აშშ-ის კონგრესის წარმომადგენლობითი პალატის რესპუბლიკური პარტიის წევრები აშშ-ის ადმინისტრაციას მოუწოდებენ გამოიყენონ სანქციები “ქართული ოცნების” დამფუძნებლის, ბიძინა ივანიშვილის წინააღმდეგ.
აღნიშნული ინიციატივით გამოდის რესპუბლიკელების ყველაზე დიდი შიდაპარტიული ფრაქცია (კოკუსი) აშშ-ის კონგრესის წარმომადგენლობით პალატაში – “რესპუბლიკური კვლევების კომიტეტი” (Republican Study Committee, или RSC)
ამ კომიტეტმა 9 ივნისს გამოაქვეყნა ანგარიში სახელწოდებით “ამერიკის გაძლიერება და გლობალურ საფრთხეებთან ბრძოლა” (STRENGTHENING AMERICA & COUNTERING GLOBAL THREATS) სადაც წერია, რომ “ქართული ოცნების” თავმჯდომარე, ბიძინა ივანიშვილი პუტინის “ახლო მოკავშირეა და რუსეთის სასარგებლოდ საქართველოს დესტაბილიზაციაშია ჩართული.”
ანგარიშში, რომელიც კონგრესმენებმა მოამზადეს, სარეკომენდაციო ხასიათისაა.
ამ 120 გვერდიან ანგარიშში საუბარია ამერიკის გლობალურ მტრებზე. ანგარიშის ავტორები ითხოვენ რუსეთის, ჩინეთის და ირანის წინააღმდეგ უპრეცედენტო სანქციების გამოყენებას, რადგან სწორედ ამ სამ ქვეყანას მიიჩნევენ აშშ-ის ყველაზე აგრესიულ მოწინააღმდეგეებად.
დოკუმენტის იმ ნაწილში, სადაც რუსეთისთვის სანქციების გაგრძელების აუცილებლობას ეხება, საუბარია საქართველოზეც.
“ბიძინა ივანიშვილი, ყველაზე მდიდარი ადამიანი საქართველოში, პუტინის ახლო მოკავშირეა და მონაწილეობს საქართველოს დესტაბილიზაციაში რუსეთის სახელით,” – სიტყვა-სიტყვით წერია კონგრესმენების ანგარიშში.
რესპუბლიკელი კონგრესმენები აღნიშნავენ, რომ სანქციები საკმარისად არ შეხებია პუტინს მისი საგარეო პოლიტიკის გამო და რომ მისი მეგობრები და მოკავშირეები ყოფილი საბჭოთა რესპუბლიკების სუვერენიტეტს ხელყოფენ.
ამ ანგარიშშივე კონგრესმენები ითხოვენ რუსი მილიარდერის ვლადიმერ ევტუშენკოვისა და უკრაინელი ოლიგარქის, პუტინთან დაახლოებული პირის – ვიქტორ მედვედჩუკის წინააღმდეგ სანქციების ამოქმედებას.
ანგარიშს ხელს აწერს 13 კონგრესმენი: მაიკ ჯონსონი, ჯეკ ბერგმანი, რობ უიტმენი, ჯო უილსონი, ენ ვაგნერი, ალექს მუნი, დონ ბეკონი, ნილ დანი, ქლეი ჰიგინსი, რალფ ნორმანი, დენ ქრენშოუ, ბრაიან სტილი და მაიკლ უოლტზი.
