პრემიერმინისტრი: ხალხს არ ჰქონდა ინფორმაცია, თუ რა ხდება უკრაინაში, ბილბორდებმა გააშიშვლა სიმართლე
ირაკლი კობახიძე უკრაინაზე
საქართველოს პრემიერმინისტრი ირაკლი კობახიძე “ქართული ოცნების” პროპაგანდისტულ ბილბორდებზე ამბობს, რომ მათი მეშვეობით უკრაინაში მიმდინარე მოვლენები “გააშიშვლეს”, რადგან, კობახიძის თქმით, საზოგადოებას ომზე სათანადო ინფორმაცია არ ჰქონდა.
კობახიძემ ისაუბრა ევროპარლამენტის მიერ მიღებული რეზოლუციაზეც და განაცხადა, რომ ის გლობალური ომის პარტიასთან არის კავშირში, “უსამართლოა” და მმართველი გუნდისთვის ამ დოკუმენტს “ჩალის ფასი” აქვს.
ევროპარლამენტმა საქართველოზე კრიტიკული რეზოლუცია მიიღო, რომელშიც ევროპარლამენტარები მოუწოდებენ ევროპულ საბჭოსა და ევროკავშირის დემოკრატიულ პარტნიორებს, დაუწესოს დაუყოვნებლივი და მიზანმიმართული პერსონალურ სანქციები ბიძინა ივანიშვილს “საქართველოში პოლიტიკური პროცესის გაუარესებაში მისი როლის გამო”.
ამასთან, ევროპარლამენტარები გმობენ ბიძინა ივანიშვილის პირად როლს მიმდინარე პოლიტიკურ “კრიზისსა” და ევროატლანტიკური ორიენტაციისთვის “ძირის გამოთხრაში”, ასევე ქვეყნის რუსეთისკენ მიბრუნების მორიგ მცდელობაში.
რეზოლუცია ასევე კვლავ იმეორებს ჰუმანიტარულ საფუძველზე მიხეილ სააკაშვილის მყისიერ და უპირობო გამოშვების მოთხოვნას.
რა თქვა ირაკლი კობახიძემ
“კონკრეტული სუბიექტები წუხან ამ ბილბორდების გამო და შესაბამისი ვიდეორგოლის გამო, ერთი რამის გამო, ისინი 2.5 წლის განმავლობაში ახერხებდნენ საქართველოს მოსახლეობისთვის დაემალათ ის, თუ რა ხდებოდა უკრაინაში და რა ხდება დღეს უკრაინაში, სადაც არის სრული კატასტროფა – ეკონომიკის კუთხით, ინფრასტრუქტურის კუთხით, ჰუმანიტარული კუთხით და ა.შ.
2.5 წელიწადის განმავლობაში ისე წარმოაჩენდნენ მოვლენებს, რომ ჩვენ უნდა შეგვშურებოდა უკრაინის. რეალურად ამ ბილბორდებმა და ვიდეორგოლმა გააშიშვლა ის ტყუილი, რაშიც ცდილობდნენ რომ დაეტოვებინათ ქართული საზოგადოება.
რეალურად საზოგადოებას არ ჰქონდა სრული და სათანადო ინფორმაცია, თუ რა ხდება უკრაინაში და ამ ბილბორდებმა და ვიდეორგოლმა გააშიშვლა სიმართლე. ამის გამო არიან შეწუხებული ის ადამიანები, რომელიც ცდილობდნენ, რომ უკრაინაში არსებული მდგომარეობა სასურველად წარმოეჩინათ ქართული საზოგადოებისთვის…”, – თქვა კობახიძემ იმედიLIVE-ის ეთერში.
პრემიერის თქმით, ევროპარლამენტის რეზოლუცია ისეთივე ჩალის ფასი აქვს, როგორც წინა სამ რეზოლუციას ჰქონდა და შედეგიც შესაბამისი იქნება:
“ეს არის მორიგი, მეოთხე რეზოლუცია, რომელიც ევროპარლამენტმა მიიღო. აქ იკითხება იმ ძალების ხელი, რომელსაც ჩვენ გლობალურ ომის პარტიას ვუწოდებთ. აშკარაა, რომ კონკრეტული ძალები ვერ ეგუებიან, რომ ქვეყანაში არ შედგა მეორე ფრონტი, არ შედგა ომი და ეს არის ერთგვარი ბოლო გაბრძოლება ამ ძალებისთვის იმისთვის, რომ ასეთი სცენარის განვითარება მოახერხონ.
ისინი იმედს ამყარებენ საპარლამენტო არჩევნებზე და ამისთვის შედგა ევროპარლამენტში ეს დისკუსია და ამისთვის მიიღეს ეს რეზოლუცია, მაგრამ ამ ძალების ეს მცდელობა წარუმატებლობისთვის განწირულია
ძალიან მკაფიოდ იკითხება ამ რეზოლუციიდან უსამართლობა. ისევ საუბარია ოცნების წარმომადგენლების დასჯაზე, საუბარია ნაციონალური მოძრაობის მფარველობაზე და ეს არის მთავარი წითელი ხაზი რომელიც ამ რეზოლუციას გასდევს. რა თქმა უნდა, ამ უსამართლო დოკუმენტს ისეთივე ჩალის ფასი აქვს, როგორც წინა სამ რეზოლუციას ჰქონდა და ისეთივე უშედეგო იქნება, როგორც წინა სამი რეზოლუცია.”
26 სექტემბერს თბილისის ქუჩებში გამოჩნდა ბანერები, სადაც ერთ მხარეს ომისგან დანგრეული, გაპარტახებული უკრაინის ქალაქების შავ-თეთრი ფოტოებია, მეორე მხარეს კი “მშვიდობიანი და ლამაზი” საქართველო.
ეს მმართველი პარტიის წინასაარჩევნო ნოუჰაუა – ამ ფორმით “ქართული ოცნება” ცდილობს ამომრჩევლებს თავისი მთავარი ნარატივი კიდევ ერთხელ მიაწოდოს – “ქართული ოცნების” ხელისუფლება იმდენად ბრძენი და წინდახედულია, რომ საქართველოში მშვიდობაა აი უკრაინელებმა კი, იგივე გამჭრიახობა ვერ გამოიჩინეს, ამიტომ, იქ ომი და ნგრევაა.
მაგალითად, ერთ-ერთ ფოტოზე დონეცკის ოლქის სოფელ ბოგოროდიჩნეში დაბომბვის შედეგად განადგურებული ტაძარი ჩანს, მარჯვნივ კი თბილისის სამების ტაძრის ფერადი ფოტოა. (საინტერესოა, რომ ამ პლაკატისთვის რომელიმე ძველი ქართული ისტორიული ტაძრის ფოტო კი არ აარჩიეს, არამედ რამდენიმე წლის წინ ბიძინა ივანიშვილი მიერ აშენებული ტაძრის)
იმავე დღეს “ქართულმა ოცნებამ” საარჩევნო ვიდეოც გაავრცელა, რომელსაც იგივე შინაარსი აქვს. კადრში მოჩანს განადგურებული უკრაინა და “ფერადი, ლამაზი საქართველო”.
საქართველოში ევროკავშირის ელჩის, პაველ ჰერჩინსკის თქმით, “ქართული ოცნების” წინასაარჩევნო ბანერები “აღმაშფოთებელი, სამარცხვინო და შემზარავია.”
