დიპლომატების განცხადება: ხელისუფლებამ თანმიმდევრულად გაანეიტრალა ქართული დიპლომატია
დიპლომატების განცხადება
საქართველოს სხვადასხვა თაობის კარიერული დიპლომატები ერთობლივ განცხადებას ავრცელებენ ევროკავშირის გუშინდელ გადაწყვეტილებასთან დაკავშირებით, სადაც ამბობენ, რომ ხელისუფლებამ თანმიმდევრულად გაანეიტრალა ქართული დიპლომატია და საშუალება არ მისცა ქართველ დიპლომატებს, შეესრულებინათ მათი უმთავრესი ამოცანა, უზრუნველეყოთ არსებულ რეალობაში ჩვენი ქვეყნისთვის საუკეთესო შედეგის მიღწევა.
როგორც დიპლომატები აღნიშნავენ, ძალიან დასანანია, რომ აღნიშნული გადაწყვეტილებით მოხდა ე.წ ასოცირებული ტრიოს განცალკევება და საქართველო გამოეყო ევროკავშირის აღმოსავლეთ პარტნიორობის ინიციატივის ლიდერთა ჯგუფს, სადაც ის, სულ რამდენიმე წლის წინ მოწინავე ქვეყანას წარმოადგენდა და საუკეთესო რეფორმატორად მოიაზრებოდა.
მათი თქმით, საქართველოს დამოუკიდებლობის აღდგენის პირველივე დღიდან ქართული დიპლომატიის ამოსავალ წერტილსა და უმთავრეს ამოცანას წარმოადგენდა საქართველოს მაქსიმალურად სწრაფად დაბრუნება ევროპულ ოჯახში:
“ამ უნიკალურ და ისტორიულ შესაძლებლობას საქართველოს ხელისუფლება სრულად მოუმზადებელი შეხვდა და ჩვენს ევროპელ პარტნიორებთან უწყვეტ რეჟიმში ინტენსიური მუშაობითა და ჩვენთვის სასურველი შედეგის მიღწევის ნაცვლად, ბოლო პერიოდში მათი მხრიდან ანტი-ევროპული და ანტი-დასავლური რიტორიკა კიდევ უფრო გამწვავდა.”
დიპლომატები ხაზს უსვამენ, რომ ყველა იმ ქართველ დიპლომატს, ვისთვისაც მნიშვნელოვანია “ჩვენი ქვეყნის ევროპული მომავალი”, შეუძლია შეუერთდეს ამ განცხადებას.
24 ივნისს ევროკავშირმა 17 ივნისს მიღებული ევროკომისიის რეკომენდაცია გაითვალისწინა და უკრაინასა და მოლდოვას კანდიდატის სტატუსი, ხოლო საქართველოს მხოლოდ პერსპექტივა აღიარა.
საბოლოო გადაწყვეტილებამდე რამდენიმე საათით ადრე, ევროპულმა პარლამენტმა მიიღო რეზოლუცია, რომელმაც ასევე ძალაში დატოვა 17 ივნისს მიღებული გადაწყვეტილება.
რაც შეეხება პირველი რეზოლუციას, საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ, ის ევროპარლამენტმა 9 ივნისს დაამტკიცა.
20 ივნისს თბილისში, პარლამენტის შენობის წინ საქართველოს ევროპული კურსის მხარდასაჭერად უპრეცედენტოდ მასშტაბური აქცია გაიმართა. აქციაზე შეკრებილი ათასობით ადამიანის მიზანი იყო ევროპისა და ევროპული ღირებულებების მიმართ ქართველი ხალხის ერთგულების დემონსტრირება.
