კომუნიკაციების კომისიამ მთავარი არხი დააჯარიმა, ფორმულა და TV პირველი კი გააფრთხილა
კომუნიკაციების კომისიამ მთავარი არხი დააჯარიმა
საქართველოს კომუნიკაციების კომისიამ მმართველი პარტია “ქართული ოცნების” საჩივრის საფუძველზე “მთავარი არხი” 118 688.67 ლარით დააჯარიმა, ხოლო ტელეკომპანია “ფორმულა” და “TV პირველი” წერილობით გააფრთხილა.
მმართველი პარტია მიიჩნევს, რომ ვიდეორგოლი ემსახურება “ქართული ოცნების” და მისი იდეის უარყოფითად ფორმირებას, მიზნად ისახავს სამომავლო არჩევნებში არჩევისთვის ხელის შეშლას. ამასთან, პარტიაში მიიჩნევენ, რომ კლიპში ცხადად იდენტიფიცირებულია “ქართული ოცნება” კონკრეტული პარტიის სახეებზე მითითებით, შეიცავს მმართველი პარტიის, მათი ლიდერების, ხელისუფლების წარმომადგენლების, სახელმწიფო-პოლიტიკური თანამდებობის პირების უარყოფით კონტექსტში წარმოჩენას.
“ქართულმა ოცნებამ” მოძრაობა “შინ ევროპისკენ” კამპანიის ვიდეორგოლის გაშვებისთვის “მთავარ არხს”, “ფორმულასა” და “TV პირველს” კომუნიკაციების კომისიაში 9 აგვისტოს უჩივლა და არხებისთვის ადმინისტრაციული პასუხისმგებლობის დაკისრებას მოითხოვა.
ვიდეორგოლი სამოქალაქო საზოგადოების მიერ ორგანიზებული კამპანიის – “შინ ევროპისკენ” ფარგლებშია მომზადებული და ჩანს, თუ როგორ ისმენენ ოჯახის წევრები “ქართული ოცნების” ლიდერების განცხადებებს, ვიდეოს ბოლოს კი 24 ივნისს გამართული აქციის ანონსი ჩნდება.
“გამომდინარე იქიდან, რომ TV პირველსა და ფორმულას აღნიშნული კანონდარღვევა ბოლო ერთი წლის განმავლობაში არ ჩაუდენიათ და მათ მიმართ სანქციის არცერთი სახე გამოყენებული არ ყოფილა, კომისიამ მაუწყებლები წერილობით გააფრთხილა. მთავარი არხი კი ანალოგიური სამართალდარღვევისთვის 2019, 2020 და 2021 წლებში სამართალდამრღვევად ცნობილი 4-ჯერ იყო, ამასთან, ბოლო ერთი წლის განმავლობაში მთავარი არხის მიერ აღნიშნული კანონდარღვევა მეორედ განხორციელდა და მაუწყებელი უკვე იყო დაჯარიმებული.” – ვკითხულობთ კომისიის გადაწყვეტილებაში.
არასამთავრობო ორგანიზაცია “საქართველოს დემოკრატიული ინიციატივა” (GDI) კომუნიკაციების კომისიის მიერ მიღებულ გადაწყვეტილებას გამოეხმაურა. როგორც ორგანიზაციაში ამბობენ, კომისია მედიის თავისუფლების წინააღმდეგ ბრძოლას აგრძელებს.
“ქართული ოცნება” არც მალავს, რომ მისი მიზანია კომისიაში წარმოების გზით შეზღუდოს პარტიის მიმართ უარყოფითი მესიჯების გავრცელება საზოგადოებაში, რაც პირდაპირ წინააღმდეგობაშია დემოკრატიის საბაზისო პრინციპებთან.” – ნათქვამია განცხადებაში.
მათივე განმარტებით, კომისიამ არც ამ შემთხვევაში გაითვალისწინა მაუწყებლების სამართლებრივად დასაბუთებული პოზიცია და ის საფრთხეები, რაც თან ახლავს მედიის თავისუფლების უკანონო, დაუსაბუთებელ შეზღუდვას.
როგორც ორგანიზაციაში აღნიშნავენ, კომისია “არაგანჭვრეტადი სამართლებრივი წესის საფუძველზე, გაუმართლებლად ლახავს გამოხატვის თავისუფლებით დაცულ უფლებრივ სფეროს” და ძირს უთხრის მედიაპლურალიზმს, რაც მნიშვნელოვანი შემაფერხებელი ფაქტორია საქართველოს ევროინტეგრაციის გზაზე.
აღნიშნულ საქმეზე GDI ტელეკომპანია “ფორმულას” ინეტერესებს იცავდა.
