ევროკავშირის ელჩი: შეშფოთებულები ვართ სააკაშვილის ჯანმრთელობის გაუარესებული მდგომარეობის გამო

ევროკავშირის ელჩი სააკაშვილზე

საქართველოში ევროკავშირის ელჩის, პაველ ჰერჩინსკის თქმით, ევროკავშირი შეშფოთებულია მიხეილ სააკაშვილის ჯანმრთელობის გაუარესებული მდგომარეობის შესახებ ცნობებით და ისინი ყურადღებით აკვირდებიან მიმდინარე სასამართლო პროცესებს. ამის შესახებ ელჩმა საქართველოს საკანონმდებლო ორგანოში შეხვედრების შემდეგ, ჟურნალისტებთან განაცხადა.

როგორც ჰერჩინსკიმ აღნიშნა, მას და საქართველოს ხელისუფლების წარმომადგენლებს ძალიან ღია და გულწრფელი საუბრები აქვთ.

“ჩვენ გამოვხატავთ ჩვენს შეხედულებებსა და ჩვენი წევრი ქვეყნების მგრძნობიარობას სხვადასხვა საკითხთან დაკავშირებით. რაც ყველაზე მნიშვნელოვანია, ჩვენ უფრო და უფრო ვეთანხმებით ერთმანეთს ყველა საკითხზე, რათა თავიდან ავიცილოთ უსიამოვნო სიურპრიზები წლის ბოლოს. ვიმედოვნებ ესაა მიმართულება, რომლისკენაც მივდივართ. ჩვენი მოსაზრებაა, რომ საქართველოს ხელისუფლების პასუხისმგებლობაა უზრუნველყოს, რომ საქართველოში ყველა პატიმრის ყველა უფლება დაცული იყოს“, – განაცხადა ევროკავშირის ელჩმა.

ამასთან, ელჩი იმედოვნებს, რომ სააკაშვილის ჯანმრთელობის მდგომარეობა გაუმჯობესდება:

“გულწრფელად ვიმედოვნებთ, რომ ეს სასამართლო პროცესი სწრაფად დასრულდება და ამასობაში, ჩვენ მოვუწოდებთ საქართველოს ხელისუფლებას, რომ ეს მათი პასუხისმგებლობაა პატივი სცენ ყველა პატიმრის ყველა უფლებას, მათ შორის ყოფილი პრეზიდენტის.“

● იქნება თუ არა “მაგნიტსკის აქტის” ანალოგი სააკაშვილზე? ნაციონალურმა მოძრაობამ სიაზე მუშაობა დაასრულა
● სააკაშვილის საქმეები. რისთვის ზის ციხეში ყოფილი პრეზიდენტი
● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს

29 დეკემბერს, სააკაშვილის სასამართლო პროცესზე მოწმის სახით ამერიკელი ტოქსიკოლოგი, დევიდ სმიტი დაკითხეს. მისი თქმით, საქართველოს ექსპრეზიდენტი მძიმე მეტალებით კლინიკა “ვივამედში” გადაყვანამდე, ციხეში მოწამლეს.

ამერიკელმა ტოქსიკოლოგმა თქვა, რომ მან განიხილა მიხეილ სააკაშვილის სამედიცინო ჩანაწერები და ლაბორატორიული ტესტების შედეგები. ასევე, თმის, ფრჩხილებისა და სისხლის ნიმუშები. გარდა ამისა, ექსპრეზიდენტის გაფართოებული სამედიცინო ჩანაწერები და აგრეთვე, 170-გვერდიანი დასკვნა.

“ეს მეტალები ჯანმრთელობის მდგომარეობას ამძიმებენ და მათ კავშირი აქვთ პაციენტის დაავადებასთან. ჩემი აზრით, სააკაშვილის პირველი ინტოქსიკაცია მარტში მოხდა, ვიდრე მას ვივამედში გადაიყვანდნენ და მოგვიანებით, ამ მძიმე მეტალებმა სხვადასხვა ორგანო დააზიანა. მას სიმპტომები მაშინ ჰქონდა, როდესაც სამედიცინო დაწესებულებაში გადაიყვანეს. ანუ, ვთვლი, რომ მძიმე მეტალებით დაზიანება მანამდე, ანუ ციხეში მიიღო. ვვარაუდობ, რომ ამ ტოქსიკური აგენტების დოზა იმდენად მაღალი იყო, რომ ამ 5 თვის გასვლის შემდეგაც კი კონცენტრაცია ნორმაზე მაღლა აღმოჩნდა. ანუ მას ტოქსიკური კონცენტრაცია ჰქონდა”. – ამბობს სმიტი.

მიხეილ სააკაშვილის პროცესზე მოწმის სახით კლინიკა “ვივამედის” ნევროლოგი, თამარ აბაშიძეც დაკითხეს. ექიმის თქმით, ბოლო თვეებში მიხეილ სააკაშვილის ნევროლოგიური მდგომარეობა საგრძნობლად გაუარესებულია.