ხაშურის მუნიციპალიტეტის სოფელ ხიდისყურში კარანტინი გამოცხადდა

ხაშურის მუნიციპალიტეტის გომის თემის სოფელ ხიდისყურში მკაცრი საკარანტინო რეჟიმი დაწესდა. მიზეზი კორონავირუსის დადასტურებული შემთხვევაა. 30 წლამდე ასაკის ახალგაზრდა ქალი, რომელსაც ახალი კორონავირუსი გუშინ დაუდგინდა, ოჯახთან ერთად აგარაკზე, სოფელ ხიდისყურში იმყოფებოდა.

13 აპრილის მონაცემებით, საქართველოში კორონავირუსით ინფიცირების 266 შემთხვევაა დადასტურებული. კარანტინის რეჟიმშია 4872 ადამიანი, ხოლო სტაციონარში მეთვალყურეობის ქვეშ – 453 პირი. კორონავირუსით ინფიცირებულთაგან 67 გამოჯანმრთელდა და 3 გარდაიცვალა. უცხოეთიდან საქართველოში სამკურნალოდ გადმოყვანილია კორონავირუსით ინფიცირებული საქართველოს 3 მოქალაქე.

კორონავირუსით ინფიცირებული ქალი არასრულწლოვან შვილთან ერთად საავადმყოფოშია გადაყვანილი. მისი ოჯახის წევრები თვითიზოლაციაში არიან. დგინდება კონტაქტები.

სოფელ ხიდისყურის შესასვლელს პოლიცია აკონტროლებს. 

კარანტინის ფარგლებში, სოფელში აიკრძალა შესვლა და გამოსვლა.

მოქალაქეებს სახლიდან გამოსვლა შეეძლებათ მხოლოდ იმ შემთხვევებში, თუ სჭირდებათ პროდუქტის ან წამლის შეძენა, ან სამედიცინო მომსახურების მიღება.

ადგილობრივ მოსახლეობას ექნება უფლება, რომ სასოფლო-სამეურნეო სამუშაოები ჩაატაროს, ოღონდ იმ შემთხვევაში, თუ ჯანდაცვის სამინისტროს მიერ გაცემულ რეკომენდაციებს დაიცავს.

• ახლობლები რომ მირეკავდნენ, ზოგს ეტირებოდა – რას ჰყვება კორონავირუსით ინფიცირებული სტუდენტი
• საქართველოში კორონავირუსზე პაციენტის შემოწმების წესი შეიცვალა: ვის გაუკეთებენ ტესტს?
• კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი

21 მარტიდან 21 აპრილამდე ქვეყანაში გამოცხადებულია საგანგებო მდგომარეობა და კომენდანტის საათი. კორონავირუსის შიდა გავრცელების გამო, განსაკუთრებულად მკაცრი საკარანტინო რეჟიმი მოქმედებს მარნეულის, ბოლნისის, ლენტეხისა და ქობულეთის მუნიციპალიტეტებში.