„კოსპლეერები“ აზერბაიჯანში: ვინ არიან ისინი და რა სურთ?
რა არის „კოსპლეი“? არიან „კოსპლეერები“ აზერბაიჯანში? რამდენად განვითარებულია ეს სფერო ქვეყანაში? ყველა ამ კითხვაზე პასუხის მისაღებად, JAMnews-ი აზერბაიჯანელი მცირერიცხოვანი „კოსპლეერებიდან“ ერთ-ერთს, აინა ზარბალიევას გაესაუბრა.
- როგორ ქმნიდნენ ზეადამიანს – ლეგენდები, რომლებიც აფხაზეთის მაიმუნების საშენს უკავშირდება
- გვანცა – ინვალიდის ეტლში მოფარიკავეების ისტორია
- ქორწილები აკრძალულია – რას ნიშნავს ეს აზერბაიჯანში
რა არის კოსპლეი?
აინა ამბობს, რომ სიტყვა „კოსპლეი“ შეიქმნა ორი ინგლისური სიტყვისგან – „costume“ (კოსტიუმი) და „play“ (თამაში). „ირჩევ ფორმას, გარკვეულ ხასიათს, რომელსაც უპირატესობას ანიჭებ. თუკი კერვა შეგიძლია, კოსტიუმს თვითონ ამზადებ. თუკი არ შეგიძლია, მაშინ ვებგვერდების დახმარებით სარგებლობ, სადაც შეგიძლია შეუკვეთო ისინი, ან კი მკერავთან მიდიხარ.
პარიკი, მაკიაჟი, გრიმი და ყველაფერი დანარჩენი – შენი საკუთარი საქმეა. შემდეგ, ამ პერსონაჟის შესაბამისად იწყებ მოქცევას, სცენაზე გამოდიხარ ისეთ კონკურსებში, როგორებიცაა AzeCon და CosplayFest, აცოცხლებ შენს პერსონაჟს“, – გვიყვება ზარბალიევა.
თავად „კოსპლეის“ შთაგონება მოდის ანიმეს ან ფილმის ნახვისგან, ანდაც წიგნის ან კომიქსის წაკითხვიდან. არჩევანია სოლო და გუნდურ გამოსვლებს შორის. აინას თქმით, ეს ყველაზე მნიშვნელოვანი არ არის, მთავარია, რომ ადამიანი ამას გულისყურით მოეკიდოს.
საიდან მოდის „კოსპლეითი“ ასეთი გატაცება?
აინა საუბარს აგრძელებს: „თითოეულს თავისი ისტორია აქვს. ჩემი ისტორია ცოტათი რომანტიკულია. ერთი პერსონაჟი შემიყვარდა და მჯეროდა, რომ მასთან გარკვეული მენტალური კავშირი მქონდა. გადავწყვიტე, რომ ეს ხასიათი სცენაზე შემექმნა. ეს პერსონაჟი იყო Sally Fisher თამაშიდან Sally Face. მისი ფანკლუბი არც ისეთი ცნობილია. ვაცნობიერებდი, რომ ეს „კოსპლეი“ დიდ ინტერესს არ გამოიწვევდა. უბრალოდ, ჩემთვის ვაკეთებდი. მაგრამ ისე არ მოხდა, როგორც მე ველოდი…“
დღეისათვის, აინას ორი ათასამდე გამომწერი ჰყავს. ეს არც ისეთი დიდი წარმატებაა სამწლიანი მუშაობის შემდეგ, მაგრამ ის ინტერესით უყურებს თავის ჰობის. მთავარი მიზანია – გააცოცხლოს პერსონაჟი, რომელიც მოეწონა. ცნობილი ფანკლუბები მას მხოლოდ ნაწილობრივ აინტერესებს.
„ყველას პირადად ვიცნობ“
ამ საქმის რამდენი მიმდევარია აზერბაიჯანში? აინა ამ კითხვაზე ასეთ პასუხს გვცემს:
„აზერბაიჯანში იმდენად ცოტა „კოსპლეერია“, რომ მათ ყველას პირადად ვიცნობ. მაგრამ ბოლო წლებში საგრძნობლად გაიზარდა არა რუსულენოვანი, არამედ აზერბაიჯანულენოვანი „კოსპლეერების“ რაოდენობა. ასეთი ჰობის მქონე ადამიანები დიდწილად ინტროვერტები არიან, რადგან ქუჩაში, როგორც წესი, ჩვეულებრივად არ გვიყურებენ“.
პანდემიამ გვერდი ამ სფეროსაც არ აუარა
„წელიწადში რამდენჯერმე, „კოსპლეერებს“ თავიანთი ღონისძიებები აქვთ. ამის მაგალითებია კონკურსები AzeCon და CosplayFest. პირველი მათგანი უკვე 10 წელია იმართება. პირველად ეს კონკურსი ერთმანეთს შორის 10-15-მა ადამიანმა მოაწყო. ბოლოს კი ღონისძიება ბაქოში, სპორტის სასახლეში გაიმართა. კი, რომელიმე ევროპული ქვეყნისთვის ეს დიდი ვერაფერი წარმატებაა, აზერბაიჯანისთვის კი კარგი შედეგია“, – გვიყვება ჩვენი ამბის გმირი.
AzeCon გამოირჩევა თავისი ჟიურით. მათგან რომელიღაც რეკვიზიტებში ერკვევა, სხვა – პარიკების სპეციალისტია, მესამე – პროფესიონალი მსახიობი. პრიზიორები სწორედ ამ სამი მაჩვენებლებით ირჩევა, მნიშვნელობა არ აქვს – სოლოა თუ გუნდური.
აინა ამბობს, რომ 2020 წელს AzeCon-ს განსაკუთრებული ინტერესით ელოდნენ, რადგან ორგანიზატორებმა კონტაქტის დამყარება მოახერხეს სტამბოლში ანალოგიურ ღონისძიებასთან. ბაქოს სოლო კონკურსში გამარჯვებულს AzeCon-ი თურქულ ComIcon-ზე უნდა წარედგინა. ეს შესანიშნავი შანსი იყო აზერბაიჯანული „კოსპლეის“ პოპულარიზაციისთვის. მაგრამ ამ გეგმებს განხორციელება არ ეწერა კორონავირუსის პანდემიის გამო.
როგორ ვიპოვოთ აზერბაიჯანელი „კოსპლეერები“?
მათი მოძებნა დიდ სირთულეს არ წარმოადგენს. აზერბაიჯანელი „კოსპლეერები“ Instagram-ზე იყენებენ ჰეშთეგს #azericosplayers. Facebook-ზე კი შეკრებილები არიან ჯგუფში, სახელწოდებით AzeCon.
„ხშირად, დასაკავშირებლად, პირდაპირ გვწერენ. ცნობილი კომპანიები მიმართავენ ხუთი-ექვსი წლის სტაჟის მქონე „კოსპლეერებს“. სხვადასხვა პროდუქციის რეკლამირებას გვთავაზობენ“, – ჰყვება აინა.
აზერბაიჯანში „კოსპლეის“ ერთ-ერთ ფუძემდებლად ითვლემა თამილა (@tamillart). ის ამ სფეროში AzeCon-ის პირველივე კონკურსიდანაა. და იმ დროიდან მოყოლებული, არ ყოფილა არც ერთი წელი, რომ თამილა სცენიდან უპრიზოდ წასულიყო.
