ლუკაშენკო აფხაზეთის აღიარებისთვის ემზადება? მისი წარმომადგენლის ვიზიტი სოხუმში

ემზადება თუ არა ლუკაშენკო აფხაზეთის აღიარებისთვის?

ბელარუსის პრეზიდენტმა აფხაზეთში თავისი პირადი წარმომადგენელი ვიქტორ შეიმანი გაგზავნა. აფხაზურ საზოგადოებაში და ექსპერტების დონეზე აქტიურად განიხილება, შეიძლება თუ არა ეს იმას ნიშნავდეს, რომ ალექსანდრე ლუკაშენკო აფხაზეთის აღიარებამდე სიტუაციას იკვლევს?

თებერვლის დასაწყისში ლუკაშენკომ განაცხადა, რომ რუსეთისგან ელოდება „სიგნალებს“ აფხაზეთისა და ცხინვალის დამოუკიდებლობის აღიარებისთვის, ყირიმი კი რუსეთის საკუთრებაა. თუმცა, კრემლმა, რუსეთის პრეზიდენტის პრესმდივნის დიმიტრი პესკოვის პირით, თქვა, რომ – “სიგნალები არ იქნება”.

აფხაზეთი და სამხრეთ ოსეთი, როგორც დამოუკიდებელი სახელმწიფოები, რუსეთმა 2008 წლის აგვისტოს ომის შემდეგ აღიარა. ამის შემდეგ აღიარების შესახებ კიდევ ოთხმა ქვეყანამ განაცხადა – ნიკარაგუამ, ნაურუმ, ვენესუელამ და სირიამ. თბილისი და დანარჩენი მსოფლიო აფხაზეთს და სამხრეთ ოსეთს საქართველოს ტერიტორიის ნაწილად მიიჩნევს.

აფხაზეთის პრეზიდენტის ადმინისტრაციაში აცხადებენ, რომ ასლან ბჟანია შეიმანს 25 ივნისს შეხვდა, თუმცა მოლაპარაკების დეტალების შესახებ ცოტა რამ არის ცნობილი. გავრცელებული ინფორმაციით, „მხარეებმა განიხილეს ორმხრივი ინტერესის საკითხები, ევრაზიული ინტეგრაციის აქტუალური ასპექტები, საინვესტიციო და ეკონომიკური თანამშრომლობის პერსპექტივები“.

ასევე ცნობილია, რომ „ვიქტორ შეიმანმა ასლან ბჟანიას ლუკაშენკოსგან სამახსოვრო საჩუქარი გადასცა“.

იყო თუ არა შეხვედრაზე მსჯელობა მინსკის მიერ აფხაზეთის დამოუკიდებლობის აღიარების შესაძლებლობის შესახებ, უცნობია.

ამ ვიზიტს აფხაზეთში აქტიურად ეხმაურებიან. საექსპერტო წრეებში უმეტესობა თანხმდება, რომ უახლოეს მომავალში ნაკლებად სავარაუდოა ბელარუსმა აფხაზეთი აღიაროს. მაგრამ ალექსანდრე ლუკაშენკოს სურს მოამზადოს სიტუაცია, თუ შესაფერისი მომენტი დადგება.

• ქართულ-აფხაზური კონფლიქტი: გამოსავალი არ ჩანს, არც დიალოგის სურვილი. ხედვა სოხუმიდან
• უკრაინაში ომის გამო აფხაზეთის გავლით ტვირთების გადატანა გასამმაგდა. რას ფიქრობს თბილისი?
• მშვიდობის ოაზისი “მეორე ფრონტის” ნაცვლად. მოსაზრება აფხაზეთიდან

კომენტარი

„ლუკაშენკოს დაუძლეველი წინააღმდეგობები აქვს დასავლეთთან. და ერთადერთმა მთავარმა მოკავშირემ, მოსკოვმა, პირობად დააყენა საგარეო პოლიტიკაში თავისი კურსის დაცვა. თუმცა, მიუხედავად იმისა, რომ ლუკაშენკო უფრო მომთმენი გახდა, მან შეინარჩუნა დამოუკიდებლობა აღიარების საკითხში გადაწყვეტილების მიღებისას“, – აჯამებს მოსაზრებებს ტელეგრამის პოპულარული არხი „აფხაზეთი-ცენტრი“.

„შეხვედრები, ვიზიტები – მათი მონაწილეების სტატუსი ყოველ ჯერზე იზრდება. აფხაზეთისა და სამხრეთ ოსეთის დამოუკიდებლობის სრულ აღიარებაზე ლუკაშენკო მხოლოდ მაშინ დათანხმდება თუ ხელისუფლების დაკარგვამდე ნახევარი ნაბიჯი დარჩება და მისი გადარჩენის საკითხი მოსკოვზე იქნება დამოკიდებული.

განსხვავებულ სიტუაციაში, როცა დაინახავს, ​​რა არაპროგნოზირებადი ვითარებაა უკრაინაში, ის შეეცდება თავი აარიდოს და ხიდები დაუწვავად დატოვოს – გაექცევა კულტურული კომუნიკაციით ან პარლამენტის გადაწყვეტილების საფუძველზე ნაწილობრივი აღიარებით”.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო