ოცნება გრატების სააგენტოს ქმნის, რომლის საქმიანობაც პროსამთავრობო არასამთავრობოების დაფინანსება იქნება
ოცნება გრატების სააგენტოს ქმნის
“ქართული ოცნება“ გრატების სააგენტოს ქმნის, რომლის საქმიანობაც ე.წ. პროსამთავრობო არასამთვრობო ორგანიზაციების დაფინანსება იქნება. სააგენტოს შექმნას “გრანტების შესახებ“ საქართველოს კანონში დაგეგმილი ცვლილება ითვალისწინებს, რომელსაც ერთპარტიული პარლამენტი დაჩქარებული წესით განიხილავს.
განმარტებითი ბარათის მიხედვით, სახელმწიფო გრანტის მართვის სააგენტოს ბიუჯეტი 20 მილიონი ლარი იქნება და სახელმწიფო ბიუჯეტიდან დაფინანსდება. სააგენტოში 10-მდე პირი დასაქმდება.
“იმ ფაქტის გათვალისწინებით, რომ საქართველოში საზოგადოებრივი ორგანიზაციების დაფინანსების წყაროდ მეტწილად უცხოური აქტორები გვევლინება, რომლებიც ძალაუნებურად განსაზღვრავენ აღნიშნული ორგანიზაციების საქმიანობის დღის წესრიგს, საქართველოს მთავრობის ინიციატივაა, რომ შეიქმნას საქართველოს მთავრობის კონტროლს დაქვემდებარებული საჯარო სამართლის იურიდიული პირი – სახელმწიფო გრანტის მართვის სააგენტო, რომლის მიზანი იქნება საქართველოს ბიუჯეტით საქართველოში მოქმედი საზოგადოებრივი ორგანიზაციების მხარდაჭერა, რომელთა საქმიანობის მიმართულებები თანხვედრაში იქნება ქვეყნის განვითარების პრიორიტეტულ მიმართულებებთან“, – ნათქვამია განმარტებით ბარათში.
ბოლო წლებია “ქართული ოცნება“ ორგანიზაციებს, რომლებიც საერთაშორისო გრანტებს იღებენ, დევნის და მათ ხან “დასავლეთის აგენტის” იარლიყს აწებებს, ხანაც პირდაპირ მტრებად მოიხსენიებს. სწორედ ასეთი ორგანიზაციების შესაზღუდად მიიღო ოცნების ერთპარტიულმა პარლამენტმა რუსული კანონი.
ამჯერად “ქართული ოცნება“ აპირებს, რომ უცხოური დაფინანსების ნაცვლად, თავად გასცეს გრანტები იმ ორგანიზაციებზე, “რომელთა საქმიანობის მიმართულებები თანხვედრაში იქნება ქვეყნის განვითარების პრიორიტეტულ მიმართულებებთან.“
აღსანიშნავია, რომ 2024 წლის 15 ივლისს პარლამენტის თავმჯდომარე შალვა პაპუაშვილი კიდევ ერთხელ, ფაქტების დამახინჯებით, თავს დაესხა დამოუკიდებელ მედია-გამოცემას, “ჯემნიუსს”. პარლამენტის თავმჯდომარემ უკვე მერამდენე განცხადებაში გაიმეორა სიცრუე, რომ თითქოს”ჯემნიუსის” თანამშრომელი “ქართული ოცნების” დეპუტატებს “84 ტყვიით დაემუქრა”.
“ჯემნიუსმა” არაერთხელ განმარტა, რომ პოსტი, რომელსაც პაპუაშვილი “კეფაში ტყვიის მუქარას” უწოდებს, იყო სტენსილი ვახუშტის ხიდზე და არა “ჯემნიუსის” მიერ გაკეთებული წარწერა. ვიდეო, რომელზეც პაპუაშვილი საუბრობს, არათუ “ჯემნიუსის” თანამშრომლის განცხადება არ ყოფილა, არამედ ჩვენი რედაქციის მიერ არც კი იყო გადაღებული.
მანამდე “ჯემნიუსის” შესახებ განცხადება პაპუაშვილმა რამდენჯერმე გააკეთა. ბოლო იყო 2024 წლის 11 ივნისს ფეისბუკზე დადებული პოსტი, სადაც იგი ასევე რამდენიმე ორგანიზაციას და კონკრეტულ ადამიანებს ახსენებდა, როგორც ძალადობის წამქეზებლებს. მათ შორის იყო “ჯემნიუსი” და “ჯემნიუსის” თანამშრომელიც.
ამ პოსტის დადებიდან ზუსტად ერთ საათში საკუთარ სახლთან თავს დაესხნენ და სასტიკად სცემეს სამოქალაქო მოძრაობა “სირცხვილიას” აქტივისტ ზუკა ბერძენიშვილს, რომელიც ასევე იყო ნახსენები პაპუაშვილის განცხადებაში.
