"მივიღე ჩემთვის ძალიან მძიმე გადაწყვეტილება" - ლევან ვასაძე პოლიტიკაში შემოდის

ულტრანაციონალისტური განწყობებით ცნობილი ბიზნესმენი ლევან ვასაძე, რომელიც ხშირადაა ჰომოფობიური და ქსენოფობიური აქციების ორგანიზატორი, პოლიტიკაში შემოდის. ლევან ვასაძის მოძრაობას „ერთობა, რაობა, იმედი“ ერქმევა.

ვასაძემ „თბილისი მარიოტში“ პოლიტიკური განცხადება გააკეთა და სამოქმედო გეგმა წარადგინა. მისი თქმით, ქვეყნის საზოგადოებრივ-პოლიტიკურ ცხოვრებაში შემოსვლის გადაწყვეტილება მას შემდეგ მიიღო, რაც შარლ მიშელის დოკუმენტზე „ქართული ოცნებისა“ და გაერთიანებული ოპოზიციის უმრავლესობის მხრიდან ხელმოწერა მოხდა.

მისი განმარტებით, ამ გადაწყვეტილებით მოხდა ქვეყნის სუვერენიტეტის უხეში ხელყოფა და შემცირება.

“აწი თუ ეს დოკუმენტი განხორციელდა და ძალაში შევიდა, ამ დოკუმენტის მიღების შედეგად ჩვენს ქვეყანას მისი ისედაც შევიწროებული, შეზღუდული, მყიფე და მცირე სუვერენიტეტი თითქმის აღარ რჩება იმ მარტივი მიზეზის გამო, რომ აწი ჩვენი სახელმწიფო თვითონ ვეღარ წყვეტს, როგორ იმუშაოს ცესკომ და როგორ დათვალოს ხმები. ის ვეღარ წყვეტს, ვინ დანიშნოს მოსამართლედ და ვინ არა, უცხოელების ჩარევის გარეშე. ის ვეღარ წყვეტს, როგორ ამუშაოს ანტიკონსტიტუციური ინსტიტუტები და სტრუქტურები თავის შიგნით. ეს სამივე გახლავთ, ნებისმიერი სახელმწიფოს სუვერენიტეტისათვის საკვანძო, ფუნდამენტური საკითხები და გაქარწყლება,  ფრაგმენტაცია … როგორც არ უნდა გვიხსნიდნენ ჩვენი უცხოელი პარტნიორები, რომ ეს ხდება საუკეთესო სურვილებით, რომ ჩვენ დაგვეხმარონ ამ მიმართულებით, ეს ნიშნავს აუცილებლად ქვეყნის სუვერენიტეტის კიდევ უფრო შემცირებას“, – განაცხადა ვასაძემ.

ვასაძემ აღნიშნა ისიც, რომ საქართველოს ვალი მისულია საგანგაშო, კატასტროფულ ნიშნულებამდე და სწორედ ამიტომ, ის აპირებს ქვეყნის ჩიხიდან გამოყვანას: 

„მივიღე ჩემთვის ძალიან მძიმე პირად ჭრილში გადაწყვეტილება, რომ დავემშვიდობო საბოლოოდ ჩემთვის ასე საყვარელი კერძო პირის მდგომარეობას და გადავდგა ნაბიჯი და შემოვიდე და მივიღო მონაწილეობა ქვეყნის საზოგადოებრივ-პოლიტიკურ ცხოვრებაში.“

ლევან ვასაძის განცხადებით, ქვეყანაში მოსახლეობას უმძიმესი სოციალური ფონი და ეკონომიკური გაჭირვება აქვს. ასევე, ქვეყანაში არის უსამართლობისა და უიმედობის განცდა. მისი თქმით, ჩვენ ვცხოვრობთ ქვეყანაში, სადაც სამართალი აღარ არსებობს და კანონი შერჩევითია.

„ლეგენდარულ მასშტაბშია ასული ჩვენი ურთიერთსიძულვილი და ურთიერთდაპირისპირების ანტიკულტურა, ექსტრემისტული, მე ვიტყოდი, თავდასხმა ერთმანეთზე, ჩვენი ქვეყნის ძირითად ინსტიტუტებზე, უკვე გახდა ყოველდღიური რეალობა და ამ რეალობიდან გამოსავალი ერთად უნდა ვეძებოთ“, – თქვა მან.

_________________________________

• “ქართული მარში”: მიგრანტების წინააღმდეგ და საგარეო “ნეიტრალიტეტის” მხარდასაჭერად
• ცხოვრება სიძულვილის გარემოში. რას ჰყვებიან ლგბტ ადამიანების მშობლები
• “არასოდეს ვიცი, სახლში ცოცხალი დავბრუნდები თუ არა”

___________________________________

კრემლის იდეოლოგთან, ალექსანდრ დუგინთან დაახლოებული ქართველი ბიზნესმენი ლევან ვასაძე, საქართველოში რუსეთის ინტერესების გამტარებლად მიიჩნევა. ის დიდი ხნის წინ გამოირჩა, როგორც გამოკვეთილი ჰომოფობი. დაახლოებით ორი წლის წინ, მან სპეციალური ჯგუფების შექმნის შესახებ გააკეთა განცხადება, რომლებიც ხელკეტებით იქნებოდნენ შეიარაღებული, რათა ლგბტ საზოგადოება დაესაჯათ.

ის იყო ერთ-ერთი ორგანიზატორი აქციისა, რომელიც კინოთეატრ ამირანთან გაიმართა და ქართული ფილმის – „და ჩვენ ვიცეკვეთ“ (And Then We Danced) – წინააღმდეგ იყო მიმართული.

მაშინ, ფილმის წინააღმდეგ გამოვიდა ეკლესიაც, რომლის წარმომადგენლებიც, ცოტა ხნის მერე, თავად აღმოჩნდნენ სკანდალის ეპიცენტრში, როდესაც გავლენიანმა სასულიერო პირმა, მეუფე პეტრემ და სხვა მღვდელმსახურებმა „პედოფილიასა და მამათმავლობაში“ დაადანაშაულეს.

___________________________

● ვის უფლებებს იცავენ საქართველოში
● ორი აქცია კანცელარიასთან: ერთმანეთს ლგბტ-პრაიდის მომხრეები და მოწინააღმდეგეები დაუპირისპირდნენ