ, რომელიც საქართველოს ომში ჩათრევას ცდილობს”.
კანონპროექტს აკრიტიკებს ყველა, მმართველი პარტიის გარდა: ადგილობრივი არასამთავრობო და მედია სექტორი, ოპოზიცია, ექსპერტები და ის პოლიტიკოსები, რომლებიც ცოტა ხნის წინ “ქართული ოცნების” ხელისუფლებაში იყვნენ და საქართველოს პრეზიდენტიც კი.
კანონპროექტს მკაცრად აკრიტიკებენ საქართველოს დასავლელი პარტნიორები სხვადასხვა საერთაშორისო ორგანიზაციებიდან, ამერიკელი სენატორები თუ ევროპელი დეპუტატები. ამერიკის ელჩმა კი მას პირდაპირ უწოდა “რუსული კანონი”.
პარლამენტთან აგენტების კანონს აპროტესტებენ