NDI-ის კვლევა: 50 პროცენტი მიიჩნევს, რომ საქართველოს მთავრობა კარგად მუშაობს

ამერიკის ეროვნულ დემოკრატიულმა ინსტიტუტმა, რომელიც საქართველოში პერმანენტულად ატარებს სოციოლოგიურ კვლევებს, ახალი, დეკემბერში ჩატარებული კვლევის შედეგები გამოაქვეყნა.

პანდემიის გამო, გამოკითხულებთან ინტერვიუები ტელეფონით ჩატარდა. 2,053 რესპონდენტი მარტივი შერჩევის გზით – შემთხვევით ნომერზე დარეკვის მეთოდით შეირჩა. 

მთავარი, რაც კვლევამ აჩვენა – გაზრდილია მთავრობის საქმიანობის და პირადად პრემიერ გახარიას მხარდაჭერა. შემცირებულია იმ ადამიანთა რიცხვი, ვინც საკუთარ შეხედულებებთან ახლოს მყოფ პარტიად ოპოზიციას ასახელებს.

მთავარი საკითხები, რომლებიც მოსახლეობას აწუხებს

კითხვაზე, რომელი ეროვნული საკითხებია თქვენთვის და თქვენი ოჯახისთვის ყველაზე მნიშვნელოვანი, პასუხები ასე განაწილდა: 

სამუშაო ადგილები – 46 პროცენტი;

სიღარიბე – 37 პროცენტი; 

ფასების ზრდა/ინფლაცია – 31 პროცენტი;

ტერიტორიული მთლიანობა – 22 პროცენტი;

კორონავირუსი – 16 პროცენტი.

რომელი პარტია დგას თქვენს შეხედულებებთან ყველაზე ახლოს?

ამ კითხვას გამოკითხულთან ნახევარმა – 49 პროცენტმა პასუხი არ გასცა. (24 პროცენტმა პასუხისგან თავი შეიკავა, 25 პროცენტმა კი არც ერთი პარტია არ დაასახელა).

ხოლო მათგან, ვინც პასუხი გასცა, 31 პროცენტმა ყველაზე ახლობელ პარტიად მმართველი გუნდი, “ქართული ოცნება” დაასახელა. ხუთმა პროცენტმა თქვა, რომ ეს “ნაციონალური მოძროაბაა”. სხვა ექვსმა პარტიამ კი (“პატრიოტთა ალიანსი”; “სტრატეგია აღმაშენებელი”; “გირჩი”; “ევროპული საქართველო”; “ლელო”; “ლეიბორისტული პარტია”) ჯამში 9 პროცენტი დააგროვა.

______________________________________________________________________________

• NDI, 2020 წლის ივლისი: გამოკითხულთა 53%-ს სჯერა, რომ რწმენა ადამიანს კორონავირუსისგან იცავს
  
• NDI, 2020 წლის ივლისი: ევროკავშირში გაწევრიანებას მხარს უჭერს გამოკითხულთა 76%, ხოლო ნატოში – 69%
  
• NDI, 2020 იანვარი: რას ფიქრობს ხალხი საქართველოში საპარლამენტო არჩევნებამდე ცხრა თვით ადრე

______________________________________________________________________________

მაგალითისთვის, 2020 წლის იანვარში ჩატარებული კვლევის მიხედვით, მოსახლეობის მხოლოდ 19 პროცენტი ასახელებდა “ქართულ ოცნებას” საკუთარ შეხედულებებთან ყველაზე ახლოს მდგარ პარტიად. და 14 პროცენტი ამბობდა, რომ ასეთი პარტია არის ოპოზიციური “ნაციონალური მოძრაობა”.

ხელისუფლების საქმიანობის შეფასება

გამოკითხულთა 50 პროცენტი მთავრობის საქმიანობას დადებითად აფასებს. 38 პროცენტი – ცუდად.

საკმაოდ მაღალია თავად მთავრობის მეთაურის რეიტინგი. პრემიერ-მინისტრის გიორგი გახარიას საქმიანობა გამოკითხულთა 46 პროცენტს მოსწონს. 32 პროცენტი მის საქმიანობას საშუალოდ აფასებს და მხოლოდ 17 – ცუდად.

ბევრად დაბალი რეიტინგი აქვს საქართველოს პრეზიდენტს. მხოლოდ 15 პროცენტი აფასებს მის საქმიანობას დადებითად.

პარლამენტის მუშაობას გამოკითხულთა მხოლოდ 15 პროცენტი აფასებს დადებითად.

რაც შეეხება ცენტრალური საარჩევნო კომისიას – 24 პროცენტი ფიქრობს, რომ ეს უწყება კარგად მუშაობს. 27 პროცენტი მას საშუალო შეფასებას აძლევს, ხოლო 32 პროცენტი – უარყოფითად აფასებს.

გაიკეთებთ თუ არა კორონავირუსის აცრას?

NDI-ს დეკემბრის კვლევის შედეგების თანახმად, მცირედით გაზრდილია იმ ადამიანთა რაოდენობა, ვინც ამბობს, რომ კოვიდვაქცინას გაიკეთებდა და ოჯახსაც აცრიდა. კითხვაზე, კორონავირუსის საწინააღმდეგო ვაქცინა/აცრა რომ არსებობდეს, აიცრებოდით თუ არა თქვენ და თქვენი შვილები? 41 პროცენტი პასუხობს “დიახ”. ეს მაჩვენებელი 2020 წლის ივნისში 38 პროცენტი იყო.

ამასთან, ამავე კითხვაზე, ასევე 41 პროცენტი პასუხობს, რომ კოვიდვაქცინას არ გაიკეთებდა, თუმცა მათი რაოდენობა ივნისთან (46%) შედარებით შემცირებულია. 

ნატო/ევროკავშირი

NDI- ის გამოკითხვები ტრადიციული კითხვები ნატოსა და ევროკავშირში გაწევრიანებას ეხება.

დეკემბრის კვლევის თანახმად, საქართველოს ევროკავშირში გაწევრიანებას მხარს მოსახლეობის 80 პროცენტი უჭერს და ეს მხოლოდ 8 პროცენტისთვისაა მიუღებელი.

რაც შეეხება ნატოს – 74 პროცენტისთვის გაწევრიანება მისაღებია, 9 პროცენტისთვის კი, მიუღებელი.