სომხეთი: უკვე შესაძლებელია ორი ადამიანის გასეირნება

სომხეთის ხელისუფლება საგანგებო მდგომარეობის  გამო დაწესებულ შეზღუდვებს უკვე მესამედ არბილებს.

ნაწილობრივ მოხსნილია მოქალაქეების გადაადგილების შეზღუდვა. ახლა შესაძლებელია სასეირნოდ გასვლა, ველოსიპედით სეირნობა – თუმცა, სახლს კილომეტრზე მეტი მანძილით არ უნდა გასცდე. და უკვე შეიძლება სახლიდან ორი ადამიანის ერთად გასვლაც – თუკი ისინი ერთი ოჯახის წევრები არიან.

მაგრამ ძველებურად ძალაში რჩება ქალაქებისა და სოფლების შიგნით საზოგადოებრივი ტრანსპორტის მუშაობის შეზღუდვა.

მკაცრი შეზღუდვები დაწესდა16 მარტს, როდესაც კორონავირუსის ეპიდემიასთან დაკავშირებით საგანგებო მდგომარეობა გამოცხადდა.

14 აპრილს კომენდატურამ სამუშაოს განახლების ნება დართო გადამამუშავებელი საწარმოების ნაწილს, მშენებლებსა და ინჟინრებს.

ამის შემდეგ სომხეთში დაინფიცირების შემთხვევები გაიზარდა და ქვეყნის სხვადასხვა რეგიონში მთელი რიგი დასახლებული პუნქტები კარანტინით ჩაიკეტა.

თუმცა, ერთი კვირის შემდეგ საგანგებო მდგომარეობის კომენდატურამ კიდევ უფრო მეტად გააფართოვა იმ საწარმოების სია, რომლებსაც სამუშაოს განახლების უფლება მიეცათ. სწორედ მაშინ დაუშვეს ოლქებს შორის ტრანსპორტის გადაადგილებაც.

უახლოესი 10 დღის განმავლობაში მოსალოდნელია, რომ კომენდატურა მუშაობის განახლების უფლებას კიდევ უფრო მეტ საწარმოს მისცემს.  

პრემიერ-მინისტრის თქმით, კორონავირუსთან დაკავშირებული კრიზისი არაპროგნოზირებადია და, შესაძლოა, ერთ წელიწადს ან მეტ ხანსაც გასტანოს, ამიტომ საჭიროა პრობლემის გადაჭრა – გამოსავლის პოვნა. ასე რომ, ნაბიჯ-ნაბიჯ შეზღუდვები შემცირდება.

28 აპრილისთვის სომხეთში კორონავირუსით დაინფიცირებულთა რიცხვი 59-ით გაიზარდა, და სულ 1,867 ადამიანი შეადგინა. გამოჯანმრთელებულთა რაოდენობა – 866 ადამიანია. ეპიდემიის დაწყებიდან ექიმებმა ვერ გადაარჩინეს 30 პაციენტის სიცოცხლე, რომლებსაც თანმხლები ქრონიკული დაავადებები ჰქონდათ.

• სომხეთი: რამდენად ძლიერად დაზარალდება კორონავირუსისგან ბიზნესი, რა ელის ეკონომიკას საგანგებო მდგომარეობის შემდეგ

• შეიქმნება თუ არა კორონავირუსის საწინააღმდეგო ვაქცინა და წამალი

რა არის შესაძლებელი ახლა – სრული სია 

კომენდატურის გადაწყვეტილების თანახმად, შესაძლებელია:

• სეირნობა, ველოსიპედით სეირნობა ან ვარჯიში სახლიდან 1 კილომეტრის მანძილამდე დაშორებით;
• უკვე დაშვებულია ოჯახის წევრებთან ერთად სეირნობა, თუმცა – მხოლოდ ორი ადამიანის;
• სოფლის მაცხოვრებლებს შეუძლიათ იმ მაღაზიებში იარონ, რომლებიც მათი სახლიდან 1 კმ-ზე მეტით არ არის დაშორებული; ქალაქელებისთვის მაქსიმალური დაშორება – 500 მეტრია.

ყველა ამ შემთხვევაში, მოქალაქემ თან უნდა იქონიოს პირადობის დამადასტურებელი საბუთი, ასევე საკუთარი ხელით შედგენილი – „გადაადგილების ანკეტა“. მასში თითოეული მიუთითებს საკუთარ მისამართს, იმას, თუ სად მიდის, სახლიდან გასვლის დროს და დაბრუნების სავარაუდო საათს.

კომენდატურის გადაწყვეტილების შესახებ, ჩვეულებისამებრ, თავიდან პრემიერ-მინისტრმა ნიკოლ ფაშინიანმა განაცხადა:

 „ჩვენ შეზღუდვების ნაბიჯ-ნაბიჯ მოხსნის გზით წავალთ, და თუკი რაიმე ზედმიწევნით არაბუნებრივი არ მოხდა, მაშინ 10 დღის განმავლობაში ყველა ეკონომიკური შეზღუდვა მოიხსნება“.

ამავდროულად სულ იმეორებენ, რომ განათლების სფეროში არსებული შეზღუდვები არ მოიხსნება – სკოლები და უნივერსიტეტები არ გაიხსნება.

• კორონავირუსის გამო, სომხეთის სკოლებში გამოსაშვები გამოცდები გააუქმეს, და უნივერსიტეტში ერთი გამოცდით ჩაბარების შანსი მისცეს

რა შეზღუდვები აღარ მოქმედებდა ამ გადაწყვეტილებამდე

ბოლოს შეზღუდვები 23 აპრილს მოიხსნა. მაშინ  სომხეთის ტრასებზე საკონტროლო-გამშვები პუნქტებისა და რეგიონებს შორის თავისუფალი გადაადგილების შეზღუდვის გაუქმება გადაწყდა.

ამის ნაცვლად, ახლა აკრძალულია შესვლა-გამოსვლა ცალკეულ სოფლებსა და ქალაქებში, სადაც დაინფიცირების აფეთქება ფიქსირდება.

მოხსნილია ასევე შეზღუდვები ბიზნეს-საქმიანობის ნაწილზე: პოლიგრაფიული მრეწველობა, ქვის დამუშავება, მეტალოკონსტრუქციების წარმოება და მანქანების შეკეთება.მუშაობა განაახლეს უძრავი ქონების ბაზართან დაკავშირებულმა ორგანიზაციებმა.

მანამდე ათი დღით ადრე ნებადართული გახდა გადამამუშავებელი მრეწველობის, თამბაქოს ნაწარმის, ცემენტის, თაბაშირის, მეტალის კონსტრუქციების საწარმოების ამუშავება. ასევე ამუშავდა ის საწარმოები, რომლებიც მათ ამ კონსტრუქციების ასაწყობ დეტალებს აწვდის. დროებით აკრძალული საქმიანობების სიიდან ამოღებულია მშენებლობის თითქმის მთელი სფერო.

უკვე მაშინ კომენდანტმა იმის შესახებ განაცხადა, რომ არ გამორიცხავს მოვლენების იმგვარ განვითარებას, როდესაც სამუშაოს კიდევ უფრო მეტი ადამიანი დაუბრუნდება.