"სააკაშვილი, შესაძლოა, მალე საწოლს მიჯაჭვული გახდეს" - ომბუდსმენის კონსილიუმი საგანგაშო დასკვნას აქვეყნებს

ომბუდსმენის კონსილიუმი სააკაშვილზე

სახალხო დამცველის მიერ შექმნილი კონსილიუმი, რომელმაც მიხეილ სააკაშვილი 2 აპრილს კლინიკა “ვივამედში” მოინახულა, საგანგაშო დასკვნას აქვეყნებს მესამე პრეზიდენტის ჯანმრთელობის მდგომარეობის შესახებ.

დასკვნის მიხედვით, პაციენტის მდგომარეობა 19 თებერვლის (წინა ვიზიტის) შემდეგ მნიშვნელოვნად დამძიმდა – მან ოთხი კილო დაიკლო, აქვს მეოთხე სტატიის კახექსია და მძიმე სარკოპენია.

“თუ წონის კლება გაგრძელდება, საქართველოს მესამე პრეზიდენტი “საწოლს მიჯაჭვული გახდება,” – წერია დასკვნაში.

დასკვნაში აღნიშნულია, რომ ლოგინიდან წამოდგომისას პაციენტს აღენიშნება წნევის ძლიერი ვარდნა 120/90-იდან 78/40-მდე:

“რასაც თან ერთვის წონასწორობის კარგვა და კოორდინაციის საგრძნობი მოშლა. აღსანიშნავია გონებრივი ფუნქციების მნიშვნელოვანი დაქვეითება, დეპრესია…

გამოხატულია მძიმე სარკოპენია. პაციენტმა დაიკლო კიდევ 4 კილოგრამი კუნთების მნიშვნელოვანი განლევის ხარჯზე.  გადაადგილება მნიშვნელოვნად შეზღუდულია სისუსტის გამო”.

სარკოპენია. სარკოპენია ჩონჩხის კუნთების მასის შემცირება და მისი ფუნქციის დაქვეითებაა. იგი დაბერების პროცესთან დაკავშირებული დაავადებაა. კუნთის მასა და კუნთის ძალა 30 წლის ასაკის შემდეგ ყოველწლიურად დაახლოებით 0.5-1%-ით ქვეითდება. სარკოპენია ვლინდება, როდესაც ეს პროცესი ხდება დამაუძლურებელი.

რაც შეეხება პროგნოზსა და რისკებს, ომბუდსმენის კონსილიუმის ცნობით, “პაციენტი შესულია აქტიური კატაბოლიზმის ფაზაში”

მათი განცხადებით, მიხეილ სააკაშვილისთვის კრიტიკულ წონას წარმოადგენს 52-53 კილოგრამი, რის შემდეგადაც დაიწყება ორგანიზმის შეუქცევადი ცვლილებები და ის საწოლს მიჯაჭვული გახდება.

კატაბოლიზმი მოიცავს სხეულში არსებული ნივთიერებების დეგრადაციის ყველა რეაქციას.

დასკვნაში ასევე ვკითხულობთ, რომ “ამჟამად ზედამხედველობის გარეშე პაციენტის მოძრაობა სახიფათოა“, რადგანაც ძალიან მაღალია დავარდნის, სხეულის დაზიანებისა/მოტეხილობების რისკი.

“ხოლო მოტეხილობის შემთხვევაში, კახექსიური სხეულის რესურსი იმისათვის რომ ჭრილობა ან მოტეხილობა შეხორცდეს, არის ძალიან დაბალი, რაც გამოიწვევს სხვა კრიტიკული გართულებების (სისხლჩაქცევა, ინფექცია, ღრმა ვენების თრომბოზი და ა.შ ) კასკადურ განვითარებას ლეტალური გამოსავლის მაღალი ალბათობით.” – ნათქვამია სპეციალისტთა/ექსპერტთა ჯგუფის დასკვნაში.

● მაგნიტსკის აქტის ავტორი: აშკარაა, რომ მიხეილ სააკაშვილს აწამებენ. ამის უკან ვლადიმირ პუტინი დგას
● სააკაშვილის საქმეები. რისთვის ზის ციხეში ყოფილი პრეზიდენტი
● დიდი ბრიტანეთის ლორდთა პალატამ სააკაშვილის ჯანმრთელობის საკითხი განიხილა

მესამე პრეზიდენტის ოჯახის წევრები და ადვოკატები ჯანმრთელობის მდგომარეობის გამო, სააკაშვილისთვის სასჯელის გადავადებას ან სასჯელისგან გათავისუფლებას ითხოვდნენ და ამ შუამდგომლობით სასამართლოს მიმართეს. თუმცა მიხეილ სააკაშვილს სასამართლომ სასჯელი არ გადაუვადა. გადაწყვეტილება დასკვნით სხდომაზე მოსამართლე გიორგი არევაძემ გამოაცხადა.

კლინიკა “ვივამედში” ამბობდნენ, რომ მიხეილ სააკაშვილის მასის ინდექსი არ შეესაბამება რეანიმაციაში მკურნალობის პარამეტრებს. კლინიკის დირექტორის, ნინო ნადირაძის თქმით, თუ დააპირებენ მის რეანიმაციაში მოთავსებას, ინფორმაციას აუცილებლად გაავრცელებენ. თუმცა 22 თებერვალს გამართულ პრესკონფერენციაზე კლინიკის ექიმებმა თავადაც არ უარყვეს, რომ ექსპრეზიდენტის მდგომარეობა მძიმეა – მათი თქმით, პაციენტს ზოგადი სისუსტე აწუხებს, არაბალანსირებულად იკვებება და წონაში კლებას აგრძელებს.

სააკაშვილის უცხოეთში სამკურნალოდ გადაყვანაზე საუბარი იყო ევროპარლამენტის რეზოლუციაშიც, სადაც დეპუტატებმა საქართველოს ხელისუფლებას ამ ნაბიჯის გადადგმისკენ კიდევ ერთხელ მოუწოდეს და აღნიშნეს, რომ მისდამი მოპყრობა იქნება “ლაკმუსის ტესტი” საქართველოს ხელისუფლებისთვის, მათ შორის კანდიდატის სტატუსთან დაკავშირებით. ევროპარლამენტარებმა მიმართეს საქართველოს პრეზიდენტსაც, რომ გამოიყენოს თავისი კონსტიტუციური უფლება მიხეილ სააკაშვილის შეწყალების მიზნით.