"ანორექსია და კუნთების დაშლა" - ომბუდსმენის კონსილიუმმა სააკაშვილზე დასკვნა გამოაქვეყნა
ომბუდსმენის კონსილიუმმა სააკაშვილზე დასკვნა გამოაქვეყნა
საქართველოს სახალხო დამცველის, ნინო ლომჯარიას მიერ შექმნილმა ექიმთა კონსილიუმმა მიხეილ სააკაშვილის ჯანმრთელობასთან დაკავშირებით დასკვნა მოამზადა. როგორც კონსილიუმის წევრი, ნევროლოგი თენგიზ წულაძე აცხადებს, მიხეილ სააკაშვილს აქვს ცილოვანი შიმშილი. ექიმის თქმით, სააკაშვილი დღეში რეგულარულად მოხმარებადი კალორიის დაახლოებით 1/4-ს იღებს, ორგანიზმი კი ამ დროს “საკუთარ თავს ინელებს.”
“რაც ვნახეთ, უფრო სუსტად გამოიყურება. ჩვენ გავეცანით ისტორიის მონაცემებს, ვნახეთ გარკვეული დარღვევები, რაც მიუთითებს იმას, რომ პაციენტს უარყოფითი კატაბოლური მდგომარეობა აქვს, რაც ნიშნავს იმას, რომ ორგანიზმი ინელებს საკუთარ თავს. ის ცილები, რომლებიც მას არ მიეწოდება გარედან, კუნთების დაშლის საშუალებით იღებს ამ ცილებს, შესაბამისად კუნთოვანი მასა მკვეთრად მცირდება ამ დროს. მდგომარეობა ამიტომაა გაუარესებული”, – ამბობს წულაძე.
კონსილიუმის აზრით, ამის გამომწვევი შესაძლოა იყოს რეზისტენტული პოსტტრავმული სტრესული აშლილობა და დეპრესია, რამაც საბოლოოდ მოგვცა ანორექსია ანუ მადის დაქვეითება. წულაძის განმარტებით, სააკაშვილს ციხეში უტარდება ძირითადი მედიკამენტური მკურნალობა, თუმცა “ეს რეაბილიტაციისთვის საკმარისი არ არის.”
“ვერ ხდება შეთანხმება პაციენტსა და ციხის სამედიცინო პერსონალს შორის. ის უარს ამბობს შეგნებულად თუ შეუგნებლად ცილოვანი საკვების მიღებაზე, რასაც მოსდევს ცილოვანი შიმშილი. ეს არის ჩვენი დასკვნა.” – განაცხადა წულაძემ.
20 აპრილს საქართველოს მესამე პრეზიდენტი მიხეილ სააკაშვილი სასამართლო დარბაზში შეუძლოდ გახდა და ექიმის დახმარება ითხოვა. სასამართლო პროცესი, რომელზეც ექსპრეზიდენტის მიერ საზღვრის უკანონო კვეთის საქმეს განიხილავდნენ, დროებით შეწყდა.
ნახევარსაათიანი პაუზის შემდეგ სააკაშვილი დარბაზში დაბრუნდა და მისი ჯანმრთელობის შესახებ ისაუბრა. სააკაშვილის თქმით, მას აღენიშნება მუდმივი სისუსტე, უძილობა, კვირას, 17 აპრილს კი სრულად დაკარგა ფეხების კონტროლი.
მიხეილ სააკაშვილის დედა, გიული ალასანია მესამე პრეზიდენტის ქვეყნიდან დაუყოვნებლივ გაყვანას და შესაფერის კლინიკაში მოთავსებას ითხოვს. ასევე, დეპუტატ ეკა ხერხეულიძის თქმით, მიხეილ სააკაშვილს პრაქტიკულად საკვების მიღების გზა გადაუკეტეს და განუცხადეს, რომ ამანათებს ვეღარ მიიღებს.
განცხადება გაავრცელა პენიტენციურმა სამსახურმაც. მათი მტკიცებით, მიხეილ სააკაშვილს პატიმრობის პერიოდში ამანათი მხოლოდ ერთი დღით არ მიუღია. განცხადებაში ნათქვამია, რომ ყოფილი პრეზიდენტი, მისივე თანხმობით, ამანათის მიღებას შეგზავნაზე პასუხისმგებელი პირების მეშვეობით შეძლებს.
“საზოგადოების ინფორმირების მიზნით განვმარტავთ, რომ მ.სააკაშვილს, დაწესებულების ტერიტორიაზე არსებულ მაღაზიაში, შეუძლია ყველა იმ საკვები პროდუქტის შეძენა, რომელიც დაწესებულების დებულებით არ იკრძალება, მის კუთვნილ ბარათზე დარიცხული თანხის საშუალებით, ასევე მისთვის, ყოველდღიურად გათვალისწინებულია პატიმრისთვის განსაზღვრული სამჯერადი კვება” – აცხადებენ პენიტენციურ სამსახურში.
საქართველოს მესამე პრეზიდენტი მიხეილ სააკაშვილი, რომელიც ხელისუფლებას ძებნილად ჰყავდა გამოცხადებული, საქართველოში ფარულად დაბრუნდა. 1 ოქტომბერს ის დააკავეს და რუსთავის ციხეში გადაიყვანეს.
ყოფილი პრეზიდენტი 50 დღე შიმშილობდა. ბოლო ორი კვირა ის აღარ იღებდა აღარც სამკურნალო მედიკამენტებს. საბოლოოდ, მესამე პრეზიდენტი გორის სამედიცინო დაწესებულებაში 19 ნოემბერს გადაიყვანეს.
არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილებაც. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.
