ივანიშვილის გასაიდუმლოებული ვიზიტი ქუთაისში. ტიკ-ტოკის სკანდალური ვიდეოს შემდეგ ის საჯარო სივრცეში მეორედ გამოჩნდა
“ქართული ოცნების” თავმჯდომარე, ბიძინა ივანიშვილი, რომელიც საქართველოში კორონავირუსის პანდემიის გავრცელების შემდეგ საჯაროდ მხოლოდ ერთხელ გამოჩნდა და ისიც ტიკ-ტოკის სკანდალურ ვიდეოში, ქუთაისის საერთაშორისო უნივერსიტეტს ეწვია. უნივერსიტეტში ის მეუღლესთან, ეკატერინე ხვედელიძესთან ერთად იმყოფებოდა. ივანიშვილის ვიზიტი ქუთაისში გასაიდუმლოებული იყო. მის უსაფრთხოებას ასობით სამართალდამცავი იცავდა. “საკუთარ ქვეყანაში რომ დაიპარები და ადამიანებს ემალები – დასასრულის დასაწყისია ეს,” – წერენ ფეისბუკში.
ბიძინა ივანიშვილის და მისი მეუღლის ვიზიტის ამსახველ ფოტოებს ქუთაისის საერთაშორისო უნივერსიტეტი აქვეყნებს. უნივერსიტეტი ბიძინა ივანიშვილის დაფინანსებით შენდება – ქართველმა ოლიგარქმა მისი მშენებლობისთვის 1 მლრდ ევრო გამოყო.
როგორც ქუთაისის საერთაშორისო უნივერსიტეტში ამბობენ, ბიძინა ივანიშვილი და ეკატერინე ხვედელიძე “უნივერსიტეტის პირველი ეტაპის დასრულებულ სამუშაოს გაეცნენ.”
უნივერსიტეტის მშენებლობა 2017 წელს დაიწყო. პროექტს ივანიშვილის ფონდი “ქართუ” ახორციელებს.
- ამერიკელი კონგრესმენების ანგარიში: “ივანიშვილი პუტინის ახლო მოკავშირეა”
- ბიძინა ივანიშვილი კორონავირუსის პანდემიის გავრცელების შემდეგ თიკთოკ-ზე გამოჩნდა
სტუდენტების პირველი ნაკადი უნივერსიტეტმა 2020 წლის სექტემბერში უნდა მიიღოს.
“ივანიშვილი თავადაც კარგად ხვდება, რომ ხალხთან გამოსაჩენი პირი აღარ აქვს, არც პასუხები იმ კითხვებზე, რაც მრავლად დაგროვდა …
უნივერსიტეტს კი აშენებს, მაგრამ ახალგაზრდებსაც ვერ შეხვდა:
რომ ჰკითხავენ, საქართველოში სად უნდა დასაქმდნენ ან ამ, ან სხვა უნივერსიტეტებში ნასწავლი ახალგაზრდები – პასუხი არ აქვს!”
რატომ წაერთვა ქუთაისს, ისევე როგორც მთელ საქართველოს, განვითარების პერსპექტივა, პასუხი არ აქვს;
როგორ დააბრუნებს ქალაქიდან (ისევე როგორც ქვეყნიდან) წასულ ასობით დედას მარტო დატოვებულ ასობით შვილთან და რას შესთავაზებს მათ სამშობლოში დაბრუნებულებს, პასუხი არ აქვს.
საკუთარ ქვეყანაში, რომ დაიპარები და ადამიანებს ემალები – დასასრულის დასაწყისია ეს.
ფინალი იქნება ოქტომბერში,” – წერს “ლელო საქართველოსთვის” წევრი, ანა ნაცვლიშვილი.
